ଓଡ଼ିଆ ବାର୍ତ୍ତା/ କୋରାପୁଟ: ଗଛ ଲଗାଇବା ଯେତିକି ସହଜ ତା ଠାରୁ ଅଧିକ କଷ୍ଟ ହୋଇଥାଏ ତାର ସୁରକ୍ଷାର ଦାଇତ୍ୱ ନେଇ ତାକୁ ଦୀର୍ଘ କାଳ ବଞ୍ଚାଇ ରଖିବା, ବୃକ୍ଷ ରୋପଣ କାର୍ଯ୍ୟକ୍ରମରେ ଯେତିକି ପରିମାଣରେ ଗଛ ଲଗା ଯାଇଥାଏ ତାର ୧୦ଭାଗ ଗଛ ହିଁ ବଞ୍ଚି ରହେ ସୁରକ୍ଷା ଅଭାବରୁ, ଏଣୁ ଏହି ସବୁ ଅଭାବକୁ ଧ୍ୟାନରେ ରଖି ଗଛ ଲଗାଇବା ଏବଂ ଏହା ବଢ଼ିବା ସକାଶେ ସମୁଚିତ ଧ୍ୟାନ ଦେବା କାର୍ଯ୍ୟରେ ନିଜକୁ ନିୟୋଜିତ କରିଛନ୍ତି କୋରାପୁଟ ଜିଲ୍ଲାର ଶ୍ରୀଜଗଦାନନ୍ଦ । ଚଳିତ ବର୍ଷ ଜୁଲାଇ ତା ୨୦ ରିଖ ଠାରୁ ଅଗଷ୍ଟ ୫ ତାରିଖ ପର୍ଯ୍ୟନ୍ତ ଅନୁନ୍ୟ ୧୦୦୮ଟି ଗଛ ଲଗାଇବା ନିମନ୍ତେ ଦେଶ ବିଦେଶରେ ଅନ୍ୟ ମାନଙ୍କୁ ପ୍ରେରଣା ଦେବା ସହ ନିଜେ ମଧ୍ୟ ଏହି କାର୍ଯ୍ୟକ୍ରମରେ ସମ୍ପୂର୍ଣ ଭାବେ ଜଡ଼ିତ ହୋଇଛନ୍ତି । ଗଛ ଲଗାଇବା ଏବଂ ଏହାର ସୁରକ୍ଷା ସକାଶେ କାଳୀକୃଷ୍ଣ ସଂଘର ଶତାଧିକ ଶିଷ୍ୟ, ଶିଷ୍ୟା, ଶୁଭେଚ୍ଛୁ ମାନଙ୍କୁ ଏହି ପ୍ରକୃତି କଲ୍ୟାଣ କାର୍ଯ୍ୟକ୍ରମରେ ଜଡ଼ିତ କରାଇଥିଲେ । ଏତତ୍ ବ୍ୟତିତ ଓଡ଼ିଶାର ବିଭିନ୍ନ ଜିଲ୍ଲା, ଗ୍ରାମ, ସହର, ଦେଶ ଏପରିକି ବିଦେଶରେ ମଧ୍ୟ ଗଛ ଲଗାଇବାରେ ସଫଳ ରୂପାୟନ କରିପାରିଛନ୍ତି । ପରିବେଶର ସୁରକ୍ଷା ସକାଶେ ଗଛର କିପରି ଆବଶ୍ୟକତା ରହିଛି ଏବଂ ଏହାର ଉପଯୋଗ ରେ ପରିବେଶ ଓ ସମାଜର କିପରି କଲ୍ୟାଣ ହେବ । ଏ ନେଇ ସ୍କୁଲ ର ଛାତ୍ରଛାତ୍ରୀ ମାନଙ୍କୁ ବୁଝାଇବା ସହ ଜଣେ ଗୋଟିଏ ଗଛ ଲଗାଇବା ସହ ଏହାର ଯତ୍ନ ନେବା ପାଇଁ ବୁଝାଇଛନ୍ତି । ଶ୍ରୀ ଜଗଦାନନ୍ଦ ବୃକ୍ଷ ରୋପଣ କାର୍ଯ୍ୟକ୍ରମ ୨୦୨୦ ମସିହା ଠାରୁ ନିଜ ହାତକୁ ନେଇ ଆସୁଛନ୍ତି, ଏହି କାର୍ଯ୍ୟକ୍ରମରେ ଔଷଧୀୟ ବୃକ୍ଷ ଅଁଳା,ଲିମ୍ବ ଅଜୁର୍ନ,ପିପଳ,ବଟ, ତା ସହ ବିଭିନ୍ନ ଫଲ ଗଛ ନଡ଼ିଆ,ପଣସ,ଡାଳିମ୍ବ, ପିଜୁଳି, ଜାମୁକୋଳି, ଲେମ୍ବୁ ଇତ୍ୟାଦି ଗଛ ଲଗାଇଛନ୍ତି ଏବଂ ଅଦ୍ୟାବଧି ଏହି ବୃକ୍ଷ ଗୁଡ଼ିକର ଯତ୍ନ ନେବାରେ ଦାୟିତ୍ଵ ନେଇ ଆସୁଛନ୍ତି । ପ୍ରତି ବର୍ଷ ବୃକ୍ଷ ରୋପଣ କାର୍ଯ୍ୟକ୍ରମ ଗୁଡିକୁ ସଫଳତାର ସହ ପାଳନ କରିଥିବା ଯୋଗୁଁ ଓଡ଼ିଶା ସରକାର ଶ୍ରୀ ଜଗଦାନନ୍ଦଙ୍କୁ ପ୍ରକୃତି ବନ୍ଧୁ ଭାବରେ ୨୦୨୪ ମସିହାରେ ସମ୍ମାନିତ କରିଛନ୍ତି, ପରିବେଶ ସୁରକ୍ଷା ସକାଶେ ବୃକ୍ଷର ଉପସ୍ଥିତି ଅତ୍ୟନ୍ତ ଆବଶ୍ୟକ ସମାଜ ବିକାଶକୁ ଆମେ ଯେତିକି ଗୁରୁତ୍ଵ ଦେଉଛେ, ସମାଜରେ ବୃକ୍ଷ ଗୁଡ଼ିକୁ ବଞ୍ଚାଇବା ପାଇଁ ତା ଠାରୁ ଅଧିକ ଗୁରୁତ୍ବ ଦେବା ଉଚିତ୍ । କାରଣ ବୃକ୍ଷ ବିନା ସମାଜର ବିନାଶ ସୁନିଶ୍ଚିତ, ଏଣୁ ଜଣେ ଗୋଟିଏ ଗଛ ଲଗାଇବା ଏବଂ ଏହାର ଉପଯୁକ୍ତ ଯତ୍ନ ନେବା ପାଇଁ ସଂକଳ୍ପବଦ୍ଧ ହେବା ।
