କୋରାପୁଟଠାରୁ ଜୟପୁର, ସେମିଲିଗୁଡ଼ାରୁ ବ୍ଲକ୍ ମୁଖ୍ୟାଳୟ—ରାସ୍ତାକୁ ଓହ୍ଲାଇଲେ INDIA ମେଣ୍ଟ କର୍ମୀ; ଦୋକାନବଜାର ଓ ଯାତାୟାତ ପ୍ରଭାବିତ
ଓଡ଼ିଆ ବାର୍ତ୍ତା/ କୋରାପୁଟ (ସୁନ୍ଦର କୁମାର ପାଣି): ରାଜ୍ୟବ୍ୟାପୀ ୧୨ ଘଣ୍ଟିଆ ବନ୍ଦ ଡାକର ପ୍ରଭାବ କୋରାପୁଟ ଜିଲ୍ଲାରେ ମଧ୍ୟ ପଡ଼ିଛି। ଆଜି ସକାଳୁ ଜିଲ୍ଲାର ବିଭିନ୍ନ ସହର ଓ ବ୍ଲକ୍ ମୁଖ୍ୟାଳୟରେ INDIA ମେଣ୍ଟର କର୍ମୀମାନେ ପିକେଟିଂ କରିବା ସହ ରାସ୍ତାକୁ ଓହ୍ଲାଇଛନ୍ତି। କୋରାପୁଟ, ଜୟପୁର, ସେମିଲିଗୁଡ଼ା, ବୋରିଗୁମ୍ମା, କୋଟପାଡ଼, ଲମତାପୁଟ, ଲକ୍ଷ୍ମୀପୁର ଓ ନନ୍ଦପୁର ଆଦି ଅଞ୍ଚଳରେ ବନ୍ଦର ପ୍ରଭାବ ଦେଖିବାକୁ ମିଳିଛି। କୋରାପୁଟ ସହରରେ କଲେକ୍ଟର କାର୍ଯ୍ୟାଳୟ ଛକ, ବସ୍ଷ୍ଟାଣ୍ଡ ଓ ପ୍ରମୁଖ ରାସ୍ତାରେ ଆନ୍ଦୋଳନକାରୀମାନେ ପିକେଟିଂ କରିଥିଲେ। ଦୋକାନବଜାର ବନ୍ଦ ରହିବା ସହ ଯାତାୟାତ ମଧ୍ୟ ପ୍ରଭାବିତ ହୋଇଥିଲା। ଜୟପୁର ସହରରେ ମଧ୍ୟ ବନ୍ଦର ପ୍ରଭାବ ପଡ଼ିଛି। ମୁଖ୍ୟ ବଜାର, ବସ୍ଷ୍ଟାଣ୍ଡ ଛକ ଓ ପ୍ରମୁଖ ରାସ୍ତାରେ ଆନ୍ଦୋଳନକାରୀମାନେ ପିକେଟିଂ କରିବା ସହ ଯାନବାହନ ଚଳାଚଳକୁ ବାଧା ଦେଇଥିଲେ। ସେମିଲିଗୁଡ଼ାରେ ମଧ୍ୟ ବନ୍ଦର ପ୍ରଭାବ ସ୍ପଷ୍ଟ ହୋଇଛି। ବଜାର ଛକ, ବସ୍ଷ୍ଟାଣ୍ଡ ଓ ପ୍ରମୁଖ ରାସ୍ତାରେ କର୍ମୀମାନେ ପିକେଟିଂ କରିଥିଲେ। ଦୋକାନବଜାର ବନ୍ଦ ରହିବା ସହ ଅଟୋ ଚଳାଚଳ ମଧ୍ୟ ପ୍ରଭାବିତ ହୋଇଥିବା ଜଣାପଡ଼ିଛି। ବୋରିଗୁମ୍ମା, କୋଟପାଡ଼, ଲମତାପୁଟ, ଲକ୍ଷ୍ମୀପୁର ଓ ନନ୍ଦପୁର ଭଳି ଅଞ୍ଚଳରେ ମଧ୍ୟ ବନ୍ଦକୁ ସମର୍ଥନ କରି ପିକେଟିଂ ଓ ଧାରଣା ଦିଆଯାଇଛି। ଫଳରେ ଅନେକ ସ୍ଥାନରେ ସାଧାରଣ ଜୀବନଯାତ୍ରା ପ୍ରଭାବିତ ହୋଇଛି। ବନ୍ଦ ଆହ୍ୱାନ ପଛରେ MMDR ଆଇନ ପ୍ରସଙ୍ଗ ସମେତ ବିଭିନ୍ନ ଦାବି ରହିଥିବା ଆନ୍ଦୋଳନକାରୀମାନେ କହିଛନ୍ତି। ବନ୍ୟା ପ୍ରଭାବିତ ଲୋକଙ୍କୁ ସହାୟତା, ନିର୍ବାଚନ ପ୍ରକ୍ରିୟା ସମ୍ପର୍କିତ ପ୍ରସଙ୍ଗ ଓ ପାଠ୍ୟପୁସ୍ତକର ତ୍ରୁଟି ଭଳି ବିଷୟକୁ ନେଇ ମଧ୍ୟ ସରକାରଙ୍କ ବିରୋଧରେ ଅସନ୍ତୋଷ ପ୍ରକାଶ କରାଯାଇଛି। ତେବେ ଜରୁରୀ ସେବା ଯଥା ହସ୍ପିଟାଲ, ଆମ୍ବୁଲାନ୍ସ, ଅଗ୍ନିଶମ ସେବା ଆଦିକୁ ବନ୍ଦରୁ ବାଦ ଦିଆଯାଇଥିବା ଜଣାପଡ଼ିଛି। ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଏହି ବନ୍ଦ ଡାକ ଦିଆଯାଇଥିବାରୁ ସନ୍ଧ୍ୟା ପର୍ଯ୍ୟନ୍ତ ଜିଲ୍ଲାର ବିଭିନ୍ନ ଅଞ୍ଚଳରେ ସ୍ଥିତି ଉପରେ ନଜର ରହିଛି।
