ଓଡିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ମହାଶକ୍ତି ଫାଉଣ୍ଡେସନ ବଲାଙ୍ଗିର ଏବଂ ଏଲ ଟି ଆଇ ମାଇଣ୍ଡ ଟ୍ରି ଫାଉଣ୍ଡେସନ ର ମିଳିତ ଆନୁକୁଲ୍ୟରେ ମଦନପୁର ରାମପୁର ବ୍ଲକ ଠାରେ ବିଶ୍ଵ ସ୍ତନ୍ୟପାନ ସପ୍ତାହ ୨୦୨୪ ପାଳିତ ହୋଇଥିଲା। ବିଶ୍ଵ ସ୍ତନ୍ୟପାନ ସପ୍ତାହ ୨୦୨୪ ଉପଲକ୍ଷେ ସମ୍ମାନିତ ଅତିଥି , ଡମ୍.କର୍ଲାଖୁଣ୍ଟା ଗ୍ରାମ ପଞ୍ଚାୟତ ର ସରପଞ୍ଚ ଶ୍ରୀମତୀ ସ୍ନିଗ୍ଧାରାଣୀ ରଣା ଏବଂ ମହାଶକ୍ତି ଫାଉଣ୍ଡେସନ ର ସ୍ବାସ୍ଥ୍ୟ ପୁଷ୍ଟି ବିଶେଷଜ୍ଞ ଶ୍ରୀମତୀ ପ୍ରଜ୍ଞାରାଣୀ ବାରିକ, ପ୍ରକଳ୍ପ ପରିଚାଳକ ଫିରୋଜ କୁମାର ଠାଠୀ ପ୍ରଭୁତି ଉପସ୍ଥିତ ରହି ଗର୍ଭବତୀ ମହିଳା ଏବଂ ସ୍ତନ୍ୟପାନ କରାଉଥିବା ମା, ମାନଙ୍କୁ ଜନ୍ମରୁ ୬ ମାସ ମା କ୍ଷୀର ଏବଂ ୬ ମାସ ପରେ ଅତିରିକ୍ତ ପୁଷ୍ଟିକର ଖାଦ୍ୟ ର ମହତ୍ତ୍ଵ ବୁଝାଇଥିଲେ।
“ଜୀବନର ପ୍ରଥମ ୧୦୦୦ ଦିନ ର ମହତ୍ତ୍ଵ” ବିଷୟରେ ମହାଶକ୍ତି ଫାଉଣ୍ଡେସନ ର ସ୍ବାସ୍ଥ୍ୟ-ପୁଷ୍ଟି ବିଶେଷଜ୍ଞ ଶ୍ରୀମତୀ ପ୍ରଜ୍ଞାରାଣୀ ବାରିକ ଗୁରୁତ୍ୱାରୋପ କରିଥିଲେ । ଏଥି ସହିତ ସେ ଉପସ୍ଥିତ ମା ମାନଙ୍କୁ ଶିଶୁ ଓ ମା ମାନଙ୍କପାଇଁ ପୁଷ୍ଟିକର ଖାଦ୍ୟ କିପରି ତିଆରି କରାଯାଏ, ସେ ବିଷୟରେ ବୁଝାଇ ଥିଲେ ଏବଂ ଦେଖାଇଥିଲେ । ମହାଶକ୍ତି ଫାଉଣ୍ଡେସନ ଏବଂ ଏଲ ଟି ଆଇ ମାଇଣ୍ଡ ଟ୍ରୀ ଫାଉଣ୍ଡେସନ ର ମିଳିତ ଉଦ୍ୟମରେ ଆସନ୍ତା ଚାରିବର୍ଷ ମଧ୍ୟରେ ମ. ରାମପୁର ବ୍ଲକ ରେ ଥିବା ପାଞ୍ଚଗୋଟି ଗ୍ରାମ ପଞ୍ଚାୟତ ରେ ସମନ୍ୱିତ ଗ୍ରାମ୍ୟ ବିକାଶ ଯୋଜନା ର ପରିକଳ୍ପନା କରାଯାଇଛି। ଏହି ଯୋଜନା ମାଧ୍ୟମରେ ପାଞ୍ଚଗୋଟି ଗ୍ରାମ ପଞ୍ଚାୟତ ରେ ପରିବେଶ ସଂରକ୍ଷଣ, ଜୀବନ ଜୀବିକା, ଶିକ୍ଷା ଏବଂ ସ୍ବାସ୍ଥ୍ୟ ଓ ପୁଷ୍ଟି ପାଇଁ ବିଭିନ୍ନ ଉନ୍ନତି ମୂଳକ କାର୍ଯ୍ୟ କରାଯିବ। ସ୍ଥାନୀୟ ଗର୍ଭବତୀ ମହିଳା ଏବଂ ସ୍ତନ୍ୟପାନ କରାଉଥିବା ମା’ ମାନଙ୍କ ସ୍ବାସ୍ଥ୍ୟ ଏବଂ ପୁଷ୍ଟି ର ଉନ୍ନତି ପାଇଁ ଭାରତ ଏବଂ ଓଡ଼ିଶା ସରକାରଙ୍କ ସହାୟତା ରେ ବିଭିନ୍ନ ପଦକ୍ଷେପ ମାନ ହାତକୁ ନିଆଯାଇଛି।ଉପରୋକ୍ତ କାର୍ଯ୍ୟକ୍ରମକୁ ସମନ୍ମିତ ଗ୍ରାମ୍ୟ ଉନ୍ନୟନ ଯୋଜନା, ମ. ରାମପୁର ବ୍ଲକ ସଂଯୋଜକ ଭାଗ୍ୟଶ୍ରୀ ରାଉତ, ପରିଚାଳନା ଏବଂ ଧନ୍ୟବାଦ ଅର୍ପଣ କରିଥିଲେ।
