ଓଡ଼ିଆ ବାର୍ତ୍ତା/ କୋକସରା (ହିରଣ୍ୟ ବେହେରା): କଳାହାଣ୍ଡି ଜିଲ୍ଲା କୋକସରା ଥାନା ମହୁଲମୁଣ୍ଡା ଗ୍ରାମର ଜମିବାଡ଼ି ବିବାଦକୁ ନେଇ ଯୁବକ ଦୟାନିଧି ଗୋପାଳ (ଦୁଣ୍ଡକିଆ)ଙ୍କୁ ପଥରରେ ଛେଚି ଅତି ନିର୍ମମ ଭାବେ ହତ୍ୟା କରାଯାଇଥିବା ଘଟଣାରେ କୋକସରା ପୋଲିସ ଦୁଇ ଜଣଙ୍କୁ ଅଟକ ରଖି ପଚରାଉଚରା କରୁଥିଲା । ପୋଲିସ ସୂଚନା ଅନୁସାରେ, ଦୟାନିଧି ଚିଲିଗୁଡା ଗ୍ରାମରେ ରହୁଥିବା ବେଳେ ସୋମବାର ନିଜ ପୈତୃକ ଗାଁ ମହୁଲମୁଣ୍ଡା କୁ ଧାନ କଟାହେଉ ଥିବାରୁ କ୍ଷେତ କୁ ଆସିଥିଲେ। ହେଲେ ଜମିବାଡି ଓ ରାସ୍ତା ବିବାଦକୁ କେନ୍ଦ୍ର କରି ତାଙ୍କୁ ସନ୍ଧ୍ୟାରେ ପଥର ରେ ଛେଚି ମହୁଲମୁଣ୍ଡା ଚିତାମୁଣ୍ଡା ରାସ୍ତାର ଏକ ଡଙ୍ଗରୀ ନିକଟ ଧାନ ଖଲାରେ ଫିଙ୍ଗିଦେଇ ଥିବା ପରିବାର ଲୋକେ ଖବର ପାଇଥିଲେ । ପରେ ମୃତକ ଙ୍କ ସ୍ତ୍ରୀ ସାଧନୀ ଗୋପାଳ (ଦୁଣ୍ଡକିଆ) ତାଙ୍କ ସ୍ଵାମୀଙ୍କୁ ସମ୍ପର୍କୀୟ କାକା ପୁଅ ଓ ବଡ଼ ବାପା ପୁଅ ଜମିବାଡ଼ି ବିବାଦକୁ ନେଇ ହତ୍ୟା କରିଥିବା ନେଇ ଅଭିଯୋଗ ଆଣିଥିଲେ। ଘଟଣାସ୍ଥଳରେ କୋକସରା ଥାନା ଅଧିକାରୀ ପ୍ରଶନ୍ନ ବେହେରା ପହଞ୍ଚି ଘଟଣାର ପ୍ରାଥମିକ ତଦନ୍ତ ଆରମ୍ଭ କରିଥିଲେ। ତେବେ ମଙ୍ଗଳବାର ସକାଳୁ ପୁଣି ଧର୍ମଗଡ଼ ଉପଖଣ୍ଡ ପୋଲିସ ଅଧିକାରୀ ଧିରଜ କୁମାର ଚୋପଦାର ଘଟଣା ସ୍ଥଳରେ ପହଞ୍ଚି ସାଇଣ୍ଟିଫିକ ଟିମ୍ ସାହାଯ୍ୟରେ ବିଭିନ୍ନ ଦିଗକୁ ତଦନ୍ତ ଆରମ୍ଭ କରିଥିଲେ। ଏହି ଘଟଣାରେ କୋକସରା ପୋଲିସ ଏକ ମାମଲା ରୁଜୁ କରି ମହୁଲମୁଣ୍ଡା ଗ୍ରାମର ଦେବରାଜ ଦୁଣ୍ଡକିଆ ଓ ରୁପଧର ଦୁଣ୍ଡକିଆଙ୍କୁ ଅଟକ ରଖିଥିଲା । ଆଜି ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରି ବେଲ ନାମଞ୍ଜୁର ହେବାରୁ ହାଜତକୁ ପଠେଇ ଥିବା କୋକସରା ଥାନାଧିକାରୀ ପ୍ରସନ୍ନ ବେହେରା ସୂଚନା ଦେଇଛନ୍ତି।
