ଓଡ଼ିଆ ବାର୍ତ୍ତା/ ନୂଆଦିଲ୍ଲୀ: ଗତ କିଛି ମାସ ଧରି ରାଜସ୍ଥାନରେ ଚାଲିଥିବା କଂଗ୍ରେସର ଦୁଇ ଶୀର୍ଷ ନେତାଙ୍କ କନ୍ଦଳ ଶେଷ ହୋଇଥିବା ଲାଗୁଛି। ସୋମବାର ସନ୍ଧ୍ୟାରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେଙ୍କ ବାସଭବନରେ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟ ଏବଂ ସଚିନ ପାଇଲଟ ଉପସ୍ଥିତ ଥିଲେ। କଂଗ୍ରେସ ସଭାପତି ପ୍ରଥମେ ମୁଖ୍ୟମନ୍ତ୍ରୀ ଅଶୋକ ଗେହଲୋଟଙ୍କୁ ଭେଟିଥିଲେ। ଏହା ପରେ ସଚିନ ପାଇଲଟଙ୍କୁ ଭେଟିଥିଲେ। ଏହି ବୈଠକରେ ଦଳର ଅନ୍ୟତମ ଶୀର୍ଷ ନେତା ରାହୁଲ ଗାନ୍ଧୀ ଏବଂ ରାଜସ୍ଥାନର ଦାୟିତ୍ୱରେ ଥିବା ପ୍ରଭାରୀ ସୁଖବିନ୍ଦର ସିଂ ରାନ୍ଧୱା ମଧ୍ୟ ଉପସ୍ଥିତ ଥିଲେ। ବୈଠକ ପରେ ଗଣମାଧ୍ୟମକୁ ସମ୍ବୋଧିତ କରି କଂଗ୍ରେସର ସାଧାରଣ ସମ୍ପାଦକ କେ.ସି ଭେନୁଗୋପାଲ କହିଛନ୍ତି ଯେ ସମସ୍ତ ସମସ୍ୟାର ସମାଧାନ ହୋଇଛି। ଉଭୟ ଅଶୋକ ଗେହଲୋଟ୍ ଏବଂ ସଚିନ ପାଇଲଟ୍ ଏକାଠି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ। ସେ କହିଛନ୍ତି ଯେ ଉଭୟ ନେତା ଏହି ନିଷ୍ପତ୍ତି ହାଇକମାଣ୍ଡକୁ ଛାଡିଛନ୍ତି। ତେବେ ଏହି ସମୟ ମଧ୍ୟରେ ଗେହଲୋଟ୍ ଏବଂ ପାଇଲଟ୍ ଗଣମାଧ୍ୟମକୁ କିଛି କହି ନଥିଲେ। ଏଥି ସହିତ ଅଶୋକ ଗେହଲୋଟ୍ ମୁଖ୍ୟମନ୍ତ୍ରୀ ରହିବେ ବୋଲି ନିଷ୍ପତ୍ତି ନିଆଯାଇଛି ବୋଲି ସୂତ୍ରରୁ ସୂଚନା ମିଳୁଛି, କିନ୍ତୁ ରାଜ୍ୟ ସଂଗଠନରେ ପରିବର୍ତ୍ତନ କରାଯିବ ଏବଂ ସଚିନ ପାଇଲଟଙ୍କୁ ବଡ ଦାୟିତ୍ୱ ଦିଆଯିବାର ସମ୍ଭାବନା ରହିଛି। ସୂଚନାଯୋଗ୍ୟ, ଏହା ପୂର୍ବରୁ ମଧ୍ୟ ସଚିନ୍ ପାଇଲଟ୍ ଉପ ମୁଖ୍ୟମନ୍ତ୍ରୀ ସହିତ ପିସିସି ସଭାପତି ଥିଲେ। କିନ୍ତୁ ଗେହଲୋଟଙ୍କ ସହ ବିବାଦ ସାମ୍ନାକୁ ଆସିବା ପରେ ୨୦୨୦ରେ ଦଳ ତାଙ୍କୁ ଦୁଇଟି ଯାକ ପଦରୁ ମୁକ୍ତ କରିଥିଲେ।ଏହାପରେ ସଚିନ ପାଇଲଟ ଏବଂ ତାଙ୍କ ସମର୍ଥକମାନେ ମୁଖ୍ୟମନ୍ତ୍ରୀ ଅଶୋକ ଗେହଲୋଟଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ କରିବା ସହ ବିଭିନ୍ନ ମଞ୍ଚକୁ ବ୍ୟବହାର କରି ଅସନ୍ତୋଷ ଜାହିର କରି ଆସୁଛନ୍ତି। ନିକଟରେ ସଚିନ ପାଇଲଟ ଆଜମେରରୁ ଜୟପୁର ପର୍ଯ୍ୟନ୍ତ ଏକ ଜନ ସଂଗଠନ ଯାତ୍ରା କରିଥିଲେ। ଏହି ଗସ୍ତରେ ସେ ଅଶୋକ ଗେହଲଟ ସରକାରଙ୍କୁ ସିଧାସଳଖ ଆକ୍ରମଣ କରିଥିଲେ। ଏହା ପରେ ଲାଗୁଥିଲା ଯେ ଯଦି ଏହି ସମସ୍ୟାର ଶୀଘ୍ର ସମାଧାନ ନହୁଏ ତେବେ ପରିସ୍ଥିତି ଆହୁରି ଖରାପ ହୋଇପାରେ। ଏହା ପରେ କୁହାଯାଇଥିଲା ଯେ କର୍ଣ୍ଣାଟକ ମୁଖ୍ୟମନ୍ତ୍ରୀ ପଦକୁ ନେଇ ଚାଲିଥିବା ସମସ୍ୟାର ସମାଧାନ ହେବା ପରେ ହାଇକମାଣ୍ଡ ମଧ୍ୟ ଏହି ପ୍ରସଙ୍ଗରେ ଏକ ବୈଠକ କରିବେ।
