ଓଡ଼ିଆ ବାର୍ତ୍ତା/ କଳାହାଣ୍ଡି (ନିଲେଶ କୁମାର ନାଗ): ଭବାନୀପାଟଣା ବ୍ଲକ ପ୍ରାଥମିକ ଶିକ୍ଷକ ସଂଘ ପକ୍ଷରୁ ସରକାରଙ୍କ ୟୁନିଫାଏଡ ଅଟୋମେସନ ସିଷ୍ଟମ (ୟୁଏଏସ୍)କୁ ବିରୋଧ କରାଯାଇଛି। ଏନେଇ ସଦର ବିଇଓ ଆଚାରି ଶବରଙ୍କୁ ସଂଘ ପକ୍ଷରୁ ଦାବିପତ୍ର ପ୍ରଦାନ କରାଯାଇଛି। ସଂଘ ସଭାପତି ମଧୁସୂଦନ ପ୍ରଧାନ ଓ ସମ୍ପାଦକ ପ୍ରଦ୍ୟୁମ୍ନ ହୋତା ନେତୃତ୍ୱରେ ସଂଘର ଅନ୍ୟାନ୍ୟ କର୍ମକର୍ତ୍ତା ତଥା ବ୍ଲକର ୩୦୦ ରୁ ଉର୍ଦ୍ଧ୍ଵ ଶିକ୍ଷକ ଶିକ୍ଷୟତ୍ରୀମାନେ ଏଥିରେ ଯୋଗ ଦେଇଥିଲେ। ସଦର ବ୍ଲକ ଉପ ସଭାପତି ବେଣୁଧର ବିଶ୍ଵାଳ, ଉପଭାନେତ୍ରୀ ସୁପ୍ରଭା ପଟ୍ଟନାୟକ, ଯୁଗ୍ମ ସମ୍ପାଦକ ପିତାମ୍ବର ସାହୁ,ବିଶ୍ଵନାଥ ପଣ୍ଡା, ଶଙ୍କର ବିଶି, ଉପସଭାନେତ୍ରି ବସୁମତୀ ସାହୁ, କୋଷାଧ୍ୟକ୍ଷ କୁଞ୍ଜବିହାରୀ ମିଶ୍ର, ବ୍ଲକ ସଂଯୋଜକ ଦୁଷ୍ମନ୍ତ ସାହୁ, ପରାମର୍ଶଦାତା ସୁଶାନ୍ତ ସ୍ୱାଇଁ, ଅରୁଣ ବିଶି, ବାଞ୍ଛାନିଧି ମିଶ୍ର, ପ୍ରଫୁଲ୍ଲ ଠାକୁର, ଜାକିର ମହମ୍ମଦ, ସୁଂହରଟ ଜନ୍ସେନ, ତ୍ରିଲୋଚନ ସାହୁ, ଦୁର୍ଗା ଆଚାରି, ଦାମୋଦର ଚନ୍ଦନ, ନିତ୍ୟାନନ୍ଦ ରଣା, କାଳିନ୍ଦ୍ରି ସ୍ୱାଇଁ, ପ୍ରମୋଦ ମୁଦୁଲି, ବିଶ୍ୱଜିତ୍ ରାଏ ଜିଲ୍ଲା କୋର୍ କମିଟି ସଦସ୍ୟ ଯୋଗେଶ୍ୱର୍ ମିଶ୍ର ଓ ଅମରେନ୍ଦ୍ର ପଟ୍ଟନାୟକ ପ୍ରମୁଖ ଉପସ୍ଥିତ ରହି ଏହି ବିରାଟ ଶୋଭାଯାତ୍ରାକୁ ଆଗେଇ ନେଇଥିଲେ। ୟୁଏଏସ୍ ପୋର୍ଟାଲକୁ ବିରୋଧ ସହ ଶିକ୍ଷକ ସଂଘ ଦର୍ଶାଇଛି ଯେ ସରକାର ପ୍ରାଥମିକ ଶିକ୍ଷା ବ୍ୟବସ୍ଥାକୁ ସୁଦୃଢ କରିବା ପାଇଁ ପ୍ରୟାସ କରୁଛନ୍ତି ଏହା ସ୍ଵାଗତ ଯୋଗ୍ୟ ପଦକ୍ଷେପ, ମାତ୍ର ବିଦ୍ୟାଳୟ ଗୁଡ଼ିକରେ ଭିତ୍ତିଭୂମି ସୁଦୃଢ ନକରି ନୂତନ ଶିକ୍ଷକ ନିଯୁକ୍ତି ନକରି ସରକାର ଅନେକ ଅଣଶୈକ୍ଷିକ କାର୍ଯ୍ୟ ଶିକ୍ଷକମାନଙ୍କ ଉପରେ ଲଦି ଦେବା ଅତ୍ୟନ୍ତ ଦୁଃଖ ଓ ପରିତାପର ବିଷୟ। ଜାତୀୟ ଶିକ୍ଷାନୀତି ୨୦୨୦ ଅନୁସାରେ ବିଦ୍ୟାଳୟ ମାନଙ୍କରେ ଚଳିତ ବର୍ଷରୁ ଶିଶୁ ବାଟିକା ଶ୍ରେଣୀକୁ ନୂତନ ଭାବେ ଯୋଗ କରାଯାଇଛି। ମାତ୍ର ଶିକ୍ଷାଦାନ ପାଇଁ ନୂତନ ଶିକ୍ଷକ ନିଯୁକ୍ତି କରାଯାଇନାହିଁ। ଅଧିକାଂଶ ବିଦ୍ୟାଳୟରେ ଛାତ୍ରଛାତ୍ରୀ ଅନୁପାତରେ ଶିକ୍ଷକ ନାହାଁନ୍ତି। ଏହା ବ୍ୟତୀତ ବିଦ୍ୟାଳୟରେ ୟୁଏଏସ ବ୍ୟବସ୍ଥା ପ୍ରଚଳନ କରିବା ପାଇଁ ସରକାର ନିର୍ଦ୍ଦେଶ ଦେଇଛନ୍ତି। ବିଦ୍ୟାଳୟରେ ୟୁଏଏସ ବ୍ୟବସ୍ଥା କରାଗଲେ ଶିକ୍ଷକମାନେ ଅଧିକାଂଶ ସମୟ ବ୍ୟସ୍ତ ରହିବେ ଫଳରେ ଶିକ୍ଷଣ ଓ ଶିକ୍ଷାଦାନ କାର୍ଯ୍ୟ ବ୍ୟାହତ ହେବ। ସରକାରଙ୍କ ପକ୍ଷରୁ ଶିକ୍ଷକମାନଙ୍କୁ ଯେଉଁ ଟାବଲେଟ୍ ଯୋଗାଇ ଦିଆଯାଇଥିଲା ତାହା ଚାର୍ଜ ରଖୁଥିବା ବେଳେ ସଠିକ୍ ଭାବରେ କାର୍ଯ୍ୟ କରୁନାହିଁ। ଶିକ୍ଷକମାନଙ୍କ ପାଖରେ ସେମାନଙ୍କର ଯେଉଁ ବ୍ୟକ୍ତିଗତ ମୋବାଇଲ ରହିଛି ସେମାନେ ନିଜସ୍ଵ ଖର୍ଚ୍ଚରେ ଡାଟା ପ୍ୟାକ୍ ପକାଇ ସରକାର କାର୍ଯ୍ୟ କରିବା ପାଇଁ ଅନିଚ୍ଛା ପ୍ରକାଶ କରୁଛନ୍ତି। ଅନେକ ବିଦ୍ୟାଳୟରେ ବିଦ୍ୟୁତ ନଥିବା ବେଳେ ଦିନସାରା ନେଟୱର୍କର ସମସ୍ୟା ଲାଗିରହିଛି। ଭାରତ ବର୍ଷର ସର୍ବନିମ୍ନ ଗ୍ରେଡ୍ ପେଏ ହାରରେ ଦରମା ପାଉଥିବା ପ୍ରାଥମିକ ଶିକ୍ଷକମାନଙ୍କୁ ଆର୍ଥିକ ଓ ମାନସିକ ଭାବେ ଚାପଗ୍ରସ୍ତ କରାନଯାଇ ଏହି ସବୁ ଘଟଣାକୁ ସରକାର ବିଚାରକୁ ନେଇ ସମାଧାନ କରିବା ପରେ ୟୁଏଏସ ପୋର୍ଟାଲ ଲାଗୁ କରିବା ପାଇଁ ଶିକ୍ଷକ ସଂଘ ଦାବି କରିଛି।
