ଓଡିଆ ବାର୍ତ୍ତା/ ସୁବର୍ଣ୍ଣପୁର (ରାଜ କିଶୋର ତ୍ରିପାଠୀ): ସୁବର୍ଣ୍ଣପୁର ନୂତନ ଜିଲ୍ଲାପାଳ ଡଃ ନୃପରାଜ ସାହୁ ସଦର ମହକୁମା ସୁବର୍ଣ୍ଣପୁର ସହରର ସୋନ୍ଦର୍ଯ୍ୟ କରଣ କରିବାକୁ ବୁଧବାର ଦିନ ବିଭିନ୍ନ ଅଧିକାରୀଙ୍କ ସହିତ ଅନେକ କ୍ଷେତ୍ର ପରିଦର୍ଶନ କରିଥିଲେ l ଟ୍ରାଫିକ ବ୍ୟବସ୍ଥା ସୁଧାରିବାକୁ ବ୍ଲକ ଛକରୁ ସହରକୁ ପ୍ରବେଶ ପାଇଁ ଉଭୟ ପାର୍ଶ୍ୱ ରାସ୍ତାରେ ବସିଥିବା ପନିପରିବା ବିକାଳୀଙ୍କୁ ତାଙ୍କ ପାଇଁ ନିର୍ମାଣ କରା ଯାଇଥିବା ସ୍ବତନ୍ତ୍ର ଭେଣ୍ଡିଙ୍ଗ ଜୋନ କୁ ସ୍ଥାନାନ୍ତର ହେବାକୁ ପରାମର୍ଶ କରିଥିଲେ l ଭେଣ୍ଡିଂ ଜୋନରେ ଥିବା ବିଭିନ୍ନ ସମସ୍ୟା ଟଏଲେଟ, ପିଇବା ପାଣି, ସାନିଟାରୀ ଆଦି ଆବଶ୍ୟକୀୟ ସୁବିଧା ଯୋଗାଇଦେବାକୁ ବିକାଳୀ ମାନେ ଜିଲ୍ଲାପାଳଙ୍କୁ ଗୁହାରି କରିଥିବା ବେଳେ ସେ ସବୁର ତୁରନ୍ତ ସମାଧାନ ପାଇଁ ପୌର ପରିଷଦ ଓ ବିଭିନ୍ନ ଅଧିକାରୀଙ୍କୁ ନିର୍ଦ୍ଦେଶ କରିଥିଲେ l ବ୍ଲକ ଛକରେ ଥିବା ଡିଭାଇଡ଼ର ଗୁଡ଼ିକୁ ଭାଙ୍ଗି ଭୁବନେଶ୍ୱର ମାଷ୍ଟର କ୍ୟାନ୍ଟିନ ଛକ ଭଳି ଅତ୍ୟାଧୁନିକ ଛକ ନିର୍ମାଣ ସହ ସହର ସୌନ୍ଦର୍ଯ୍ୟ କରଣ ଉପରେ ଗୁରୁତ୍ବ ଦେବାକୁ ଅଧିକାରୀ ମାନଙ୍କୁ ପ୍ରସ୍ତାବ ଆଗତ ପାଇଁ ନିର୍ଦ୍ଦେଶ ଦେଇଥିଲେ l ଖରା ବର୍ଷା ସମସ୍ୟା ଲାଗି ଟ୍ରାଫିକ ପୋଲିସଙ୍କ ପାଇଁ ଏକ ସେଡ୍ ନିର୍ମାଣ ପାଇଁ ନିର୍ଦ୍ଦେଶ ଦେଇଥିଲେ l ପରେ ପରେ ଡେଲି ମାର୍କେଟକୁ ପରିଦର୍ଶନ କରି ସେଠାରେ ନୂତନ ମଣ୍ଡପ ନିର୍ମାଣ, ସଫା ସୂତରା ସହ ମାଛ ବଜାର ଓ ପରିବା ବଜାର ର ବିଭିନ୍ନ ସମସ୍ୟା ର ସମାଧାନ ପାଇଁ ପୌର ଅଧିକାରୀଙ୍କୁ ନିର୍ଦ୍ଦେଶ କରିଥିଲେ l ପୁଣି ସହରକୁ ବିଭିନ୍ନ ଜିଲ୍ଲାରୁ ପ୍ରବେଶ ଦ୍ଵାରରେ ସ୍ବାଗତ ତୋରଣ ନିମନ୍ତେ ପୂର୍ତ୍ତ ବିଭାଗ ଅଧିକାରୀଙ୍କୁ ପରାମର୍ଶ କରିଥିଲେ । ପୂର୍ବରୁ ଥିବା ଜିଲାପାଳଙ୍କୁ କେବେ ସହରରେ ଦେଖି ନ ଥିବା ଜନସାଧାରଣ ଆଖି ଆଗରେ ନୂତନ ଜିଲ୍ଲାପାଳଙ୍କ ଏତାଦୃଶ କାର୍ଯ୍ୟକୁ ଭୂରି ଭୂରୀ ପ୍ରଶଂସା କରୁଥିବା ଦେଖାଯାଇଥିଲା ।
