ଓଡ଼ିଆ ବାର୍ତ୍ତା/ କଳାହାଣ୍ଡି (ନିଲେଶ କୁମାର ନାଗ): ଲାଞ୍ଜିଗଡ଼ ବ୍ଲକ୍ ଅନ୍ତର୍ଗତ ଭଟାଙ୍ଗପଦର ଗ୍ରାମ ପଞ୍ଚାୟତରେ ରାଜ୍ୟ ସରକାରଙ୍କ “ଆସ ଆମେ ସ୍କୁଲ୍ ଯିବା” ଅଭିଯାନରେ ପଦଯାତ୍ରା ଓ ଶିକ୍ଷା ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି ଅଭିଯାନ ଗୋଷ୍ଠୀ ଶିକ୍ଷା କାର୍ଯ୍ୟାଳୟ ଲାଞ୍ଜିଗଡ଼, ଭଟାଙ୍ଗପଦର ଉଚ୍ଚ ବିଦ୍ୟାଳୟ, ଆଞ୍ଚଳିକ ସାଧନ କେନ୍ଦ୍ର ଏବଂ ଗ୍ରାମ ପଞ୍ଚାୟତ ମିଳିତ ଭାବେ ଆୟୋଜନ କରିଥିଲେ। ଅଭିଯାନର ମୂଳ ଲକ୍ଷ୍ୟ ହେଉଛି ଆଦୌ ସ୍କୁଲ୍ରେ ନାମ ଲେଖାଇନଥିବା ଓ ଅଧରୁ ସ୍କୁଲ୍ ଛାଡ଼ିଥିବା ପିଲାମାନଙ୍କୁ ପୁଣିଥରେ ସ୍କୁଲକୁ ଫେରାଇବା ଓ ସେମାନଙ୍କ ଶିକ୍ଷାର ଅଧିକାରକୁ ନିଶ୍ଚିତ କରାଇବା। ଉକ୍ତ ସଚେତନତା ଅଭିଯାନରେ ଶିକ୍ଷକ ଶିକ୍ଷୟତ୍ରୀ, ସ୍ବେଚ୍ଛାସେବୀ ସଂଗଠନ ଓ ସ୍ଥାନୀୟ ଯୁବକ ଯୁବତୀ ପ୍ରତ୍ୟେକ ଘରକୁ ଯାଇ ପିଲାମାନଙ୍କ ତଥ୍ୟ ସଂଗ୍ରହ କରିଥିଲେ। ପରିବାର ସହ କଥା ହୋଇ ଶିକ୍ଷାର ଆବଶ୍ୟକତା ସଂପର୍କରେ ବ୍ୟାପକ ଭାବରେ ବୁଝାଇଥିଲେ।
ଅର୍ଥନୈତିକ ସମସ୍ୟା, ଗମନାଗମନ ଅସୁବିଧା, ସଚେତନତାର ଅଭାବ, ପରିବାରିକ କାରଣ ଏବଂ ସାମାଜିକ ବାଧା — ଏହି ସବୁକାରଣରୁ ଅନେକ ପିଲା ପଢ଼ାରୁ ବଞ୍ଚିତ ହୋଇଥିଲେ। ପ୍ରଶାସନ ସେମାନଙ୍କୁ ମାଗଣା ପୁସ୍ତକ, ପୋଷାକ, ମଧ୍ୟାହ୍ନ ଭୋଜନ, ରହିବା ପାଇଁ ଅତ୍ୟାଧୁନିକ ଛାତ୍ରାବାସ ଇତ୍ୟାଦି ସୁବିଧା ବିଷୟରେ ଜଣାଇ ପଢ଼ାପାଇଁ ଆକର୍ଷିତ କରିଥିଲେ।
ଏହି ଅବସରରେ ଆୟୋଜିତ ଶିକ୍ଷା ସଚେତନତା ପଦଯାତ୍ରାରେ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟତ୍ରୀ, ଆଞ୍ଚଳିକ ସାଧନ କେନ୍ଦ୍ର ସଂଯୋଜକ, ସରପଞ୍ଚ, ସମିତି ସଭ୍ୟ, ପୁରାତନ ଛାତ୍ର ସଂସଦର ସଦସ୍ୟ ଓ ଅଭିଭାବକମାନେ ଯୋଗଦାନ କରିଥିଲେ।
ପରେ ପରେ ଲାଞ୍ଜିଗଡ଼ ଗୋଷ୍ଠୀ ଶିକ୍ଷା ଅଧିକାରୀ ଋଷିଆ ମେହେର ଓ ଭଟାଙ୍ଗପଦର ଆଞ୍ଚଳିକ ସାଧନ କର୍ମୀ ମନୋଜ କୁମାର ସାହୁଙ୍କ ତତ୍ତ୍ୱାବଧାନରେ, ସୁଦୂର ଘଞ୍ଚ ଅରଣ୍ୟ ମଧ୍ୟରେ ଥିବା ମୁସିଗୁଡ଼ା ଗ୍ରାମକୁ ପଦଯାତ୍ରା କରାଯାଇଥିଲା। ମୁସିଗୁଡ଼ାର ୯ଟି ପରିବାରର ୨୦ ଜଣ ପିଲା ସ୍କୁଲ୍ରୁ ବାହାରେ ଥିଲେ।
ସେମାନଙ୍କୁ ସଚେତନ କରିବା ପରେ, ୧୬ ଜଣ (ଦଶମୀ ମାଝୀ, ଆରତୀ ମାଝୀ, ସୁକାନ୍ତି ମାଝୀ, ବାସନ୍ତୀ ମାଝୀ, ରିତା ମାଝୀ, ଗୀତା ମାଝୀ, ତୁଳସୀ ମାଝୀ, ମଞ୍ଜୁଳା ମାଝୀ, ରଶ୍ମିତା ମାଝୀ, ଲବଣୀ ମାଝୀ, ଚନୁ ମାଝୀ, ସାନମତି ମାଝୀ, ମଧୁସ୍ମିତା ମାଝୀ, କେମିତ ମାଝୀ, ସଞ୍ଜୟ ମାଝୀ, ପିଙ୍କି ମାଝୀ)ଙ୍କୁ ଭଟାଙ୍ଗପଦର ଉଚ୍ଚ ବିଦ୍ୟାଳୟରେ ନାଁ ଲେଖାଗଲା ଏବଂ ଅନ୍ୟ ୪ ଜଣଙ୍କୁ ମୁକ୍ତ ବିଦ୍ୟାଳୟ ଓ ବୟସ ଅନୁଯାୟୀ ଶ୍ରେଣୀରେ ଭର୍ତ୍ତି କରାଗଲା।
ଏହି ପରିପ୍ରେକ୍ଷୀରେ ଗୋଷ୍ଠୀ ଶିକ୍ଷା ଅଧିକାରୀ ଋଷିଆ ମେହେର ଗ୍ରାମବାସୀଙ୍କୁ ବାର୍ତ୍ତା ଦେଇଥିଲେ — “ଆମର ଲକ୍ଷ୍ୟ ସ୍ପଷ୍ଟ — ପ୍ରତ୍ୟେକ ପିଲା ସ୍କୁଲ୍ରେ ରହିବେ। କୌଣସି ପିଲାକୁ ପଛରେ ରଖିବୁ ନାହିଁ। ଏହା କେବଳ ଶିକ୍ଷାର ପ୍ରଶ୍ନ ନୁହେଁ, ଏହା ଏକ ଭବିଷ୍ୟତ୍ ଗଢ଼ିବାର ଅଭିଯାନ।”
ଏହି ନାମଲେଖା ଅଭିଯାନରେ ଭଟାଙ୍ଗପଦର ଉଚ୍ଚ ବିଦ୍ୟାଳୟ ପ୍ରଧାନ ଶିକ୍ଷୟତ୍ରୀ ଶ୍ରୀମତୀ ଲିଲିମା ମଞ୍ଜରୀ ସୁନାନି, ଶିକ୍ଷୟତ୍ରୀ ପୂର୍ଣ୍ଣିମା ଦାସ୍, ଶିକ୍ଷକ ଦୂର୍ବଦଳ ପଟେଲ, ନିଲାଞ୍ଚଳ ଭଇଁସାଲ୍, ବିଭୁଦତ୍ତ ଭୋଇ, ସମିତି ସଭ୍ୟ ରୁପେନ୍ଦ୍ର ଛତ୍ରିଆ, ସରପଞ୍ଚ ଦଶମୀ ମାଝୀ, ପୁରାତନ ଛାତ୍ର ସଂସଦର ବିଜୟ ମାଝୀ, ମଦନ ମାଝୀ, ଲାଞ୍ଜୀ ମାଝୀ ଏବଂ ଶରତ ନାଗ ପ୍ରମୁଖ ଉପସ୍ଥିତ ଥିଲେ।
ଆଞ୍ଚଳିକ ସାଧନ କେନ୍ଦ୍ର ସଂଯୋଜକ ମନୋଜ କୁମାର ସାହୁ କହିଲେ, “ଆସ ଆମେ ସ୍କୁଲ୍ ଯିବା” — କେବଳ ଏକ ସ୍ଲୋଗାନ୍ ନୁହେଁ, ଏହା ପ୍ରତ୍ୟେକ ପିଲାର ଶିକ୍ଷା ଅଧିକାରର ପ୍ରତୀକ।
