ଓଡ଼ିଆ ବାର୍ତ୍ତା/ ଜୁନାଗଡ (ସ୍ବାସ୍ତିଦୀପ ଆଦିତ୍ୟ): କଳାହାଣ୍ଡି ଜିଲ୍ଲା ଜୁନାଗଡ଼ ସ୍ଥିତ ବଜାରପଡ଼ାରେ ଆଜି ଏକ ପବିତ୍ର ଓ ଆଧ୍ୟାତ୍ମିକ ପରିବେଶ ମଧ୍ୟରେ ‘ଗଳି ୱାଲେ ମହାରାଜ’ଙ୍କ ପାବନ ଅବସରରେ ବିଶାଳ ଭୋଗ ବିତରଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ସକାଳୁ ପୂଜାର୍ଚ୍ଚନା ଓ ଆରତି ପରେ ଭକ୍ତିପୂର୍ଣ୍ଣ ମାହୋଲ ମଧ୍ୟରେ ଶ୍ରଦ୍ଧାଳୁମାନଙ୍କ ପାଇଁ ଭୋଗ ବିତରଣର ବିଶେଷ ଆୟୋଜନ କରାଯାଇଥିଲା। ଏହି ମହାନୁଭବ ଆୟୋଜନରେ ଆଖପାଖ ଅଞ୍ଚଳର ଶହ ଶହ ଶ୍ରଦ୍ଧାଳୁ ଯୋଗଦେଇ ପ୍ରଭୁଙ୍କ ପ୍ରସାଦ ଗ୍ରହଣ କରିବା ସହ ନିଜ ପରିବାର ଏବଂ ସମଗ୍ର ସମାଜର ସୁଖ, ଶାନ୍ତି, ସମୃଦ୍ଧି ଓ ମଙ୍ଗଳ ପାଇଁ କାମନା କରିଥିଲେ। ଏହି ଧାର୍ମିକ କାର୍ଯ୍ୟକ୍ରମକୁ ସଫଳ ଓ ସୁଚାରୁରୂପେ ପରିଚାଳନା କରିବା ପାଇଁ ସ୍ଥାନୀୟ ଅଞ୍ଚଳର ଯୁବବର୍ଗ ଏବଂ ସମାଜସେବୀମାନେ ଅଗ୍ରଣୀ ଭୂମିକା ଗ୍ରହଣ କରିଥିଲେ। ନିଷ୍ଠା ଓ ସେବାଭାବର ସହ ସମସ୍ତ ଯୁବକ ଶୃଙ୍ଖଳା ରକ୍ଷା କରିବା ସହ ଶ୍ରଦ୍ଧାଳୁମାନଙ୍କୁ ଆଦରର ସହ ପ୍ରସାଦ ବଣ୍ଟନ କରିଥିଲେ। ଆୟୋଜକ କମିଟି ପକ୍ଷରୁ କୁହାଯାଇଛି ଯେ, “ଗଳି ୱାଲେ ମହାରାଜ ହେଉଛନ୍ତି ଆମର ଅପାର ଆସ୍ଥା ଓ ବିଶ୍ୱାସର ପ୍ରତୀକ। ତାଙ୍କର ଅପାର କୃପା ଓ ଆଶୀର୍ବାଦ ସଦାସର୍ବଦା ସମସ୍ତଙ୍କ ଉପରେ ବଜାୟ ରହୁ, ଏହାହିଁ ଆମର ଏକମାତ୍ର ପ୍ରାର୍ଥନା।” ଉପସ୍ଥିତ ବୁଦ୍ଧିଜୀବୀ ଓ ସହରବାସୀମାନେ ମତ ପ୍ରକାଶ କରିଥିଲେ ଯେ ଏଭଳି ସାମାଜିକ ଓ ଧାର୍ମିକ କାର୍ଯ୍ୟକ୍ରମ ଆମ ଭିତରେ ଭାଇଚାରା, ସଦ୍ଭାବନା ଏବଂ ଏକତାକୁ ଆହୁରି ସୁଦୃଢ଼ କରିବାରେ ସାହାଯ୍ୟ କରେ। ଏହି କାର୍ଯ୍ୟକ୍ରମରେ ବହୁ ସଂଖ୍ୟାରେ ସ୍ଥାନୀୟ ମାନ୍ୟଗଣ୍ୟ ବ୍ୟକ୍ତି ଓ ଯୁବ ସଦସ୍ୟମାନେ ଉପସ୍ଥିତ ରହି କାର୍ଯ୍ୟକ୍ରମର ପରିଚାଳନାରେ ସହଯୋଗ କରିଥିଲେ। ସେମାନଙ୍କ ମଧ୍ୟରେ ସଚିନ ଅନ୍ଦାନୀ, ଆଶୀଷ ଗୋୟଲ, ସୁରେଶ ବାଗ ୟାଦବ,
କଳିଙ୍ଗ ସାହୁ, ସ୍ୱସ୍ତିଦୀପ ଆଦିତ୍ୟ, ସାୟମ କାନ୍ଧପନ, ଚନ୍ଦ୍ରଶେଖର ବୈଠାରୁ, ଆୟୁଷ ଅଗ୍ରୱାଲ, ରିତିକ କାନ୍ଧପନ, କମଲେଶ ସୋନୀ, ଅଭୟ ସାହୁ, ଆଦର୍ଶ ମେହେର, ସୁମିତ କାନ୍ଧପନ, ସତ୍ୟମ କାନ୍ଧପନ, କାଲିଆ କାନ୍ଧପାନ, ତୁଷାର ମୋହନ୍ତୀଙ୍କ ସମେତ ଅନ୍ୟାନ୍ୟ କାର୍ଯ୍ୟକର୍ତ୍ତା ପ୍ରମୁଖ ଉପସ୍ଥିତ ଥିଲେ। ଶେଷରେ ପ୍ରସାଦ ସେବନ ପରେ ଶ୍ରଦ୍ଧାଳୁମାନେ ଆନନ୍ଦ ମନରେ ନିଜ ନିଜ ଗୃହକୁ ପ୍ରତ୍ୟାବର୍ତ୍ତନ କରିଥିଲେ।
