ଓଡ଼ିଆ ବାର୍ତ୍ତା/ କୋରାପୁଟ (ସୁନ୍ଦର କୁମାର ପାଣି): କୋରାପୁଟ ଜିଲ୍ଲାପାଳ ମନୋଜ ସତ୍ୟବାନ ମହାଜନ ରବିବାର ସୁନାବେଡ଼ା ପୌରାଞ୍ଚଳ ଗସ୍ତ କରି ବିଭିନ୍ନ ଜନହିତକର ପ୍ରକଳ୍ପ ଓ ସରକାରୀ ଭିତ୍ତିଭୂମି ସୁବିଧାର ସ୍ଥିତି ସମୀକ୍ଷା କରିଥିଲେ। ଏହି ଗସ୍ତ ଅବସରରେ ସେ ଆହାର କେନ୍ଦ୍ର, ଖେଳ ପଡ଼ିଆ, ସ୍ଥାନୀୟ ହାଟ ଏବଂ ବହୁମୁଖୀ କାର୍ଯ୍ୟକ୍ଷମ ହଲ ପରିଦର୍ଶନ କରି ସେଗୁଡ଼ିକର ପରିଚାଳନା, ବ୍ୟବହାର, ରକ୍ଷଣାବେକ୍ଷଣ ଓ ଲୋକସେବାର ମାନ ସମ୍ପର୍କରେ ବିସ୍ତୃତ ସମୀକ୍ଷା କରିଥିଲେ।
ଆହାର କେନ୍ଦ୍ରରେ ପହଞ୍ଚି ଜିଲ୍ଲାପାଳ ଖାଦ୍ୟର ଗୁଣବତ୍ତା, ପରିଷ୍କାର-ପରିଚ୍ଛନ୍ନତା, ଉପଭୋକ୍ତାଙ୍କୁ ମିଳୁଥିବା ସୁବିଧା ଓ ନିୟମିତ ପରିଚାଳନା ସମ୍ପର୍କରେ ସମୀକ୍ଷା କରିଥିଲେ। ଖେଳ ପଡ଼ିଆ ପରିଦର୍ଶନ ସମୟରେ ଯୁବପିଢ଼ିଙ୍କ କ୍ରୀଡ଼ା ବିକାଶ ପାଇଁ ଉପଲବ୍ଧ ଭିତ୍ତିଭୂମିର ସଠିକ୍ ବ୍ୟବହାର ଓ ରକ୍ଷଣାବେକ୍ଷଣ ଉପରେ ଗୁରୁତ୍ୱ ଦେଇଥିଲେ। ସେହିପରି ସ୍ଥାନୀୟ ହାଟରେ ବ୍ୟବସାୟୀ ଓ ସାଧାରଣ ଲୋକଙ୍କ ପାଇଁ ଉପଲବ୍ଧ ମୌଳିକ ସୁବିଧା ସମ୍ପର୍କରେ ଅବଲୋକନ କରିଥିଲେ। ବହୁମୁଖୀ କାର୍ଯ୍ୟକ୍ଷମ ହଲ ପରିଦର୍ଶନ ବେଳେ ଏହାର ବ୍ୟବହାର, ରକ୍ଷଣାବେକ୍ଷଣ ଓ ଜନସାଧାରଣଙ୍କ ସୁବିଧା ପାଇଁ ଏହାର ଉପଯୋଗିତା ନେଇ ସମ୍ପୃକ୍ତ ଅଧିକାରୀଙ୍କ ସହ ଆଲୋଚନା କରିଥିଲେ। ପ୍ରତ୍ୟେକ ପ୍ରକଳ୍ପର ଅଗ୍ରଗତି ଓ ପରିଚାଳନା ସମ୍ପର୍କରେ ଅଧିକାରୀମାନଙ୍କଠାରୁ ସୂଚନା ନେବା ସହ ଆବଶ୍ୟକ ସ୍ଥାନରେ ଉନ୍ନୟନମୂଳକ କାର୍ଯ୍ୟକୁ ଅଧିକ ତ୍ୱରାନ୍ୱିତ କରିବାକୁ ପରାମର୍ଶ ଦେଇଥିଲେ।
ଜିଲ୍ଲାପାଳ କହିଥିଲେ ଯେ, ସରକାରଙ୍କ ବିଭିନ୍ନ ଜନକଲ୍ୟାଣମୂଳକ ଯୋଜନା ଓ ସୁବିଧାର ସୁଫଳ ଯେପରି ପ୍ରକୃତ ହିତାଧିକାରୀଙ୍କ ପାଖରେ ପହଞ୍ଚିବ, ସେଥିପାଇଁ ସମସ୍ତ ବିଭାଗ ସମନ୍ୱୟ ରକ୍ଷା କରି କାର୍ଯ୍ୟ କରିବା ଆବଶ୍ୟକ। ସେବା ପ୍ରଦାନରେ ସ୍ୱଚ୍ଛତା, ଦାୟିତ୍ୱବୋଧ ଓ ଗୁଣାତ୍ମକ ମାନ ବଜାୟ ରଖିବା ସହ ଜନସାଧାରଣଙ୍କ ଅଭିଯୋଗର ତ୍ୱରିତ ସମାଧାନ ଉପରେ ମଧ୍ୟ ସେ ଗୁରୁତ୍ୱାରୋପ କରିଥିଲେ। ଏହି ଗସ୍ତରେ ସୁନାବେଡ଼ା ପୌରାଞ୍ଚଳର ସମ୍ପୃକ୍ତ ଅଧିକାରୀ ଓ ବିଭିନ୍ନ ବିଭାଗର କର୍ମଚାରୀମାନେ ଉପସ୍ଥିତ ରହି ଜିଲ୍ଲାପାଳଙ୍କୁ ବିଭିନ୍ନ ପ୍ରକଳ୍ପର ବର୍ତ୍ତମାନ ସ୍ଥିତି, ପରିଚାଳନା ଏବଂ ଭବିଷ୍ୟତ କାର୍ଯ୍ୟଯୋଜନା ସମ୍ପର୍କରେ ଅବଗତ କରାଇଥିଲେ।
