ଓଡ଼ିଆ ବାର୍ତ୍ତା/ ଥୁଆମୂଳ ରାମପୁର (ପ୍ରଦୀପ କୁମାର ପଣ୍ଡା): ପ୍ରଫେସର ଭୁବନେଶ୍ବର ବେହେରା ମେମୋରିଆଲ ୟୁଥ ଅର୍ଗାନାଇଜେସନ ଏବଂ ଇନ୍ଦ୍ରାବତୀ ପ୍ରଡ୍ୟୁସର ଗୃପ୍ ଦଳଗୁଡାର ମିଳିତ ଆନୁକୂଲ୍ୟରେ ଥୁଆମୂଳ ରାମପୁର ବ୍ଲକ ଗୋପୀନାଥପୁର ପଞ୍ଚାୟତର ଦୁର୍ଗମ ଗାଁ କନରପାସ୍ ଠାରେ “ଅମୃତ ମାତୃ ପିତୃ ସେବା” କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ସଂଗଠନ ସମ୍ପାଦକ ଅବିନାଶ ମୁଣ୍ଡଙ୍କ ଅଧ୍ୟକ୍ଷତାରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଅଡ୍ରି ଗ୍ରାମ ପଞ୍ଚାୟତ ସରପଞ୍ଚ ନନ୍ଦାଏ ମାଝୀ ଏବଂ ସମ୍ମାନିତ ଅତିଥି ଭାବରେ ଯୁବ ସମାଜସେବୀ ଦେବାଶିଷ ପଣ୍ଡା, ବିଶିଷ୍ଟ ସମାଜସେବୀ ଚିନ୍ମୟ ବେହେରା ପ୍ରମୁଖ ଉପସ୍ଥିତ ରହି କନରପାସ୍ ସମେତ କେନ୍ଦୁମୁଣ୍ଡି, ମୁସ୍କୁଟା ଏବଂ ଚିର୍କା ଗ୍ରାମର ଶତାଧିକ ଅସହାୟ ବୃଦ୍ଧ ବୃଦ୍ଧା ଏବଂ ବିଧବା ମହିଳାଙ୍କୁ କମ୍ବଳ ବଣ୍ଟନ କରିଥିଲେ। ଏହି ଅବସରରେ ବରିଷ୍ଠ ନାଗରିକ, ବିଧବା ଓ ପଛୁଆ ବର୍ଗ ଜନସାଧାରଣ ମାନଙ୍କ ପାଇଁ ସରକାରଙ୍କ ଦ୍ବାରା ଉଦ୍ଦିଷ୍ଟ ଥିବା ବିଭିନ୍ନ ଜନହିତକାରୀ ଯୋଜନା ସମ୍ପର୍କରେ ସୂଚନା ଦେବା ସହିତ ପ୍ରତ୍ୟେକ ଯୋଜନାରେ କିପରି ନିଜର ଭାଗିଦାରୀ ରଖିବା ସେ ନେଇ ସଚେତନତା ଜରୁରୀ ବୋଲି ଅତିଥି ମାନେ ଆଲୋଚନା କରିଥିଲେ। ଆୟୋଜିତ କାର୍ଯ୍ୟକ୍ରମରେ ଯୁବ ସମାଜ ସେବୀ ସଞ୍ଜୀବ କୁମାର ଠାକୁର, ସମାଜ ସେବୀ ଉପେନ୍ଦ୍ର ନାଏକଙ୍କ ସମେତ ଇନ୍ଦ୍ରାବତୀ ପ୍ରଡ୍ୟୁସର ଗୃପ୍ ର ସଦସ୍ୟ ମାନଙ୍କ ସହଯୋଗ ରହିଥିଲା।
