ଓଡିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ନର୍ଲା ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ରରେ ଶନିବାର ‘ସମ୍ବାଦ’ ଓ ‘ଆମ ଓଡ଼ିଶା’ ପକ୍ଷରୁ ଏକ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି। ନର୍ଲା ‘ସମ୍ବାଦ’ ପ୍ରତିନିଧି ଅଭିରାମ ନନ୍ଦଙ୍କ ନେତୃତ୍ଵରେ ଏନେଇ ଆୟୋଜିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ନର୍ଲା ତହସିଲଦାର ବିଶ୍ଵନାଥ କହଁର ଯୋଗଦେଇ ରକ୍ତଦାନ ଶିବିରର ଶୁଭ ଉଦଘାଟନ କରିଥିଲେ। ରକ୍ତଦାନ ମହତ କାର୍ଯ୍ୟ, ଯୁବ ପିଢ଼ି ଏଥିପାଇଁ ଆଗେଇ ଆସିବା ଉଚିତ ବୋଲି ଶ୍ରୀ କହଁର ଏହି ଅବସରରେ ମତବ୍ୟକ୍ତ କରିଛନ୍ତି।
ସମ୍ମାନୀତ ଅତିଥି ଭାବରେ ନର୍ଲା ଭାରପ୍ରାପ୍ତ ଚିକିତ୍ସାଧିକାରୀ ଅକ୍ଷୟ କୁମାର ଗୋଛାୟତ, ସାମ୍ୱାଦିକ ରଞ୍ଜନ ମହାନ୍ତି, ନର୍ଲା ସମିତି ସଦସ୍ୟ ସୁଦାମ ଝାଙ୍କର (କାଳିଆ), ନର୍ଲା ପୋଲିସ ଏସଆଇ ମାନସ ରଞ୍ଜନ ସାହୁ, ଅବନୀ ଖୁରା, ସାମ୍ବାଦିକ ନୀଳକଣ୍ଠ ବେହେରା, ସର୍ଗିଗୁଡାର ପୁର୍ବତନ ସରପଞ୍ଚ ନରସିଂହ କୁମାରଙ୍କ ସମେତ ଦେବାଶିଷ ପଟ୍ଟନାୟକ, ଅନିରୁଦ୍ଧ ବାଗ, ଅଭୟ ନାଏକ ପ୍ରମୁଖ ଉପସ୍ଥିତ ରହି ରକ୍ତଦାତା ମାନଙ୍କୁ ଉତ୍ସାହିତ କରିଥିଲେ।
ଟେକ୍ନିସିଆନ କୃଷ୍ଣଚନ୍ଦ୍ର ସାହୁ, ସଞ୍ଜୀବ କୁମାର ମହାଖୁଡ, ଅଜିତ କୁମାର ନାଏକ, ଡୋଳାମଣି ମାଝୀ, ଏଟେଣ୍ଡେଣ୍ଟ ଗିରିଶ ନାଏକ ପ୍ରମୁଖ ରକ୍ତ ସଂଗ୍ରହ କରିଥିଲେ। ଲଘୁଚାପ ଜନିତ ପ୍ରବଳ ବର୍ଷା ଯୋଗୁଁ ରକ୍ତଦାତାମାନେ ଆସି ନପାରିବାରୁ ମାତ୍ର ୧୦ ୟୁନିଟ ରକ୍ତ ସଂଗୃହୀତ ହୋଇଥିବା ଜଣାପଡ଼ିଛି।
