ବିଧାୟକମାନଙ୍କୁ ସ୍ମାରକପତ୍ର ପ୍ରଦାନ କଲେ ପ୍ରତିନିଧି ଦଳ
ଓଡିଆ ବାର୍ତ୍ତା/ ଭବାନୀପାଟଣା: ଓଡ଼ିଶାର କଳାହାଣ୍ଡି ଓ ରାୟଗଡ଼ା ଜିଲ୍ଲାର ସାମାଜିକ-ଅର୍ଥନୈତିକ ପୁନରୁଦ୍ଧାର ପାଇଁ ଏକ ମିଳିତ ପ୍ରୟାସ ଭାବେ ଲାଞ୍ଜିଗଡ଼ ଅଂଚଳିକ ବିକାଶ ପରିଷଦ ବ୍ୟାନରରେ ସ୍ଥାନୀୟ ନେତୃବୃନ୍ଦ ଅଂଚଳର ବିଧାୟକମାନଙ୍କୁ ଲାଞ୍ଜିଗଡ଼ରେ ବକ୍ସାଇଟ୍ ଖଣି ଖୋଳିବା ପାଇଁ ଅନୁରୋଧ କରିଛନ୍ତି। ପ୍ରତିନିଧି ଦଳ ଅନୁନ୍ନତ ଅଂଚଳରେ ବିକାଶକୁ ପ୍ରୋତ୍ସାହିତ କରିବା, ନିଯୁକ୍ତ ସୃଷ୍ଟି କରିବା ଏବଂ ଗୁରୁତ୍ବପୂର୍ଣ୍ଣ ନିବେଶକୁ ଆକର୍ଷିତ କରିବା ପାଇଁ ପୂର୍ଣ୍ଣ ଅଂଶଗ୍ରହଣ ସହ ଦାୟିତ୍ଵପୂର୍ଣ୍ଣ ଭାବରେ ଏହି ଅଂଚଳର ବିଶାଳ ଖଣିଜ ସମ୍ଭାବନାକୁ ଉନ୍ମୁକ୍ତ କରିବାକୁ ଆହ୍ୱାନ କରିଛନ୍ତି।
ଭବାନୀପାଟଣା ବିଧାୟକ ସାଗର ଚରଣ ଦାସ, ଧର୍ମଗଡ଼ ବିଧାୟକ ସୁଧୀର ରଞ୍ଜନ ପଟ୍ଟଯୋଶୀ ଓ ଲାଞ୍ଜିଗଡ଼ ବିଧାୟକ ପ୍ରଦୀପ କୁମାର ଦିଶାରୀଙ୍କୁ ପ୍ରଦାନ କରାଯାଇଥିବା ସ୍ମାରକପତ୍ରରେ ବକ୍ସାଇଟ୍ ଖଣି ଖୋଳିବା ପାଇଁ ଅବିଳମ୍ବେ ଗ୍ରାମସଭା ପ୍ରକ୍ରିୟା ଆରମ୍ଭ କରିବା ଉପରେ ଗୁରୁତ୍ୱାରୋପ କରାଯାଇଥିଲା। ଉକ୍ତ ପ୍ରତିନିଧି ଦଳରେ କଳାହାଣ୍ଡି ଓ ରାୟଗଡ଼ାର ପ୍ରାୟ ୩୫ ଜଣ ପ୍ରମୁଖ ନେତା ଉପସ୍ଥିତ ଥିଲେ, ଯେଉଁଥିରେ ଲାଞ୍ଜିଗଡ଼ ଅଂଚଳିକ ବିକାଶ ପରିଷଦ ଅଧ୍ୟକ୍ଷ ଶ୍ରୀଧର ପେସନିଆ, ଲାଞ୍ଜିଗଡ଼ ବ୍ଳକ ଅଧ୍ଯକ୍ଷା କମଳା ପାତ୍ର, ଲାଞ୍ଜିଗଡ଼ ବ୍ଳକ ଉପାଧ୍ୟକ୍ଷ ସଞ୍ଜୀବ କୁମାର ନାୟକ, ଲାଞ୍ଜିଗଡ଼ ଆଂଚଳିକ ବିକାଶ ପରିଷଦ ସଚିବ ନିର୍ମଳ ସାମଲ, ସ୍ଥାନୀୟ ବରିଷ୍ଠ ପ୍ରତିନିଧି ଚନ୍ଦ୍ର ପେସନିଆ ଓ ସୁରେଶ ଅଗ୍ରୱାଲ, ଲାଞ୍ଜିଗଡ଼ ଜୋନ୍-୨ ଜିଲ୍ଲା ପରିଷଦ ସଦସ୍ୟ ପରୀକ୍ଷିତ ନାଏକ, ସ୍ଥାନୀୟ ନେତା ଧନେଶ୍ଵର ମାଝୀ, ଲାଞ୍ଜିଗଡ଼ ଆଂଚଳିକ ବିକାଶ ପରିଷଦ କୋଷାଧ୍ୟକ୍ଷ ମହେଶ୍ଵର ପତି, କରି ମାଝୀ, ପାଟ ମାଝୀ, ଦଶରଥ ମାଝୀ, ସୁଶାନ୍ତ ମାଝୀ, ରଘୁନାଥ ପାଣି, ସତ୍ୟ ଚଲାନ, ରବି ଦଣ୍ଡସେନା ଏବଂ ସ୍ଥାନୀୟ ସଦସ୍ୟମାନେ ଉପସ୍ଥିତ ଥିଲେ।
ଲାଞ୍ଜିଗଡ଼ ବିଧାୟକ ପ୍ରଦୀପ କୁମାର ଦିଶାରୀ ଏନେଇ ମନ୍ତବ୍ୟ ଦେଇଛନ୍ତି ଯେ, ବିଧାୟକ ଭାବରେ ମୋର ପ୍ରମୁଖ ଦାୟିତ୍ବ ହେଉଛି ଲାଞ୍ଜିଗଡ଼ ନିର୍ବାଚନମଣ୍ଡଳୀ ବାସିନ୍ଦାଙ୍କ ଯତ୍ନ ନେବା ଏବଂ ଆମେ ସର୍ବଦା ଲାଞ୍ଜିଗଡ଼ ଓ କଳାହାଣ୍ଡିର ଲୋକଙ୍କ ଉନ୍ନତି ପାଇଁ ପ୍ରୟାସରତ। ଶିଳ୍ପ ସମାଜର ବିକାଶ ପାଇଁ ତୃଣମୂଳ ସ୍ତରରେ କାର୍ଯ୍ୟ କରେ। ଲାଞ୍ଜିଗଡ଼ର ବେଦାନ୍ତକୁ ସୁଗମ ଓ ନିରନ୍ତର ଉତ୍ପାଦନ ପାଇଁ ବକ୍ସାଇଟ୍ ଯୋଗାଣ ପାଇଁ ଆମେ ଓଡ଼ିଶା ସରକାରଙ୍କ ପାଖରେ ଏହି ପ୍ରସଙ୍ଗ ଉଠାଇବୁ। ଲାଞ୍ଜିଗଡ଼ ଓ ପାର୍ଶ୍ଵବର୍ତ୍ତୀ ଅଂଚଳର ଲୋକଙ୍କ ବିକାଶ ପାଇଁ ଆମେ ସମସ୍ତ ସ୍ତରରେ ଏହି ପ୍ରସଙ୍ଗ ଉଠାଇବୁ।
ଧର୍ମଗଡ଼ ବିଧାୟକ ସୁଧୀର ରଞ୍ଜନ ପଟ୍ଟଯୋଶୀ କହନ୍ତି, ଏହା ଏକ ଆଇନଗତ ବିଷୟ ଓ ଓଡ଼ିଶା ସରକାର ଏଥିପାଇଁ ଆବଶ୍ୟକ ପଦକ୍ଷେପ ନେବେ। ଆମେ ମାନ୍ୟବର ଖଣି ମନ୍ତ୍ରୀ ଓ ମାନ୍ୟବର ମୁଖ୍ୟମନ୍ତ୍ରୀଙ୍କ ସହ ଏକ ବୈଠକ ସ୍ଥିର କରିବୁ, ଯଦ୍ୱାରା ସରକାରୀ ସ୍ତରରେ ସେମାନଙ୍କ ଦୃଷ୍ଟି ଆକର୍ଷଣ କରାଯାଇପାରିବ। ମାନ୍ୟବର ପ୍ରଧାନମନ୍ତ୍ରୀ କହିଛନ୍ତି ଯେ, ବିକଶିତ ଭାରତ ଆମର ଲକ୍ଷ୍ୟ ଏବଂ ବିକଶିତ ଭାରତ ଓ ବିକଶିତ ଓଡ଼ିଶାରେ ଶିଳ୍ପର ଗୁରୁତ୍ବପୂର୍ଣ୍ଣ ଭୂମିକା ରହିଛି।
ଭବାନୀପାଟଣା ବିଧାୟକ ସାଗର ଚରଣ ଦାସ ସ୍ଥାନୀୟ ଲୋକଙ୍କ ଆବେଦନକୁ ଗ୍ରହଣ କରିବା ସହ କହିଥିଲେ, ଜନସାଧାରଣ ଯାହା ନିଷ୍ପତ୍ତି ନେବେ, ଆମେ ସେମାନଙ୍କ ସହ ରହିବୁ ଏବଂ ସମର୍ଥନ କରିବୁ।
ପ୍ରତିନିଧି ଦଳ ୨୦୦୩ ମସିହାରେ ଲାଞ୍ଜିଗଡ଼ରେ ଆଲୁମିନା ରିଫାଇନାରୀ ପ୍ରତିଷ୍ଠାକୁ ଅଂଚଳର ବିକାଶ ଯାତ୍ରାରେ ଏକ ଗୁରୁତ୍ଵପୂର୍ଣ ମୁହୂର୍ତ୍ତ ଭାବରେ ଉଲ୍ଲେଖ କରିଥିଲେ। ଏହାର ପ୍ରତିଷ୍ଠା ପରଠାରୁ ଏହା ହଜାର ହଜାର ପରିବାର, ବିଶେଷକରି ଡଙ୍ଗରିଆ ଓ କୁଟିଆ କନ୍ଧ ସମ୍ପ୍ରଦାୟର ଲୋକଙ୍କ ପାଇଁ ଏକ ଆର୍ଥିକ ଜୀବନରେଖା ଭାବରେ କାର୍ଯ୍ୟ କରିଛି। ଏହି ରିଫାଇନାରୀ ସମଗ୍ର ଅଂଚଳରେ ଭିତ୍ତିଭୂମି ଉନ୍ନତି ଓ ଆର୍ଥିକ ଅନ୍ତର୍ଭୂକ୍ତିକରଣକୁ ପ୍ରୋତ୍ସାହିତ କରିଛି।
ବିଧାୟକ ପ୍ରଦୀପ କୁମାର ଦିଶାରୀଙ୍କୁ ଲେଖିଥିବା ଏକ ଚିଠିରେ ଶ୍ରୀଧର ପେସନିଆ ଉଲ୍ଲେଖ କରିଛନ୍ତି, ଲାଞ୍ଜିଗଡ଼ର ଆଲୁମିନା ରିଫାଇନାରୀ ଆମର ସ୍ଥାନୀୟ ଅର୍ଥନୀତିର ମେରୁଦଣ୍ଡ ଭାବରେ ଠିଆ ହୋଇଛି। ଗ୍ରାମସଭାର ସକ୍ରିୟ ଅଂଶଗ୍ରହଣ ସହିତ ଏହାର ବିସ୍ତାର ଦ୍ୱାରା କେବଳ ଜୀବନଜୀବିକାରେ ଉନ୍ନତି ଆସିବ ନାହିଁ ବରଂ ସମଗ୍ର ଓଡ଼ିଶାର ସ୍ଥାୟୀ ଅଭିବୃଦ୍ଧି ମଧ୍ୟ ହୋଇପାରିବ।
ନେତାମାନେ ଗୁରୁତ୍ୱାରୋପ କରିଥିଲେ ଯେ, ଏହି ଦୃଷ୍ଟିକୋଣକୁ ସାକାର କରିବା ପାଇଁ ରାଜ୍ୟ ସରକାରଙ୍କ ସକ୍ରିୟ ସମର୍ଥନ ଅତ୍ୟନ୍ତ ଜରୁରୀ। ସେମାନେ ଗ୍ରାମସଭା ପ୍ରକ୍ରିୟାକୁ ଦ୍ରୁତ ଓ ସ୍ବଚ୍ଛ ଭାବେ ଆରମ୍ଭ କରିବାକୁ ସରକାରଙ୍କୁ ଅନୁରୋଧ କରିଥିଲେ, ଯଦ୍ଵାରା ଆଦିବାସୀଙ୍କ ଅଧିକାରକୁ ସୁରକ୍ଷା ଦେବା ସହିତ ଖଣି କାର୍ଯ୍ୟକଳାପ ସର୍ବୋଚ୍ଚ ପରିବେଶଗତ ଓ ସମାଜିକ ମାନଦଣ୍ଡ ସହ ସମ୍ପାଦିତ ହୋଇପାରିବ।
ଏହି ଆବେଦନ ‘ମେକ୍ ଇନ୍ ଓଡ଼ିଶା’ ଦୃଷ୍ଟିକୋଣ ଅଧୀନରେ ରାଜ୍ୟର ବିକାଶମୂଳକ ପ୍ରାଥମିକତା ଓ ନିବେଶ ନୀତି ମାଧ୍ୟମରେ ପଛୁଆ ଅଂଚଳଗୁଡ଼ିକର ଉନ୍ନତି ଉପରେ ଧ୍ୟାନ କେନ୍ଦ୍ରିତ କରିଛି।
ପ୍ରତିନିଧି ଦଳ ଆଶା ପ୍ରକାଶ କରିଥିଲେ ଯେ, ଲାଞ୍ଜିଗଡ଼ ଖଣିଜ-ନେତୃତ୍ୱାଧୀନ, ଗୋଷ୍ଠୀଚାଳିତ ବିକାଶ ପାଇଁ ଏକ ମଡେଲ ହୋଇପାରିବ, ଯାହା ଭାରତର ଅନ୍ୟ ଅଂଚଳ ପାଇଁ ଏକ ମାନଦଣ୍ଡ ସ୍ଥାପନ କରିବ। ଲାଞ୍ଜିଗଡ଼ ଆଂଚଳିକ ବିକାଶ ପରିଷଦ ଓଡ଼ିଶାର ଖଣିଜ ସମ୍ପଦକୁ ଦୀର୍ଘକାଳୀନ ସାମାଜିକ-ଆର୍ଥିକ ପ୍ରଗତିରେ ପରିଣତ କରିବା ପାଇଁ ସରକାର, ଶିଳ୍ପ ଓ ଜନସାଧାରଣଙ୍କ ସହ ସମନ୍ୱୟ ଜାରି ରଖିବା ପାଇଁ ନିଜ ପ୍ରତିବଦ୍ଧତାକୁ ଦୋହରାଇଛି।
