ଫାଇନାନ୍ସ କମ୍ପାନୀର ଋଣ ଅସୁଲ ଉପରେ ପ୍ରଶାସନିକ କଟକଣା ଲଗାଇବାକୁ ନିବେଦନ କଲେ ମହିଳା

କୋକସରା,୪/୬: କରୋନା ମହାମାରୀ ଯୋଗୁଁ ସାରାଦେଶ ଲକ ଡାଉନ ହେବା ପରେ ବିଭିନ୍ନ ବର୍ଗ ର ଲୋକଙ୍କ ଆର୍ଥିକ ମେରୁଦଣ୍ଡ ଭାଙ୍ଗିପଡିଛି । ଏହି ସମୟରେ ଆରବିଆଇଙ୍କ ନିର୍ଦ୍ଦେଶ ଅନୁସାରେ ବିଭିନ୍ନ ସଂସ୍ଥାରୁ ଋଣ ନେଇଥିବା ଲୋକଙ୍କୁ ଇଏମଆଇ ଦେବାରେ ଅଗଷ୍ଟ ମାସ ପର୍ଯ୍ୟନ୍ତ ଇଛାଧିନ କରିଛନ୍ତି । କିନ୍ତୁ ବିଭିନ୍ନ ଫାଇନାନ୍ସ କମ୍ପାନୀର କର୍ମଚାରୀ ମାନେ କିସ୍ତି ଭରିବାକୁ ମହିଳା ମାନଙ୍କୁ ଚାପ ପ୍ରୟୋଗ କରୁଥିବା ଅଭିଯୋଗ ଆସିଛି ।

ସୂଚନା ଅନୁସାରେ କୋକସରା ଗ୍ରାମ ବଡପଡାର ପ୍ରାୟ ୩୦ରୁ ଉର୍ଦ୍ଧ ମହିଳା ଅନେକ ଅର୍ଥ ଲଗାଣକାରି କମ୍ପାନୀରୁ ଛୋଟ ମୋଟ ବ୍ୟବସାୟ ପାଇଁ ଋଣ ଆଣିଥିଲେ । ଏମାନେ ପୂର୍ବରୁ ନିର୍ଦ୍ଧାରିତ ସମୟରେ ଋଣ ପରିଶୋଧ କରି ଆସୁଥିଲେ, ତେବେ ଲକଡାଉନ ଯୋଗୁ ଏହି ଗରିବ ଶ୍ରେଣୀର ମହିଳା ମାନେ ରୋଜଗାର ହରାଇ ଏବେ ଘରେ ବସି ରହିଛନ୍ତି । କିଏ ଚୁଡି ବିକି ତ କିଏ ଫେନ୍ସି ସାମାନ ତ ଆଉ କିଏ ଜଳଖିଆ ଦୋକାନ ଟିଏ ଦେଇ ପରିବାର ପ୍ରତିପୋଷଣ କରିବା ସହ ଋଣ କିସ୍ତି ପରିଶୋଧ କରୁଥିଲେ । ଏବେ କମ୍ପାନୀ କର୍ମଚାରୀ ମହାଜନୀ କାରବାର ପରି ଋଣ ପରିଶୋଧ କରିବାକୁ ଚାପ ପ୍ରୟୋଗକୁ ନେଇ ମାନସିକ ସ୍ତରରେ ମହିଳା ମାନେ ଚାପଗ୍ରସ୍ତ ହୋଇ ପଡିଛନ୍ତି ।

ଲକଡାଉନକୁ ନେଇ ରାଜ୍ୟ ସରକାର ବ୍ୟାଙ୍କ ଓ ବିଭିନ୍ନ ଅର୍ଥ ଲଗାଣ କାରୀ ସଂସ୍ଥାକୁ ଋଣ ପରିଶୋଧ ଅବଧିରେ ରିହାତି ଦେବାକୁ ଘୋଷଣା କରିଥିଲେ ମଧ୍ୟ ଫାଇନାନ୍ସ କମ୍ପାନୀ କର୍ମଚାରୀ ମାନେ ମାନୁ ନାହାଁନ୍ତି ଏପରି ସମୟରେ ମହିଳା ମାନେ ଋଣ ଅବଧି ବଢ଼ାଇବକୁ ଓ ଋଣ ପରିଶୋଧ କରିବାକୁ ସମୟ ଦେବାକୁ କୋକସରା ବଡପଡାର ଫୁଲତୋଳା ଖମାରି, ମମତା ନାଏକ, ରଶ୍ମିତା ଶଗଡିଆ, ପ୍ରମିଳା ବାଗ, ରେଖା ନାଏକ, ରାଣୀ ବାଗ, ରାଏବତୀ ଖମାରି, ପୁଷ୍ପାଞ୍ଜଳି ନିଆଲ ପ୍ରମୁଖ ମହିଳା ମାନେ ଦାବି କରିଛନ୍ତି । କରୋନା ଓ ଲକଡାଉନର ଏହି ସଂକଟମୟ ସ୍ଥିତିରେ ଜିଲ୍ଲା ପ୍ରଶାସନ ଫାଇନାନ୍ସ କମ୍ପାନୀର ଋଣ ଅସୁଲ ଉପରେ କଟକଣା ଲଗାଇବାକୁ ଗଣମାଧ୍ୟମ ମାଧ୍ୟମରେ ନିବେଦନ କରିଛନ୍ତି ।