ନର୍ଲା ମୁଖ୍ୟ ରାସ୍ତାରେ ଗୋରୁପଲଙ୍କ ଭିଡ, ଅଣାୟତ୍ତ ଟ୍ରାଫିକ ସମସ୍ୟା

● ନିଜ ଗାଈଗୋରୁଙ୍କୁ ଆୟତ୍ତରେ ରଖିବା ପାଇଁ ସରପଞ୍ଚଙ୍କ ଅନୁରୋଧ

କଳାହାଣ୍ଡି, ୫|୯ (ଲିଙ୍ଗରାଜ ମିଶ୍ର): ନର୍ଲା ବସଷ୍ଟାଣ୍ଡ ମୁଖ୍ୟ ବଜାର ଏବେ ବ୍ୟସ୍ତ ବହୁଳ । ନର୍ଲା ଦେଇ ଭବାନୀପାଟଣା ଭୁବନେଶ୍ୱର ରାଜ୍ୟ ରାଜପଥ ଯାଇଥିବା ବେଳେ ମୁଖ୍ୟ ରାସ୍ତା ଉପରେ ଥାନା ସମ୍ମୁଖ, ବସଷ୍ଟାଣ୍ଡ ଓ ବ୍ଲକ୍ ସମ୍ମୁଖରେ ପ୍ରତ୍ୟହ ଗାଇ, ଗୋରୁଙ୍କ ଭିଡ ପରିଲକ୍ଷିତ ହେଉଛି । ସହଯେତ ନର୍ଲା ବସଷ୍ଟାଣ୍ଡ ଠାରେ ନର୍ଲା ମୁଖ୍ୟ ବଜାର ଓ କମ୍ପ୍ଲେକ୍ସ ସବୁ ରହିଥିବା ବେଳେ ବିଭିନ୍ନ ସାମଗ୍ରୀର ଉଠା ଦୋକାନୀ, ଫଳ ବ୍ୟବସାୟୀଙ୍କ ଭିଡ ସାଙ୍ଗକୁ ଚା, ପାନ ଜଳଖିଆ ଦୋକାନ ସବୁ ରହିଛି । ସଂଧ୍ୟା ୫ ଘଣ୍ଟା ସମୟରୁ ନର୍ଲା ବସଷ୍ଟାଣ୍ଡ ମାର୍କେଟରେ ପ୍ରବଳ ଜନଗହଳି ପରିଲକ୍ଷିତ ହୋଇଥାଏ । ବିଭିନ୍ନ ଦ୍ରବ୍ୟର ବଜାର ପାଇଁ ଆସିଥିବା ଗ୍ରାହକଙ୍କ ଦୁଇ ଚକିଆ ଓ ଚାରି ଚକିଆ ଯାନ ବାହନ ର ପାର୍କିଂ ଯୋଗୁଁ ରାସ୍ତା ଦୁଇକଡ ଜାମ୍ ରହୁଥିବା ବେଳେ ଅଟୋରିକ୍ସା ଏବଂ ଚାରି ଚକିଆ ଭଡାଗାଡି ସବୁ ମଧ୍ୟ ପାର୍କିଂ କରିଥାନ୍ତି ଏହି ବଜାର ସମ୍ମୁଖରେ । ଏ ସବୁକୁ ନେଇ ଯାହା ଭିଡ ରହିଥାଏ । ଫଳରେ ଟ୍ରାଫିକ ସମସ୍ୟା ଉପୁଜୁଥିବା ବେଳେ ମୁଖ୍ୟ ସଡକ ବସଷ୍ଟାଣ୍ଡ ରେ ବୁଲା ଗାଇ, ଗୋରୁଙ୍କ ଭିଡ ଟ୍ରାଫିକ ସମସ୍ୟାକୁ ଦ୍ୱିଗୁଣିତ କରୁଛି । ଆଗରୁ ବୁଲା ଗୋରୁଙ୍କୁ ଆୟତଃ କରି ଗୋରୁ ମାଲିକଙ୍କୁ ଏ ନେଇ ଜୋରିମାନା ର ବ୍ୟବସ୍ଥା କରାଯାଉଥିଲା । ଏବେ ଏସବୁ ବ୍ୟବସ୍ଥା ଉଚ୍ଛେଦ ହୋଇଯାଇଥିବାରୁ ଗୋରୁ ମାଲିକ ମାନେ ମଧ୍ୟ ନିଜ ଗୋରୁ ସବୁଙ୍କୁ ଖୋଲା ଛାଡିଦେଇ ବିନ୍ଦାସରେ ରହୁଛନ୍ତି ।

ମୁଖ୍ୟ ରାସ୍ତାରେ ବୁଲା ଗାଇ, ଗୋରୁଙ୍କ ଭିଡ ଯୋଗୁଁ ଉପୁଜୁଥିବା ଟ୍ରାଫିକ ସମସ୍ୟା ବିଷୟରେ ନର୍ଲା ସରପଞ୍ଚ ତଥା ବ୍ଲକ ସରପଞ୍ଚ ସଂଘ ସଭାପତି ଚିରଞ୍ଜିବୀ ଗୌଡିଆଙ୍କ ମତାମତ ନେବାରୁ ସେ କହିଲେ ଏସବୁର ତୁରନ୍ତ ସମାଧାନ କରାଯିବ । ମୁଁ ମଧ୍ୟ ଏ ନେଇ ନିଷ୍ପତି ନେଇ ସାରିଛି । ଗୋରୁ ସବୁ ଯାହାର ବି ହୋଇଥାଉନଉ କାହିଁକି ଏଣୁ ଏଣିକି ନିଜ ନିଜ ଗୋରୁଙ୍କୁ ଆୟତ୍ତ କରିବା ପାଇଁ ଗୋରୁ ମାଲିକ ମାନେ ଯଦି ସଜାଗ୍ ନହେବେ ତାହେଲେ ସେମାନଙ୍କୁ ଏଣିକି ଜୋରିମାନା ଭରି ସେମାନଙ୍କ ଗୋରୁ ସବୁକୁ ମୁକୁଳାଇବାକୁ ପଡିବ । ମୁଖ୍ୟ ରାସ୍ତା ଉପରେ ଦିନ ରାତି ବୁଲୁଥିବା ଗୋରୁ ମାନଙ୍କ ମାଲିକ ମାନଙ୍କୁ ଅନୁରୋଦ କରୁଛି ନିଜ ନିଜ ଗାଇ, ଗୋରୁଙ୍କୁ ଗୁହାଳରେ ବାନ୍ଧିକି ରଖନ୍ତୁ । ନହେଲେ ଖୁବ୍ ଶୀଘ୍ର ଏହାର ବିକଳ୍ପ ବ୍ୟବସ୍ଥା କରିବାକୁ ବାଧ୍ୟ ହେବୁ ବୋଲି ନର୍ଲା ସରପଞ୍ଚ ଶ୍ରୀ ଗୌଡିଆ ସୂଚନା ଦେଇଛନ୍ତି ।