ନର୍ଲାରୋଡ ରେଳଯାତ୍ରୀ ସୁରକ୍ଷା ସମିତି ପକ୍ଷରୁ କ୍ଷୋଭ ବ୍ୟକ୍ତ
ଓଡିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ନର୍ଲା ବ୍ଲକ୍ ଅଧିନସ୍ଥ ନର୍ଲାରୋଡ ରେଳ ଷ୍ଟେସନରେ ଗତ ଦୁଇ ବର୍ଷ ହୋଇଗଲା ଉନ୍ନୟନ କାର୍ଯ୍ୟ ଚାଲି ଆସୁଛି । ପ୍ଲାଟଫର୍ମର ଉନ୍ନତି କରଣ ସରିଯାଇଥିବା ବେଳେ ନୂଆ ଷ୍ଟେସନ ଭବନ ନିର୍ମାଣ କାର୍ଯ୍ୟ ମଧ୍ୟ ସରିଯାଇଛି ହେଲେ ଏହା କାର୍ଯ୍ୟକ୍ଷମ ହୋଇ ପାରୁନି । ଅନ୍ୟପକ୍ଷେ ନବ ନିର୍ମିତ ଷ୍ଟେସନ ଭବନ କାର୍ଯ୍ୟକ୍ଷମ ହେବା ପୂର୍ବରୁ ଫ୍ଲୋରିଙ୍ଗ୍ ଭାଙ୍ଗିବା ମଧ୍ୟ ଆରମ୍ଭ ହୋଇଗଲାଣି । ତୃତୀୟ ପ୍ଲାଟଫର୍ମ ଆଗରୁ ରହିଥିଲା । ଇତି ମଧ୍ୟରେ ପ୍ରଥମ, ଦ୍ୱିତୀୟ ଓ ତୃତୀୟ ପ୍ଲାଟଫର୍ମର ଉନ୍ନତି କରଣ କରାଯାଇଛି । ଷ୍ଟେସନ ଆରପଟେ ରହିଥିବା ଷ୍ଟାଫ କ୍ୱାଟର୍ସ ଗୁଡିକ ଭଙ୍ଗାଯାଇ ଚତୁର୍ଥ ପ୍ଲାଟଫର୍ମ ନିର୍ମିତ ହୋଇସାରିଛି । ବିଶାଖାପାଟନମରୁ ରାୟପୁର ପର୍ଯ୍ୟନ୍ତ ତୃତୀୟ ରେଳ ଲାଇନ କାର୍ଯ୍ୟ ମଧ୍ୟ ପ୍ରାୟ ସମ୍ପୂର୍ଣ୍ଣ ହୋଇସାରିଛି । ହେଲେ ଗତ ଦୁଇ ମାସ ତଳେ ପ୍ରଥମ ପ୍ଲାଟଫର୍ମ ପୁରୁଣା ଷ୍ଟେସନ ଭବନ ପାର୍ଶ୍ୱରେ ରହିଥିବା ସେଡକୁ ଭାଙ୍ଗି ଦିଆଗଲା । ଗ୍ରୀଷ୍ମ ଦିନରେ ରେଳଯାତ୍ରୀ ମାନେ ଖରାରେ ନାହିଁ ନଥିବା ଅସୁବିଧା ଭୋଗିଥିଲେ । ଗତ ଦେଢ ମାସ ତଳେ ପୁରୁଣା ଷ୍ଟେସନ ଭବନର ବାମ ପାର୍ଶ୍ୱରେ ଓ ନବ ନିର୍ମିତ ଷ୍ଟେସନ ଭବନର ସମ୍ମୁଖରେ ନୂଆ ସେଡ ନିର୍ମାଣ କାର୍ଯ୍ୟ ଚାଲିଛି । ଯାହା ଅଦ୍ୟାବଧି ସମ୍ପୂର୍ଣ୍ଣ ହୋଇ ପାରିନାହିଁ । ଏବେ ବର୍ଷା ଦିନରେ ବିଭିନ୍ନ ସ୍ଥାନକୁ ଯାତ୍ରା ପାଇଁ ଟ୍ରେନକୁ ଅପେକ୍ଷାରତ ରେଳଯାତ୍ରୀ ମାନେ ବର୍ଷାରେ ନାହିଁ ନଥିବା ଅସୁବିଧା ଭୋଗୁଥିବା ଦେଖିବାକୁ ମିଳୁଛି । ଯାହାକୁ ନେଇ ଯାତ୍ରୀ ମାନେ ତୀବ୍ର ଅସନ୍ତୋଷ ପ୍ରକାଶ କରିଥିବା ବେଳେ ଏହାକୁ ନେଇ ନର୍ଲାରୋଡ ରେଳଯାତ୍ରୀ ସୁରକ୍ଷା ସମିତିର ସଭାପତି ତଥା କଳାହାଣ୍ଡି ସାଂସଦଙ୍କ ନର୍ଲା ପ୍ରତିନିଧି ପ୍ରଦୀପ କୁମାର ନାଏକ, ନର୍ଲାରୋଡ ରେଳଯାତ୍ରୀ ସୁରକ୍ଷା ସମିତିର ବରିଷ୍ଠ ସଦସ୍ୟ ରାମଚନ୍ଦ୍ର ପରିଡା. ହମେଶ କୁମାର ଜୈନ ପ୍ରମୁଖ ତାଙ୍କ ପ୍ରତିକ୍ରୀୟାରେ ଅସନ୍ତୋଷ ବ୍ୟକ୍ତ କରିବା ସହ ସମ୍ପୃକ୍ତ ଠିକା କମ୍ପାନୀ ଟିଟିଆଇପିଏଲ୍ ର ଏହି ମନ୍ଥର ଗତି କାର୍ଯ୍ୟ ଶୈଳୀକୁ ନେଇ ପ୍ରଶ୍ନ କରିଛନ୍ତି । ଏଠାରେ ପ୍ରକାଶ ଯୋଗ୍ୟ ଯେ, ନର୍ଲାରୋଡ ଷ୍ଟେସନରେ ସେଡ୍ ନିର୍ମାଣ କାର୍ଯ୍ୟ ଟିଟିଆଇପିଏଲ୍ କମ୍ପାନୀ ଠାରୁ ହାଇଦ୍ରାବାଦର ଜଣେ କଣ୍ଟ୍ରାକ୍ଟର ପେଟି ରେ ନେଇ କାମ କରୁଥିବା ଜଣାପଡିଛି । ନର୍ଲାରୋଡ ରେଳଯାତ୍ରୀ ସୁରକ୍ଷା ସମିତିର କର୍ମକର୍ତ୍ତା ମାନେ ଏହାକୁ ନେଇ କ୍ଷୋଭ ବ୍ୟକ୍ତ କରିବା ସହ ସେଡ ଶ୍ରୀଘ୍ର ନିର୍ମାଣ ପ୍ରତି ରେଳବାଇ ଜିଏମ୍ ତୁରନ୍ତ ଦୃଷ୍ଟି ଦିଅନ୍ତୁ ବୋଲି ଦାବୀ କରିଛନ୍ତି ।
