ରାୟଗଡ,୧/୫ : ଆଜି ସାମୁଦ୍ରିକ ବାତ୍ୟା “ଫୋନି”ଓଡିଶା ଉପକୂଳରେ ସ୍ଥଳଭାଗକୁ ଛୁଇଁବା ପରେ ଏହାର ପ୍ରଭାବରେ ରାୟଗଡ ଜିଲ୍ଳାରେ ବୁଧବାର ଅପରାହ୍ନରୁ ପାଣିପାଗ ବଦଳି ଥିବା ଦେଖିବାକୁ ମିଳିଛି । ପବନର ବେଗ ଧୀରେ ଧୀରେ ବଢିବାରେ ଲାଗିଛି । ଭାରତୀୟ ପାଣିପାଗ ବିଭାଗ (ଆଇଏମଡି) ପକ୍ଷରୁ ସାମୁଦ୍ରିକ ଝଡବାତ୍ୟା “ଫୋନି”କୁ ନେଇ ଜାରି କରାଯାଇଥିବା ସତର୍କ ସୂଚନାରେ ରାୟଗଡ ଜିଲ୍ଳାକୁ କମଳା ରଙ୍ଗ ବିପଦ ସଙ୍କେତରେ ଆଲର୍ଟ କରାଯାଇଛି । ଏହାକୁ ଦୃଷ୍ଟିରେ ରଖି ରାୟଗଡ ଜିଲ୍ଳା ପ୍ରଶାସନ ତରଫରୁ ଏହାର ମୁକାବିଲା ନେଇ ବ୍ୟାପକ ପ୍ରସ୍ତୁତି ଆରମ୍ଭ କରାଯାଇଛି ।
ଜିଲ୍ଳାପାଳଙ୍କ ଅଧ୍ୟକ୍ଷତାରେ ଗତ ୨୯ତାରିଖରେ ପ୍ରଥମ ବୈଠକ ଅନୁଷ୍ଠିତ ହୋଇଯାଇଥିବା ବେଳେ ବୁଧବାର ଦିନ ଜିଲ୍ଳାପାଳଙ୍କ କାର୍ଯ୍ୟାଳୟର ଚିନ୍ତନ କକ୍ଷରେ ଦ୍ୱିତୀୟ ବୈଠକ ଅନୁଷ୍ଠିତ ହୋଇଯାଇଛି । ରାୟଗଡ ଜିଲ୍ଳାପାଳ ପ୍ରମୋଦ କୁମାର ବେହେରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଅତିରିକ୍ତ ଜିଲ୍ଳାପାଳ ସୁଧାକର ଶବର, ପିଡି-ଡିଆରଡିଏ ପ୍ରକଳ୍ପ ନିର୍ଦ୍ଦେଶକ ଅମ୍ରିତ ଋତୁରାଜ, ଉପଜିଲ୍ଳାପାଳ ପ୍ରତାପ ଚନ୍ଦ୍ର ପ୍ରଧାନଙ୍କ ସମେତ ଜିଲ୍ଳାସ୍ତରୀୟ ସମସ୍ତ ବିଭାଗର ଅଧିକାରୀମାନେ ଉପସ୍ଥିତ ରହିଥିଲେ । ତିତଲି ବାତ୍ୟାକୁ ମୁକାବିଲା କରି ଯେଉଁ ଅନୁଭୂତି ରହିଥିଲା ସେହି ଅନୁଭୂତିକୁ ପୁଣି ଥରେ ଫୋନି ବାତ୍ୟାରେ ଉପଯୋଗ କରି ଏହାର ମୁକାବିଲା କରିବା ପାଇଁ ତତ୍ପର ହୋଇପଡିଛନ୍ତି ସରକାରୀ କଳର ସମସ୍ତ କର୍ମଚାରୀ । ରାୟଗଡ ଜିଲ୍ଳାରେ ଥିବା ସଦର ବ୍ଳକର ଶେଷଖାଲ, ବିଷମକଟକର କୁଟ୍ରାଗଡ ଓ ଗୁଣପୁରର ବିକ୍ରମପୁରରେ ଥିବା ୩ଟି ସ୍ଥାୟୀ ଆଶ୍ରୟ ସ୍ଥଳୀ ସମେତ ଅନ୍ୟାନ୍ୟ ବ୍ଳକର ବିଭିନ୍ନ ସ୍କୁଲ ଓ ଅଙ୍ଗନୱାଡି କେନ୍ଦ୍ରଗୁଡିକରେ ୧୧୭ଟି ଅସ୍ଥାୟୀ ବାତ୍ୟା ଆଶ୍ରୟସ୍ଥଳୀ ଚିହ୍ନଟ କରାଯାଇଥିଲେ ମଧ୍ୟ ଯେଉଁମାନଙ୍କର କଚ୍ଚାଘର ଥିବା ସେମାନଙ୍କୁ ଆବଶ୍ୟକସ୍ଥଳେ ନିକଟରେ ଥିବା ସୁରକ୍ଷିତ ପକ୍କାଘରେ ମଧ୍ୟ ଲୋକଙ୍କୁ ସ୍ଥାନାନ୍ତର କରାଯିବା ନିମେନ୍ତ ପ୍ରାଥମିକତା ଦିଆଯିବାର ବ୍ୟବସ୍ଥା କରାଯାଇଛି ।
ଜିଲ୍ଳା ଯୋଗାଣ ବିଭାଗ ପକ୍ଷରୁ ଆଶ୍ରୟସ୍ଥଳୀ ଗୁଡିକରେ ଶୁଖିଲା ଖାଦ୍ୟ ଯୋଗାଇବାକୁ ନିର୍ଦ୍ଦେଶ ଦିଆଯାଇଥିବା ବେଳେ ରନ୍ଧା ଖାଦ୍ୟ ନିମନ୍ତେ ରୋଷେଇ ଆରମ୍ଭ କରିବା ପାଇଁ ଜିଲ୍ଳା ଶିକ୍ଷାଧିକାରୀ, ଜିଲ୍ଳା ମଙ୍ଗଳ ଅଧିକାରୀ , ସର୍ବଶିକ୍ଷା ଅଭିଯାନ ବିଭାଗକୁ ନିର୍ଦ୍ଦେଶ ଦିଆଯାଇଛି । ସେହିପରି ସ୍ୱାସ୍ଥ୍ୟ ବିଭାଗ ପକ୍ଷରୁ ଜରୁରୀକାଳୀନ ଔଷଧପତ୍ର , ଜନସ୍ୱାସ୍ଥ୍ୟ ଓ ଗ୍ରାମ୍ୟ ଜଳ ଯୋଗାଣ ବିଭାଗକୁ ପାନୀୟ ଜଳ ଯୋଗାଣ ଓ ବର୍ଷା ପାଣିକୁ ନିର୍ଗତ କରିବା ପାଇଁ ବାତ୍ୟା ପରିବର୍ତୀ ସମୟରେ ହାଇପାୱାର ଜେନେରେଟର ବ୍ୟବହାର କରିବା ପାଇଁ ନିର୍ଦ୍ଦେଶ ଦିଆଯାଇଛି । ଜରୁରୀକାଳନୀ ସମୟରେ ତଥା ବାତ୍ୟା ପରବର୍ତୀ ସମୟରେ ରାସ୍ତାଘାଟରେ ପଡି ରହିଥିବା ଗଛଗୁଡିକକୁ କାଟିବା ପାଇଁ ଅଗ୍ନିଶମ ବିଭାଗର ୧୩ଟି ଟ୍ରି କଟ୍ଟର ଉପଲବ୍ଧ ଥିବାରୁ ରାସ୍ତାଘାଟରେ ଯାତାୟାତରେ ବାଧାପ୍ରାପ୍ତ ହେବ ନାହିଁ ବୋଲି ଜିଲ୍ଳାପାଳ ଶ୍ରୀ ବେହେରା ସୂଚନା ଦେଇଛନ୍ତି । ସେହିପରି ବାତ୍ୟାକୁ ଦୃଷ୍ଟିରେ ରଖି ସମସ୍ତ ବ୍ୟବସ୍ଥାକୁ ତଦାରଖ କରିବା ପାଇଁ ପଂଚାୟତ ସ୍ତରରେ ନୋଡାଲ ଅଧିକାରୀମାନଙ୍କୁ ନିୟୋଜିତ କରାଯାଇଥିବା ଜଣାପଡିଛି । ବାତ୍ୟା ସମୟରେ ସଚେତନ ହୋଇ ନିଜକୁ ସୁରକ୍ଷିତ ରଖିବା ପାଇଁ ଲୋକମାନଙ୍କୁ ପରାମର୍ଶ ଦିଆଯିବା ସହ ପଶୁ ସଂପଦଗୁଡିକୁ ମଧ୍ୟ ସୁରକ୍ଷିତ ସ୍ଥାନରେ ରଖିବା ପାଇଁ କୁହାଯାଇଛି । ସେହିପରି ଷ୍ଟ୍ରଙ୍ଗରୁମରେ ଥିବା ଇଭିଏମଗୁଡିକକୁ ଆବଶ୍ୟକ ସ୍ଥଳରେ ସ୍ଥାନାନ୍ତର ପାଇଁ ସମସ୍ତ ରାଜନୈତିିକ ଦଳର ପ୍ରତିନିଧିଙ୍କ ଉପସ୍ଥିତରେ ପଦକ୍ଷେପ ନିଆଯିବାର ବ୍ୟବସ୍ଥା କରାଯିବାକୁ ଥିବା ବେଳେ ଷ୍ଟ୍ରଙ୍ଗରୁମଗୁଡିକରେ ପାଣି ନ ପଶିବା ପାଇଁ ଯଥାସମ୍ଭବ ବ୍ୟବସ୍ଥା କରାଯାଇଥିବା ଜିଲ୍ଳାପାଳ କହିଛନ୍ତି । ଧାନଖଳାରେ ଅମଳ ହୋଇ ପଡିରହିଥିବା ଧାନଗୁଡିକକୁ ସୁରକ୍ଷିତ ସ୍ଥାନରେ ରଖିବା ପାଇଁ ଚାଷୀମାନଙ୍କୁ କୃଷି ବିଭାଗ ପକ୍ଷରୁ ପରାମର୍ଶ ଦିଆଯାଇଥିବା ଜଣାପଡିଛି । ତେବେ ବୁଧବାର ସଂଧ୍ୟା ସୁଦ୍ଧା ସମସ୍ତ ବାତ୍ୟା ଆଶ୍ରୟସ୍ଥଳୀଗୁଡିକରେ ସମସ୍ତ ପ୍ରକାର ସାମଗ୍ରୀଗୁଡିକ ପଂହଚଇବା ସହ ଲୋକଙ୍କୁ ସ୍ଥାନାନ୍ତର କରିବାର ପ୍ରକ୍ରିୟା ଆରମ୍ଭ କରିବାକୁ ଜିଲ୍ଳାପାଳ ଶ୍ରୀ ବେହେରା ନିର୍ଦ୍ଦେଶ ଦେଇଛନ୍ତି ।
ସାମୁଦ୍ରିକ ବାତ୍ୟା”ଫୋନି”କୁ ନେଇ ରାୟଗଡ ଜିଲ୍ଳା ପ୍ରଶାସନର ଜରୁରୀକାଳନୀ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ଜିଲ୍ଳା ଜରୁରୀ ନିୟନ୍ତ୍ରଣ କେନ୍ଦ୍ର ଠାରେ ୨୪ଘଂଟିଆ ହେଲପ୍ ଡେସ୍କ ଖୋଲାଯାଇଛି । ଏ ନେଇ କୈାଣସି ଅଭିଯୋଗ ତଥା ତଥ୍ୟ ଜାଣିବା ପାଇଁ ୦୬୮୫୬-୨୨୪୦୬୨ ଓ ଟୋଲ ଫ୍ରି ନମ୍ବର ୧୦୭୭ରେ ଯୋଗାଯୋଗ କରିବା ପାଇଁ ବ୍ୟବସ୍ଥା କରାଯାଇଥିବା ବେଳେ ପୂର୍ବତଟ ରେଳବାଇ ପକ୍ଷରୁ ରାୟଗଡ ରେଳ ଷ୍ଟେସନ ଠାରେ ମଧ୍ୟ ବିଏସଏନଏଲର ୦୬୮୫୬-୨୨୩୪୦୦/୨୨୩୫୦୦ (ଲ୍ୟାଣ୍ଡଲାଇନ୍ ନମ୍ବର) ଓ ୯୪୩୯୭୪୧୧୮୧ /୯୪୩୯୭୪୧୦୭୧ ଏବଂ ଏୟାରଟେଲ୍ ୭୬୮୧୮୭୮୭୭୭ ଓ ୭୩୨୬୮୧୨୯୮୬ ନମ୍ବରରେ ଯୋଗାଯୋଗ ପାଇଁ ଏକ ହେଲପ ଡେସ୍କ ଖୋଲାଯାଇଛି । ତେବେ ଖବର ଲେଖାସୁଦ୍ଧା ରାୟଗଡ ଦେଇ ଯାଉଥିବା କୈାଣସି ଟ୍ରେନର ବାତିଲ ସଂପର୍କରେ ସୂଚନା ମିଳି ନ ଥିବା ଷ୍ଟେସନ ମ୍ୟାଜେନରଙ୍କ ଠାରୁ ସୂଚନା ମିଳିଥିଲା ।
ସ୍ବତନ୍ତ୍ର ପ୍ରତିନିଧି ଶିବ ନାରାୟଣ ଗୌଡଙ୍କ ରିପୋର୍ଟ odiabarta.in
For latest news & updates, click on bell button and subscribe to notifications.
Like us on Facebook👇
Subscribe us on Youtube👇
Join our whatsapp group👇
