ଓଡ଼ିଆ ବାର୍ତ୍ତା/ କଟକ: ଚଳିତ ବର୍ଷ ଦଶମ ଶ୍ରେଣୀ ପରୀକ୍ଷାରେ ୫୬୬ ନମ୍ବର ରଖି ଏ-୧ ଗ୍ରେଡରେ ଉତ୍ତୀର୍ଣ୍ଣ ହେଇଥିବା ଓମପ୍ରଭା ସାହୁଙ୍କୁ କଟକ ଜିଲ୍ଲାର ଅଗ୍ରଣୀ ଅନୁଷ୍ଠାନ ଆମେ ଓଡ଼ିଆ ଭାରି ବଢିଆ ପରିବାର ପକ୍ଷରୁ ‘ଆମେ ଓଡ଼ିଆ ଶିକ୍ଷାଜ୍ୟୋତି ସମ୍ମାନ-୨୦୨୩’ରେ ସମ୍ବର୍ଦ୍ଧିତ କରାଯାଇଛି । କଟକ ଜିଲ୍ଲାର ନିଶ୍ଚିନ୍ତକୋଇଲି ବ୍ଲକ ଈଶାଣୀବ୍ରହ୍ମପୁର ଗ୍ରାମ ପଞ୍ଚାୟତର ଚନ୍ଦ୍ର ଶେଖର ସରକାରୀ ଉଚ୍ଚ ବିଦ୍ୟାଳୟର ଛାତ୍ରୀ ଓମପ୍ରଭା ସାହୁ ସର୍ବାଧିକ ନମ୍ବର ରଖି ବିଦ୍ୟାଳୟରେ ପ୍ରଥମ ସ୍ଥାନ ଅଧିକାର କରିବା ସହିତ ବ୍ଲକ ସ୍ତରରେ ତୃତୀୟ ସ୍ଥାନରେ ରହି ଅଞ୍ଚଳ ପାଇଁ ଗୌରବ ଆଣିଥିବାରୁ ତାଙ୍କୁ ଏହି ମର୍ଯ୍ୟାଦାଜନକ ସମ୍ମାନରେ ସମ୍ମାନିତ କରାଯାଇଥିବା ଜଣାପଡ଼ିଛି । ଏନେଇ ଆୟୋଜିତ ସ୍ବତନ୍ତ୍ର ସମାରୋହରେ ଆମେ ଓଡ଼ିଆ ଭାରି ବଢ଼ିଆ ପରିବାରର ପ୍ରତିଷ୍ଠାତା ଜ୍ୟୋତିର୍ବିଦ ଜଗନ୍ନାଥ ଆଚାର୍ଯ୍ୟ, ସତ୍ୟବ୍ରତ ସାହୁ, ପ୍ରଦ୍ୟୁମ୍ନ ଜେନା ପ୍ରମୁଖ ଉପସ୍ଥିତ ରହି ଓମପ୍ରଭାଙ୍କୁ ଉତ୍ତରୀୟ, ପୁଷ୍ପଗୁଚ୍ଛ, ମାନପତ୍ର ଦେଇ ସମ୍ବର୍ଦ୍ଧନା କରିବା ସହ ଭବିଷ୍ୟତରେ ଦେଶର ନାମ ରଖିବା ସହ ଅଞ୍ଚଳ ପାଇଁ ଗର୍ବ ଆଣିବେ ବୋଲି ପ୍ରେରଣା ଦେଇଥିଲେ ।
