ଆପଲ୍ ସିଇଓ ଟିମ୍ କୁକ୍ ଭାରତର ସ୍ୱିଫ୍ଟ ଷ୍ଟୁଡେଣ୍ଟ ଚ୍ୟାଲେଞ୍ଜ ବିଜେତା ଅସ୍ମି ଜୈନ ସହ ସାକ୍ଷାତ କରିଛନ୍ତି। ଅସ୍ମି ଜୈନ ସ୍ୱାସ୍ଥ୍ୟସେବା ଉପରେ ଏକ ଆପ୍ ପ୍ଲେଗ୍ରାଉଣ୍ଡ ତିଆରି କରି ଡବ୍ଲୁଡବ୍ଲୁଡିସି( WWDC)ପୁରସ୍କାର ଜିତିଛନ୍ତି। ତାଙ୍କୁ ମାତ୍ର ୨୦ ବର୍ଷ ବୟସ। ଅସ୍ମି ଜୈନ ବିଶ୍ୱବ୍ୟାପୀ ବିକାଶକାରୀ ସମ୍ମିଳନୀ (WWDC) ରେ ସ୍ୱିଫ୍ଟ ଷ୍ଟୁଡେଣ୍ଟ ଚ୍ୟାଲେଞ୍ଜର ଅନ୍ୟତମ ବିଜେତା ଅଟନ୍ତି। ସ୍ୱିଫ୍ଟ କୋଡିଂ ଭାଷା ବ୍ୟବହାର କରି ଏକ ଅରିଜିନାଲ ଆପ୍ ପ୍ଲେଗ୍ରାଉଣ୍ଡ ତିଆରି କରିବା ପାଇଁ ବିଶ୍ୱର ସମସ୍ତ ଛାତ୍ରଛାତ୍ରୀଙ୍କ ପାଇଁ ଏକ ଚ୍ୟାଲେଞ୍ଜ ଥିଲା। ଅସ୍ମି ଆଇ ଟ୍ରାକ୍ ଆପ୍ ବିକଶିତ କରିଛନ୍ତି ଯାହା ଉପଭୋକ୍ତାମାନଙ୍କ ଆଖିର ଗତିବିଧିକୁ ଟ୍ରାକ୍ କରିଥାଏ। ଆଖି ଯେତେବେଳେ ସ୍କ୍ରିନରେ ଥିବା ବଲ୍କୁ ଅନୁସରଣ କରେ ସେତେବେଳେ ଆଖିର ମାଂସପେଶୀକୁ ଦୃଢ କରିବାରେ ସାହାଯ୍ୟ କରିଥାଏ ଏହି ଆପ୍। ସେପଟେ ଟିମ୍ କୁକ୍ କହିଛନ୍ତି ଯେ ଭାରତର ଆଇଓଏସ୍ ଡେଭଲପର୍ ଗ୍ରୁପ ତାଙ୍କୁ ଆକର୍ଷିତ କରିଛି। ଜଣେ ୨୦ ବର୍ଷୀୟ ଛାତ୍ରୀ ଅସ୍ମି ଜୈନଙ୍କ କାର୍ଯ୍ୟ ସୃଜନଶୀଳତାର ଏକ ଉଦାହରଣ ଏବଂ ପ୍ରଶଂସା ଯୋଗ୍ୟ। ଟିମ୍ କୁକଙ୍କ ଅନୁଯାୟୀ, ଲୋକଙ୍କୁ ସ୍ୱାସ୍ଥ୍ୟରେ ଉନ୍ନତି ଆଣିବାରେ ସାହାଯ୍ୟ କରିବାକୁ ଅସ୍ମି ଜୈନ ସମ୍ପୂର୍ଣ୍ଣ ଭାବେ ପ୍ରସ୍ତୁତ ଅଛନ୍ତି। କମ୍ପାନୀ ୨୦୨୨ ମସିହାରେ ୩୫୦ ଲୋକଙ୍କୁ ପୁରସ୍କାର ପ୍ରଦାନ କରିଛି, ଯାହା ବର୍ତ୍ତମାନ ଚଳିତ ବର୍ଷ ୩୭୫ କୁ ବୃଦ୍ଧି ପାଇଛି। ଆପଲର SSC ୨୦୨୩ ଚ୍ୟାଲେଞ୍ଜରେ ୩୦ ରୁ ଅଧିକ ଦେଶ ଏବଂ ଅଞ୍ଚଳରୁ ପ୍ରୋଜେକ୍ଟ ଦେଖିଥିଲା। ଏହି କମ୍ପାନୀ ହେଲ୍ଥ କେୟାର, ଖେଳ ଏବଂ ଏଣ୍ଟେର୍ଟେନମେଣ୍ଟ ବିଷୟ ବସ୍ତୁ ଉପରେ ଗୁରୁତ୍ୱ ଦେଇଛି।
