ଓଡ଼ିଆ ବାର୍ତ୍ତା/ କଳାହାଣ୍ଡି (ନିଲେଶ କୁମାର ନାଗ): ଲାଞ୍ଜିଗଡ଼ ବ୍ଲକ ପୋଖରୀବନ୍ଧ ଠାରୁ ଲାଞ୍ଜିଗଡ଼କୁ ସଂଯୋଗ କରୁଥିବା ରାସ୍ତାର ବିଭିନ୍ନ ସ୍ଥାନରେ ରହିଛି ଶୁଖିଲା ଗଛ। ବିପଦସଙ୍କୁଳ ଅବସ୍ଥାରେ ଥିବା ଏହି ଶୁଖିଲା ଗଛଗୁଡ଼ିକ କେତେବେଳେ ଯେ କାହା ଉପରେ ପଡ଼ିବ ତାହା କହିହେବ ନାହିଁ। ଏହି ରାସ୍ତା ଦେଇ ଶତାଧିକ ଯାନବାହାନ ଚଳାଚଳ ସାଙ୍ଗକୁ ସ୍କୁଲ ଓ କଲେଜ ଛାତ୍ରୀଛାତ୍ରମାନେ ଯାତାୟାତ କରୁଛନ୍ତି। ଶୁଖିଲା ଗଛ ଗୁଡ଼ିକ ପବନରେ ଦୋହଲୁଥିବା ବେଳେ କୌଣସି ପରିସ୍ଥିତିରେ ଭାଙ୍ଗିବାର ଯଥେଷ୍ଟ ସମ୍ଭାବନା ରହିଛି। ଫଳରେ ରାସ୍ତାରେ ଯିବା ଆସିବା କରୁଥିବା ଯାନବାହନ, ଛାତ୍ରୀଛାତ୍ର ଓ ବ୍ଲକ ମୁଖ୍ୟଳୟ ବିଶ୍ଵନାଥପୁରକୁ ବିଭିନ୍ନ କାମରେ ଆସୁଥିବା ଜନସାଧାରଣ ବିପଦର ସମ୍ମୁଖୀନ ହେବା ଆଶଙ୍କା ଦେଖାଦେଇଛି। ଗଛଗୁଡ଼ିକୁ କଟାଯିବା ପାଇଁ ବିଭିନ୍ନ ସମୟରେ ଦାବି ହୋଇ ଆସୁଥିଲେ ମଧ୍ୟ ଅଣଦେଖା କରାଯାଉଛି। ଏଣୁ କୌଣସି ଏକ ବଡ଼ ଦୁର୍ଘଟଣା ଅପେକ୍ଷାରେ ପ୍ରଶାସନ ରହିଛି କି ବୋଲି ଆଲୋଚନା ହେଉଛି। ଏବେ ବର୍ଷାପାଣି ପାଇ ଗଛଡାଳ ପଚିଯାଇ ବିଭିନ୍ନ ସମୟରେ ପଡୁଥିବା ବେଳେ ଯଥାଶୀଘ୍ର ଏଥିପ୍ରତି ପୂର୍ତ୍ତ ବିଭାଗ, ବନବିଭାଗ ଏବଂ ପ୍ରଶାସନ ଏଭଳି ଗଛଗୁଡ଼ିକୁ ରାସ୍ତାରୁ ହଟାଇବାକୁ ଅଞ୍ଚଳବାସୀ ଦାବି କରୁଛନ୍ତି।
