ରାୟଗଡ,୨/୪ : ମହାମାରୀ କରୋନା ସଂକ୍ରମଣ ବିପକ୍ଷରେ ଲଢିବା ପାଇଁ ଜେକେ କାଗଜ କଳ ତରଫରୁ ପ୍ରତିଷେଧମୂଳକ ପଦକ୍ଷେପ ଗ୍ରହଣ କରାଯାଇଛି । କମ୍ପାନୀ ପକ୍ଷରୁ ହାଇପୋ ହାଇଡ୍ରୋ କ୍ଳୋରାଇଡ୍ କେମିକଲ ସୋଲୁସନ୍ ଶିଳ୍ପାଂଚଳ ଜେକେପୁର ସହର ମୁଖ୍ୟରାସ୍ତାରେ ସିଂଛନ କରାଯାଇ ସହରବାସୀଙ୍କୁ ସୁରକ୍ଷା ଦିଆଯାଉଛି । ଏହି କେମିକଲ
ସୋଲୁସନ୍ ସିଂଛନ ଦ୍ୱାରା ରାସ୍ତା ଉପରେ ଥିବା ସମସ୍ତ ପ୍ରକାର ବିଷାକ୍ତ ଭୂତାଣୁ, କୀଟପତଙ୍ଗ ଗୁଡିକ ନଷ୍ଟ ହୋଇଯିବେ ଫଳରେ ସହରବାସୀ ଏକ ସୁସ୍ଥ ପରିବେଶ ପାଇ ପାରିବେ ବୋଲି ଲକ୍ଷ୍ୟ ରଖାଯାଇଛି । ଏଥିସହ ଜେକେପୁର ସହରାଂଚଳରେ ଲକଡାଉନ ନିମୟକୁ ମାନି ଚଳିବା ସହ ଘରୁ ନ ବାହାରିବା, ହାତ ଧୋଇବା, ସାମାଜିକ ଦୂରତା ବଜାୟ ରଖିବା ଆଦି ନିୟମାବଳୀ ପାଳନ ସହ ସମସ୍ତ ସର୍ତକତା ଓ ସଚେତନତା ଅବଲମ୍ବନ କରିବା ପାଇଁ ପରାମର୍ଶ ଦିଆଯାଇଛି । ଏହି ବିଶୋଧକ ସିଂଛନ ବେଳେ ଚାନ୍ଦିଲି ଥାନା ଅଧିକାରୀ ଅଜିତ କୁମାର ସ୍ୱାଇଁ, ଜେକେ କାଗଜ କଳର ବରିଷ୍ଠ ସିକ୍ୟୁରିଟି ଅଧିକାରୀ ମହମ୍ମ୍‌ଦ ଅବେଶ, ଟାଉନସିପ୍ ,ବରିଷ୍ଠ ଅଧିକାରୀ ଏସ.ପି.ରଥ, ସୁପରଭାଇଜର ପି.ବିଜୟ କୁମାରଙ୍କ ସମେତ ଅନ୍ୟ ଅଧିକାରୀମାନେ ଉପସ୍ଥିତ ରହିଥିଲେ । ଜେକେ କାଗଜ କଳ ତରଫରୁ ଏପରି ପ୍ରତିଷେଧମୂଳକ ବ୍ୟବସ୍ଥା ଗ୍ରହଣ କରାଯାଇଥିବାରୁ ଜେକେପୁର ସହରବାସୀ କମ୍ପାନୀ
କର୍ତୁପକ୍ଷଙ୍କୁ ସାଧୁବାଦ ଜଣାଇଛନ୍ତି ।