ବିଜେତାଙ୍କୁ ୧୨ ହଜାର, ଉପବିଜେତାଙ୍କୁ ୯ ହଜାର ଟଙ୍କା ପୁରସ୍କାର
ଓଡ଼ିଆ ବାର୍ତ୍ତା/ କୋରାପୁଟ (ସୁନ୍ଦର କୁମାର ପାଣି): ଗ୍ରାମାଞ୍ଚଳର ଫୁଟବଲ ପ୍ରତିଭାଙ୍କୁ ଆଗକୁ ଆଣିବା ଏବଂ ଯୁବ ଖେଳାଳିଙ୍କୁ ନିଜ ଦକ୍ଷତା ପ୍ରଦର୍ଶନର ସୁଯୋଗ ଦେବା ଲକ୍ଷ୍ୟରେ ରିଜୟସ ପବ୍ଲିକ ସ୍କୁଲ ପକ୍ଷରୁ ଏକଦିବସୀୟ ଫୁଟବଲ ଟୁର୍ଣ୍ଣାମେଣ୍ଟ ଆୟୋଜନ କରାଯାଇଛି। ଚଳିତ ବର୍ଷ ଦ୍ୱିତୀୟ ଥର ପାଇଁ ଆୟୋଜିତ ଏହି ପ୍ରତିଯୋଗିତାରେ ୪୦ରୁ ଊର୍ଦ୍ଧ୍ୱ ଦଳ ଭାଗ ନେଇଥିବା ବେଳେ ଖେଳାଳିଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି। ବିଦ୍ୟାଳୟ ପରିସରରେ ଥିବା ଖେଳପଡ଼ିଆରେ ଚାଲିଥିବା ଏହି ଟୁର୍ଣ୍ଣାମେଣ୍ଟ ସ୍କୁଲ ଅଧ୍ୟକ୍ଷ ସଂଗ୍ରାମ କେଶରୀ ଭତ୍ରାଙ୍କ ତତ୍ତ୍ୱାବଧାନରେ ପରିଚାଳିତ ହେଉଛି। ପ୍ରତିଯୋଗିତାରେ ବିଜେତା ଦଳକୁ ୧୨ ହଜାର ଟଙ୍କା ସହ ଟ୍ରଫି ଏବଂ ଉପବିଜେତା ଦଳକୁ ୯ ହଜାର ଟଙ୍କା ସହ ଟ୍ରଫି ପ୍ରଦାନ କରାଯିବ।
ଅବିଭକ୍ତ କୋରାପୁଟ ଜିଲ୍ଲାରେ ଫୁଟବଲର ଲୋକପ୍ରିୟତା ଦୀର୍ଘଦିନର। ବିଶେଷକରି ଗ୍ରାମାଞ୍ଚଳରେ ଅନେକ ଯୁବକଙ୍କ ମଧ୍ୟରେ ଏହି ଖେଳ ପ୍ରତି ଆଗ୍ରହ ରହିଥିଲେ ମଧ୍ୟ ସମସ୍ତଙ୍କୁ ଉପଯୁକ୍ତ ମଞ୍ଚ ଓ ପ୍ରଶିକ୍ଷଣ ମିଳିପାରୁନାହିଁ। ଏଭଳି ପ୍ରତିଯୋଗିତା ଗ୍ରାମାଞ୍ଚଳର ଖେଳାଳିଙ୍କୁ ନିଜ ପ୍ରତିଭା ପ୍ରଦର୍ଶନ, ଅଭିଜ୍ଞତା ହାସଲ ଓ ଭବିଷ୍ୟତରେ ବଡ଼ ପ୍ରତିଯୋଗିତାରେ ଭାଗ ନେବା ପାଇଁ ପ୍ରେରଣା ଯୋଗାଇବ।
ମହିଳା ଫୁଟବଲ ଦଳ ଗଠନ କରି ଅଞ୍ଚଳରେ ନିଜର ପରିଚୟ ସୃଷ୍ଟି କରିଥିବା ଏହି ଶିକ୍ଷାନୁଷ୍ଠାନର ପଦକ୍ଷେପ କ୍ରୀଡ଼ା କ୍ଷେତ୍ରରେ ଉତ୍ସାହଜନକ। ତେବେ ଫୁଟବଲର ସାମଗ୍ରିକ ବିକାଶ ପାଇଁ ଏଭଳି ପ୍ରତିଯୋଗିତା ସହ ନିୟମିତ ଅଭ୍ୟାସ, ଦକ୍ଷ ପ୍ରଶିକ୍ଷକ ଓ ଖେଳାଳିଙ୍କୁ ଆଗକୁ ବଢ଼ିବାର ସୁଯୋଗ ମଧ୍ୟ ଆବଶ୍ୟକ। ଏହି ଆୟୋଜନ ଅଞ୍ଚଳର ନୂତନ କ୍ରୀଡ଼ା ପ୍ରତିଭାଙ୍କୁ ଚିହ୍ନଟ କରିବା ସହ ଫୁଟବଲ ପ୍ରତି ଯୁବପିଢ଼ିଙ୍କ ଆଗ୍ରହ ବୃଦ୍ଧିରେ ସହାୟକ ହେବ ବୋଲି ଆଶା କରାଯାଉଛି।
