ଓଡ଼ିଆ ବାର୍ତ୍ତା/ କୋରାପୁଟ (ସୁନ୍ଦର କୁମାର ପାଣି): କୋରାପୁଟ ପୌରପରିଷଦର ଅଧ୍ୟକ୍ଷ ପଦକୁ ନେଇ ଏବେଠାରୁ ଅନେକଙ୍କ ମନରେ ଆଶା ଓ ଆଗ୍ରହ। କିଏ କହୁଛନ୍ତି, ମୁଁ ଅଧ୍ୟକ୍ଷ ହେବି ତ ଆଉ କିଏ ଏହି ପଦ ପାଇଁ ନିଜକୁ ଦାବିଦାର ଭାବେ ଦେଖୁଛନ୍ତି। କିନ୍ତୁ ଏହି ଆଗ୍ରହୀଙ୍କ ମଧ୍ୟରୁ କେତେଜଣ କୋରାପୁଟ ପୌରାଞ୍ଚଳର ପ୍ରକୃତ ସମସ୍ୟା ସହ ପରିଚିତ? ସହରବାସୀଙ୍କ ଦୈନନ୍ଦିନ ଦୁର୍ଦ୍ଦଶା ଓ ପୌରପରିଷଦର କାର୍ଯ୍ୟପ୍ରଣାଳୀ ବିଷୟରେ କେତେଜଣ ଅବଗତ? ଏବେ ଏହା ହିଁ ବଡ଼ ପ୍ରଶ୍ନ। ସହରର କେଉଁ ୱାର୍ଡରେ ରାସ୍ତା ଅବସ୍ଥା ଶୋଚନୀୟ, କେଉଁଠି ଡ୍ରେନେଜ୍ ସମସ୍ୟା ରହିଛି, କେଉଁ ଅଞ୍ଚଳରେ ପାନୀୟ ଜଳ ଯୋଗାଣ ନେଇ ଅଭିଯୋଗ ରହିଛି, କେଉଁଠି ଆବର୍ଜନା ନିଷ୍କାସନ ନିୟମିତ ହେଉନାହିଁ—ଏସବୁ ବିଷୟରେ ଅବଗତ ନଥାଇ ଯଦି କେହି ଅଧ୍ୟକ୍ଷ ହେବାର ସ୍ୱପ୍ନ ଦେଖୁଛନ୍ତି, ତେବେ ତାଙ୍କ ନେତୃତ୍ୱରେ ସହରର ବିକାଶ କେମିତି ହେବ, ତାହା ନେଇ ପ୍ରଶ୍ନ ଉଠିବା ସ୍ୱାଭାବିକ।
ପୌରାଧ୍ୟକ୍ଷ ପଦ କେବଳ ଏକ ରାଜନୈତିକ ପରିଚୟ ନୁହେଁ; ଏହା ସହରର ହଜାର ହଜାର ଲୋକଙ୍କ ସମସ୍ୟା ବୁଝିବା, ପ୍ରଶାସନ ସହ ସମନ୍ୱୟ ରଖିବା ଏବଂ ବିକାଶମୂଳକ କାର୍ଯ୍ୟକୁ ଆଗେଇ ନେବାର ଏକ ବଡ଼ ଦାୟିତ୍ୱ। ଏଥିପାଇଁ କେବଳ ଅଧ୍ୟକ୍ଷ ହେବାର ଇଚ୍ଛା ନୁହେଁ, ସହରର ସମସ୍ୟା ପ୍ରତି ଅନୁଭବ, ଦୂରଦୃଷ୍ଟି ଓ ସମାଧାନ ପାଇଁ ସ୍ପଷ୍ଟ ଯୋଜନା ଆବଶ୍ୟକ।
ତେଣୁ ଯେଉଁମାନେ କୋରାପୁଟ ପୌରପରିଷଦର ଅଧ୍ୟକ୍ଷ ହେବାକୁ ଆଗ୍ରହୀ, ସେମାନେ ପ୍ରଥମେ ନିଜକୁ ପ୍ରଶ୍ନ କରନ୍ତୁ—ସହର ପାଇଁ ମୋର ଯୋଜନା କ’ଣ? କେଉଁ ସମସ୍ୟାକୁ ପ୍ରାଥମିକତା ଦେବି? ଲୋକଙ୍କ ଅଭିଯୋଗର ସମାଧାନ କିପରି କରିବି? ଏବଂ ସହରର ବିକାଶ ପାଇଁ ମୋର ଠୋସ୍ ରୋଡମ୍ୟାପ୍ କ’ଣ?
କୋରାପୁଟବାସୀଙ୍କୁ କେବଳ ‘ମୁଁ ଅଧ୍ୟକ୍ଷ ହେବି’ ବୋଲି କହିଦେଲେ ହେବ ନାହିଁ। ସହର ପାଇଁ କ’ଣ କରିବେ, କିପରି କରିବେ ଏବଂ ଲୋକଙ୍କ ସମସ୍ୟା କିପରି ଦୂର କରିବେ—ତାହାର ସ୍ପଷ୍ଟ ଉତ୍ତର ଦେବାକୁ ପଡ଼ିବ। ପଦବୀର ଆକାଂକ୍ଷା ରଖିବା ପୂର୍ବରୁ ଜନସେବାର ଦାୟିତ୍ୱ ବୁଝିବା ହିଁ ପ୍ରକୃତ ନେତୃତ୍ୱର ପ୍ରଥମ ସର୍ତ୍ତ।
