୪୧ ଲକ୍ଷ ୧୬ ହଜାର ଟଙ୍କାର ଜାଲ୍ ନୋଟ୍ ଜବତ, ଜଣେ ଗିରଫ
ଓଡ଼ିଆ ବାର୍ତ୍ତା/ ସୁବର୍ଣ୍ଣପୁର (ରାଜ କିଶୋର ତ୍ରିପାଠୀ): ଏସଟିଏଫ୍ ଜାଲରେ ଜାଲ୍ ନୋଟ୍ ରେକେଟ, ଆଜି ଏପରି କିଛି ଚର୍ଚ୍ଚିତ ଘଟଣା ଘଟିଛି ସୋନପୁର ସହରରେ l ସୋନପୁରରୁ ୪୧ ଲକ୍ଷ ୧୬ ହଜାର ଟଙ୍କାର ଜାଲ୍ ନୋଟ୍ ଜବତ ସହ ଜାଲ୍ ନୋଟ୍ ପ୍ରସ୍ତୁତ ସରଞ୍ଜାମ ଓ ଜଣକୁ ଗିରଫ କରିଛି ଏସଟିଏଫ୍ l ଗିରଫ ଅଭିଯୁକ୍ତ ଜଣ ହେଲେ ସୋନପୁର ଉଲୁଣ୍ଡା ମାଟିଖାଇ ନୁଆବସ୍ତିର ଦୀପକ ମେହେର l ଗିରଫ ପରେ ଅଭିଯୁକ୍ତକୁ ବୀରମହାରାଜପୁର ଏସଡିଜେଏମ୍ କୋର୍ଟରେ ହାଜର କରାଯାଇଛି l ରାଜ୍ୟ ବାହାରକୁ ରାକେଟର ଚେର ଲମ୍ବିଥିବା ଅନୁମାନ କରାଯାଉଛି l ଛତିଶଗଡ଼କୁ ନୋଟ ଗୁଡିକ ଚାଲାଣ ହେଉଥିବା ସନ୍ଦେହ କରାଯାଉଛି l ଏନ୍ ଆଇ ଏ ଆକ୍ଟ ୨୦୦୮ ଅଧୀନରେ ଓ ପିଏସ କେସ ନଂ ୧୮, ୦୨/୯/୨୦୨୩ ୟୁ/ଏସ୍ -୪୮୯- ଏ /୪୮୯-ବି/୪୮୯-ସି/୧୨୦(ବି)ଆଇପିସି ଆଧାରରେ ମାମଲା ରୁଜୁ କରି ଏସ୍ ଟି ଏଫ୍ ନକଲି ନୋଟ ଗୁଡିକୁ ଯାଞ୍ଚ ପାଇଁ ପଶ୍ଚିମବଙ୍ଗ ର ଭାରତୀୟ ରିଜର୍ଭ ବ୍ୟାଙ୍କ ମୁଦ୍ରଣ ପ୍ରେସକୁ ପଠାଇଥିବା ବେଳେ ଅଧିକ ତଦନ୍ତ ଜାରି ରହିଥିବା ସୁଚନା ମିଳିଛି।
