ଓଡ଼ିଆ ବାର୍ତ୍ତା/ ବାଲେଶ୍ୱର (କୃଷ୍ଣ କୁମାର ମହାନ୍ତି): ଏକାଡେମିକ୍-ଶିଳ୍ପ ସହଯୋଗକୁ ବୃଦ୍ଧି କରିବାରେ ଏକ ମହତ୍ବପୂର୍ଣ୍ଣ ପଦକ୍ଷେପ ଗ୍ରହଣ କରି, ଫକୀରମୋହନ ବିଶ୍ୱବିଦ୍ୟାଳୟ ଓ କନଫେଡେରେସନ୍ ଅଫ୍ ଇଣ୍ଡିଆନ୍ ଇଣ୍ଡଷ୍ଟ୍ରି (ସି.ଆଇ.ଆଇ) ମଧ୍ଯରେ ଏକ ବୁଝାମଣାପତ୍ର ସ୍ବାକ୍ଷରିତ ହୋଇଯାଇଛି । ବିଶ୍ୱବିଦ୍ୟାଳୟର କୁଳପତି ପ୍ରଫେସର ସନ୍ତୋଷ କୁମାର ତ୍ରିପାଠୀଙ୍କ ପରାମର୍ଶ ଓ ମାର୍ଗଦର୍ଶନରେ ତଥା ସ୍ନାତକୋତ୍ତର ପରିଷଦର ଅଧ୍ୟକ୍ଷ ପ୍ରଫେସର ଭାସ୍କର ବେହେରା ଓ କୁଳସଚିବ କୁକୁମୀନା ଦାସଙ୍କ ଉପସ୍ଥିତିରେ ଏହି ବୁଝାମଣାପତ୍ର ସ୍ବାକ୍ଷରିତ ହୋଇଥିଲା । ସି.ଆଇ.ଆଇ ପ୍ରତିଷ୍ଠାନ ପକ୍ଷରୁ ପ୍ରତିନିଧିତ୍ୱ କରୁଥିବା ଶ୍ରୀ ପଙ୍କଜ କୁମାର ଅଗ୍ରୱାଲ, ୟଙ୍ଗ ଇଣ୍ଡିଆ (ଓ୍ବାଇ.ଆଇ) ଅଧ୍ୟାୟ ବାଲେଶ୍ୱର ଓ ଅନ୍ଯାନ୍ଯ କର୍ମକର୍ତ୍ତାଗଣ ଏହି କାର୍ଯ୍ୟକ୍ରମରେ ଉପସ୍ଥିତ ରହିଥିଲେ। କାର୍ଯ୍ୟକ୍ରମକୁ ବିଶ୍ୱବିଦ୍ୟାଳୟ ଟି.ବି.ଆଇ ର ସଂଯୋଜକ ପ୍ରଫେସର ପଙ୍କଜ କୁମାର ପାରହୀ ଏବଂ ଟି.ବି.ଆଇ ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସୁନେନ୍ଦୁ ନାୟକ ଆୟୋଜନ କରିଥିଲେ । ବୁଝାମଣାପତ୍ରର ମୁଖ୍ୟ ଉଦ୍ଦେଶ୍ଯ ଗୁଡିକ ଯଥା ଦକ୍ଷତା ବୃଦ୍ଧି, ନେତୃତ୍ୱ ବିକାଶ ଏବଂ ଗୋଷ୍ଠୀ ସେବା ସମୂହ ପ୍ରଦାନ ପାଇଁ ପଦକ୍ଷେପ ଉପରେ ଧ୍ୟାନ, ଏକାଡେମୀ ଏବଂ ଶିଳ୍ପ ମଧ୍ୟରେ ରହିଥିବା ବ୍ୟବଧାନକୁ ଦୂର କରିବାକୁ ସହଭାଗୀତା ଲକ୍ଷ୍ୟ ଆଦି ବିଭିନ୍ନ ପ୍ରସଙ୍ଗ ରଖାଯାଇଛି।
ଏହା ବିଶ୍ୱବିଦ୍ୟାଳୟର ଛାତ୍ରଛାତ୍ରୀ ଓ ଅଧ୍ୟାପକ ଅଧ୍ୟାପିକାମାନଙ୍କୁ ସି.ଆଇ.ଆଇ ଦ୍ବାରା ଆୟୋଜିତ ବିଭିନ୍ନ କାର୍ଯ୍ୟକ୍ରମରେ ନିୟୋଜିତ କରିବାକୁ ସକ୍ଷମ ହୋଇପାରିବ। ବିଶେଷତଃ ଏହାର “ଓ୍ବାଇ.ଆଇ ୟୁବା” ପ୍ଲାଟଫର୍ମ ମାଧ୍ୟମରେ ଅଂଶଗ୍ରହଣ କରି ଛାତ୍ରଛାତ୍ରୀ ମାନେ ବିଶେଷ ଉପକୃତ ହୋଇପାରିବାର ଲକ୍ଷ୍ଯ ରଖାଯାଇଛି। ଏହାର ମୁଖ୍ୟ ଉଦ୍ଦେଶ୍ୟଗୁଡିକ ମଧ୍ଯରେ, ନେତୃତ୍ୱ ଏବଂ ଦକ୍ଷତା ବିକାଶ ଉପରେ ଗୁରୁତ୍ୱ ଦେଇ ସି.ଆଇ.ଆଇ.ର ଓ୍ବାଇ.ଆଇ. ୟୁବା ଅନ୍ତର୍ଗତ ବିଭିନ୍ନ ବିକାଶମୂଳକ କାର୍ଯ୍ୟକଳାପରେ ଛାତ୍ରଛାତ୍ରୀଙ୍କୁ ନାମ ଲେଖାଇବା ଏବଂ ନିୟୋଜିତ କରିବା ଆଦି ପ୍ରସ୍ତାବ ଅନ୍ତର୍ଭୁକ୍ତ କରାଯାଇଛି। ଏଥିସହ ଜାତୀୟ ଏବଂ ଅଧ୍ୟାୟ ସ୍ତରୀୟ ଓ୍ବାଇ.ଆଇ. ଇଭେଣ୍ଟରେ ବିଶ୍ୱବିଦ୍ୟାଳୟର ଅଂଶଗ୍ରହଣକୁ ସୁଗଠିତ କରିବା, ବ୍ୟାପକ ଏକ୍ସପୋଜର ଏବଂ ନେଟୱାର୍କିଂକୁ ବୃଦ୍ଧି କରିବା ସହ ସ୍ବ-ବିକାଶ ତଥା ସାମାଜିକ ଗୋଷ୍ଠୀ ସେବା ଏବଂ ରାଷ୍ଟ୍ର ନିର୍ମାଣ ଉପରେ ଧ୍ୟାନ ଦିଆଯାଇ ମିଳିତ ପ୍ରକଳ୍ପ ଏବଂ ପଦକ୍ଷେପକୁ ପ୍ରୋତ୍ସାହିତ କରିବାର ସୁଯୋଗ ହାସଲ ନେଇ ଆଶାପୋଷଣ କରାଯାଇଛି ।
ଏହି ସହଯୋଗ ଆଗକୁ ବୈଷୟିକ ଏବଂ ଔଦ୍ୟୋଗିକ ସହଭାଗୀତା ପାଇଁ ମଧ୍ୟସ୍ଥି ରୂପକ କାର୍ଯ୍ୟ କରି ନୂତନ ଉଦ୍ଭାବନ ଏବଂ ପ୍ରଗତିର ବିକାଶ ପାଇଁ ଏକ ଅଂଶୀଦାର ପ୍ରତିବଦ୍ଧତାକୁ ମଧ୍ଯ ସୁନିଶ୍ଚିତ କରିବ। ଏଠାରେ ଉଲ୍ଲେଖଯୋଗ୍ଯ, କନଫେଡେରେସନ୍ ଅଫ୍ ଇଣ୍ଡିଆନ୍ ଇଣ୍ଡଷ୍ଟ୍ରି (ସି.ଆଇ.ଆଇ) ହେଉଛି ଏକ ଅଣ-ଲାଭକାରୀ, ଶିଳ୍ପ-ନେତୃତ୍ୱାଧୀନ ସଂଗଠନ ଯାହା ନିରନ୍ତର ବିକାଶ ଏବଂ ବିଶ୍ବ ସ୍ତରରେ ପ୍ରତିଯୋଗିତାମୂଳକ ଅଗ୍ରଗତି ଉପରେ ଧ୍ୟାନ ଦେଇଥାଏ। ଏହାର ଓ୍ବାଇ.ଆଇ. ୟୁବା ପ୍ଲାଟଫର୍ମ ମାଧ୍ୟମରେ, ନେତୃତ୍ୱ ଦକ୍ଷତା ବୃଦ୍ଧି ଏବଂ ଗୋଷ୍ଠୀଗତ ଅଂଶଗ୍ରହଣକୁ ଉତ୍ସାହିତ କରି ଯୁବକମାନଙ୍କୁ ସଶକ୍ତ କରିବାକୁ ଲକ୍ଷ୍ୟ ରଖିଛି। ଏହି ସହଭାଗୀତା ଛାତ୍ରଛାତ୍ରୀମାନଙ୍କ ସମ୍ପ୍ରତି ବ୍ୟବହାରିକ ଜୀବନରେ ବିଭିନ୍ନ ଦିଗରେ ଆଗ୍ରହ ପ୍ରଦାନ, ଶିଳ୍ପାୟନ ପାଇଁ ପ୍ରସ୍ତୁତି ଏବଂ ସାମଗ୍ରିକ ଅଭିବୃଦ୍ଧି ବୃଦ୍ଧି କରିବାରେ ପ୍ରତିଶ୍ରୁତିବଦ୍ଧ ।
