କବିତା: ପଲାଶ ବନରେ ସନ୍ଧ୍ୟାଟିଏ

✒️ରଞ୍ଜିତ କୁମାର ସାହୁ

କିଏ ସେ ଢାଳୁଛି ତୂଳୀ ଧରି ହାତେ
ବନଖଣ୍ଡେ ଭରେ ଅପୂର୍ବ ଶୋଭା
ଶୀତଳ ସମୀରେ ପଦ ଚଲା ପଥେ
ନୟନ ନିହାରେ ନାରଙ୍ଗୀ ଆଭା !

ପକ୍ଷୀ କଳରବେ, ଗୁଞ୍ଜେ ଚଉଦିଗ
ନୀଡ଼କୁ ଫେରେ ଖଗ ଗୋଧୂଳିରେ
ଅଧରରେ ତା’ର ଜୀବନର ରାଗ
ଗାଈ ଜଗୁଆଳି ଭିଜେ ଧୂଳିରେ ।

ମାଳଭୂମି ହଜେ ବହ୍ନିର ଭ୍ରମରେ
ଦିଗନ୍ତ ଯାଏଁ ଝୁମେ ତରୁବର
ଫାଲଗୁନ ହସି ପଲାଶ ଦ୍ରୁମରେ
ମାଖେ ତହିଁରେ ରଙ୍ଗ ଅବିରର ।

ଘଡ଼ିଟିଏ ଲାଗି, ଅଟକି ଯାଆନ୍ତି
ଅଟକାଇ ମୁଁ ଯାତ୍ରା ଜୀବନର !
ଅସ୍ତରାଗ ରଙ୍ଗେ ରଞ୍ଜିତ ହୁଅନ୍ତି
ଅଟକି ଥିଲେ ଚକ୍ର ସମୟର ।

ଯୁକ୍ତରାଷ୍ଟ୍ର ଆମେରିକା
Sunil Kumar Dhangadamajhi

𝐸𝑑𝑖𝑡𝑜𝑟, 𝑂𝑑𝑖𝑎𝐵𝑎𝑟𝑡𝑎.𝑖𝑛

http://odiabarta.in
error: You are not allowed to copy this content. Thank you.