ଓଡ଼ିଆ ବାର୍ତ୍ତା/ କଳାହାଣ୍ଡି (ସୁଶାନ୍ତ କୁମାର ଦଳେଇ): ଗୋଲାମୁଣ୍ଡା ପୋଲିସ ୬ କେଜି ୫୦୦ ଗ୍ରାମ ଗଞ୍ଜେଇ ଜବତ କରିଥିବା ବେଳେ ୨ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । କୋରାପୁଟରୁ କଳାହାଣ୍ଡି ମୁଖ୍ୟ ରାସ୍ତା ଦେଇ ଅନ୍ୟାନ୍ୟ ଜିଲ୍ଲାକୁ ଗଞ୍ଜେଇ ଚାଲାଣ କରିବା ଗଞ୍ଜେଇ ମାଫିଆମାନଙ୍କ ଏକ ମୂଖ୍ୟ ରାସ୍ତା ପାଲଟିଥିବା ବେଳେ ଗତ କିଛି ମାସ ହେଲା ମୁଖ୍ୟ ରସ୍ତାରେ ଗଞ୍ଜେଇ ଧରପକଡ ଯୋରଦାର କରିଛି କଳାହାଣ୍ଡି ପୋଲିସ । ଏଣୁ ଗଞ୍ଜେଇ ମାଫିଆମାନେ ବର୍ତ୍ତମାନ ଜିଲ୍ଲାର ଗ୍ରାମାଞ୍ଚଳ ରାସ୍ତା ଦେଇ ଗଞ୍ଜେଇ ଚାଲାଣ କରୁଛନ୍ତି । ଆଜି ଗୋଲାମୁଣ୍ଡା ଥାନା ଅଞ୍ଚଳରେ ଗଞ୍ଜେଇ ଚଲାଣ ହୋଇଥିବା ଖବର ପାଇ ଗୋଲାମୁଣ୍ଡା ଥାନା ଆଇଆଇସି ଯୁଗଳ ଶବରଙ୍କ ନେତୃତ୍ୱରେ ଏକ ପୋଲିସ ଟିମ ଉଦେଶୃଙ୍ଗ ମୁଖ୍ୟ ରାସ୍ତାରେ ଏକ ବାଇକରେ ଗଞ୍ଜେଇ ଚାଲାଣ ହେଉଥିବା ସମୟରେ ଦୁଇ ଜଣଙ୍କୁ ଅଟକାଇଥିଲା । ଓଡି ୦୮ କ୍ୟୁ ୫୮୯୮ ହୋଣ୍ଡା ମୋଟରସାଇକେଲରେ ଦୁଇ ଜଣଙ୍କଠାରୁ ପୋଲିସ ୬ କେଜି ୫୦୦ ଗ୍ରାମ ଗଞ୍ଜଇ ଜବତ କରିଥିବା ବେଳେ ସେମାନଙ୍କୁ ଗିରଫ କରିଥିଲା । ଦୁଇ ଯୁବକଙ୍କ ଠାରୁ ପୋଲିସ ଏକ ମୋବାଇଲ ଓ ଏକ ହ୍ୟାଣ୍ଡ ବ୍ୟାଗ ମଧ୍ୟ ଜବତ କରିଛି । ଦୁଇ ଜଣ ଯୁବକ କୋରାପୁଟ ଜିଲ୍ଲା ମାଛକୁଣ୍ଡ ଥାନା ସିଲିପଡା ଗ୍ରାମର ଘାସିରାମ ଦଳେଇ ଓ ଛିଲିବା ଗ୍ରାମର କମୁ ଖେମଣ୍ଡୁ ବୋଲି ଜଣାପଡିଛି । ଦୁଇ ଜଣଙ୍କୁ ଗିରଫ କରି ଗୋଲାମୁଣ୍ଡା ଥାନା କେସ ନମ୍ବର ୧୨୧ ରେ ଏକ ମାମଲା ରୁଜୁ କରି ଆଜି କୋର୍ଟ ଚାଲାଣ କରିଥିବା ଗୋଲାମୁଣ୍ଡା ଥାନା ଆଇଆଇସି ଯୁଗଳ ଶବର ପ୍ରକାଶ କରିଛନ୍ତି ।
