ଓଡ଼ିଆ ବାର୍ତ୍ତା/ କୋକସରା (ହିରଣ୍ୟ ବେହେରା): କୋକସରା ଥାନା ଅନ୍ତର୍ଗତ ଡହଗାଁ ଓ ସାରସମାଲ ଗ୍ରାମ ସୀମାରେ ଥିବା ଗୋଚିଆ ଡ଼ଙ୍ଗର ନିକଟରେ ଜଣେ ମହିଳାଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି । ସକାଳୁ ଲୋକେ ଚାଷ ଜମିକୁ ଯିବା ସମୟରେ ମହିଳାଙ୍କ ଝୁଲନ୍ତା ମୃତଦେହ ଦେଖିବାକୁ ପାଇ ସ୍ଥାନୀୟ ସରପଞ୍ଚ ପ୍ରତିନିଧି ବ୍ରଜ ମୋହନ ନାଏକ ଓ ପୋଲିସକୁ ସୂଚନା ଦେଇଥିଲେ । ମୃତ ମହିଳା ଜଣକ ବଲାଙ୍ଗିର ଜିଲ୍ଲା କଣ୍ଟାବାଞ୍ଜି ଅଞ୍ଚଳର ଲୁକେଶି କୁଅଁରଙ୍କ ବୋଲି ଜଣାପଡିଛି । ସେ ଗତ ଦୁଇବର୍ଷ ତଳେ ନୂଆପଡା ଜିଲ୍ଲା ସିଏଲଲଟି ଗ୍ରାମର ହେମନ୍ତ ବେଲଦାରଙ୍କୁ ପ୍ରେମ ବିବାହ କରିଥିଲେ । ପରିବାର ଗୁଜୁରାଣ ମେଣ୍ଟେଇବା ପାଇଁ ଗତ ବର୍ଷେ ହେବ କଳାହାଣ୍ଡି ଜିଲ୍ଲା କୋକସରା ବ୍ଲକ ଡ଼ହଗାଁ ଝାରବନ୍ଧ ପଡା ନିକଟରେ ପଥର ନିର୍ମିତ ଘର କରଣା ସାମଗ୍ରୀ ତିଆରି କରି ବିକ୍ରି କରି ରହୁଥିଲେ । ତେବେ ଆଜି ସକାଳେ ମୃତଦେହ ଠାବ ହୋଇଥିବା ବେଳେ ମୃତ୍ୟୁର କାରଣ ଅସ୍ପଷ୍ଟ ରହିଛି । କୋକସରା ପୁଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରି ତଦନ୍ତ କରୁଥିବା ସୁଚନା ମିଲିଛି । ତେବେ ଝୁଲନ୍ତା ମହିଳାଙ୍କ ଶବରେ ରକ୍ତର ଛିଟା ଲାଗି ରହିଥିବା ଓ ପାରିପାର୍ଶ୍ବିକ ଅବସ୍ଥା ଦେଖିବା ପରେ ସ୍ଥାନୀୟ ଅଞ୍ଚଳବାସୀ ଏହା ହତ୍ୟା ନା ଆତ୍ମହତ୍ୟା ସେ ନେଇ ଚର୍ଚ୍ଚା କରୁଛନ୍ତି । ତେବେ ପୁଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି । ଶବ ବ୍ୟବଚ୍ଛେଦ ପରେ ସତ୍ୟ ଘଟଣା ସାମ୍ନାକୁ ଆସିବ ବୋଲି ପୁଲିସ ଅଧିକାରୀ ସୁଚନା ଦେଇଛନ୍ତି ।
