ଓଡ଼ିଆ ବାର୍ତ୍ତା/ ରାୟପୁର (ଉମେଶ ଯାଦବ): ଛତିଶଗଡର ନାରାୟଣପୁର ଜିଲ୍ଲାରେ ପୋଲିସ ଏବଂ ମାଓବାଦୀଙ୍କ ମଧ୍ୟରେ ଗୁଳିବିନିମୟ ହୋଇଛି। ମାଓବାଦୀଙ୍କ ସମାବେଶର ସୂଚନା ପାଇବା ପରେ ପୋଲିସ ଏନକାଉଣ୍ଟର ଅପରେସନ୍ ଆରମ୍ଭ କରିଥିଲା। ଯବାନମାନେ ବୃନ୍ଦାବଲ ଜଙ୍ଗଲରେ ପହଞ୍ଚିବା ମାତ୍ରେ ନକ୍ସଲମାନେ ଗୁଳି ଚଳାଇବା ଆରମ୍ଭ କରିଥିଲେ। ଜିଲ୍ଲା ରିଜର୍ଭ ଗାର୍ଡର ଯବାନ ମାନେ ମାଓବାଦୀଙ୍କୁ ଏହାର କଡା ଜବାବ ଦେଇଥିଲେ। ଏହାପରେ ମାଓବାଦୀମାନେ ପଳାଇ ଯାଇଥିଲେ। ଏନକାଉଣ୍ଟରରେ ମାଓବାଦୀଙ୍କ ବ୍ୟାପକ କ୍ଷତି ହେବାର ସୂଚନା ରହିଛି। ଘଟଣାସ୍ଥଳରେ ସୁରକ୍ଷାକର୍ମୀ ଉପସ୍ଥିତ ରହିଥିବା ସୂଚନା ରହିଛି। ଆଇଜି ସୁନ୍ଦରରାଜ ପି କହିଛନ୍ତି ଯେ ନାରାୟଣପୁର ଜିଲ୍ଲାର ପିଏସ୍ ଏଡକା ଦେବରଗାଓଁ ନିକଟରେ ନକ୍ସଲମାନଙ୍କ ସମାବେଶ ସମ୍ପର୍କରେ ସୂଚନା ମିଳିଥିଲା । ଏହାପରେ ଅପରେସନ୍ ଆରମ୍ଭ ହୋଇଥିଲା। ନାରାୟଣପୁରରୁ ଯବାନଙ୍କ ଏକ ଟିମ୍ ପଠାଯାଇଥିଲା | ଯେତେବେଳେ ଯବାନମାନେ ଦେବରଗାଓଁ ନିକଟ ଜଙ୍ଗଲରେ ପହଞ୍ଚିଥିଲେ, ନକ୍ସଲମାନେ ଗୁଳି ଚଳାଇବା ଆରମ୍ଭ କରିଥିଲେ। ଯବାନମାନେ ମଧ୍ୟ ଏହାର କଡା ଜବାବ ଦେଇଥିଲେ। ଉଭୟ ପାର୍ଶ୍ୱରୁ ଅଧ ଘଣ୍ଟା ଧରି ଗୁଳି ବିନିମୟ ହୋଇଥିଲା। ଯବାନଙ୍କ ସଂଖ୍ୟା ଅଧିକ ହୋଇଥିବା ଦେଖି ମାଓବାଦୀମାନେ ଜଙ୍ଗଲର ସୁଯୋଗ ନେଇ ପଳାଇ ଯାଇଥିଲେ ବୋଲି ସୂଚନା ରହିଛି। ଆଇଜି କହିଛନ୍ତି ଯେ ଏନକାଉଣ୍ଟର ପରେ ମାଓବାଦୀଙ୍କ କିଛି ସାମଗ୍ରୀ ଜବତ କରାଯାଇଛି। ଆଇଜିଙ୍କ ସୂଚନା ଅନୁଯାୟୀ, ଏନକାଉଣ୍ଟର ସ୍ଥାନରେ ରକ୍ତ ଦାଗ ଦେଖିବାକୁ ମିଳିଛି। ଏଥିରୁ ଜଣାପଡିଛି ଯେ ଏହି ଏନକାଉଣ୍ଟରରେ କିଛି ନକ୍ସଲ ଆହତ ହୋଇଥାଇ ପାରନ୍ତି। ନକ୍ସଲମାନଙ୍କୁ ଖୋଜିବା ପାଇଁ ସର୍ଚ୍ଚ ଅପରେସନ୍ ଚାଲିଛି। ସମସ୍ତ ଯବାନ ସୁରକ୍ଷିତ ଅଛନ୍ତି।
