ଓଡ଼ିଆ ବାର୍ତ୍ତା/ ମସ୍କୋ: ଭାରତର ବୈଦେଶିକ ମନ୍ତ୍ରୀ ଏସ ଜୟଶଙ୍କର ଏବେ ଋଷିଆ ଗସ୍ତରେ ଅଛନ୍ତି । ଋଷ ବୈଦେଶିକ ମନ୍ତ୍ରୀଙ୍କ ସହ ଆଲୋଚନା ବେଳେ ଏସ ଜୟଶଙ୍କର କହିଛନ୍ତି ଯେ ଆମେ ବର୍ତ୍ତମାନ ୟୁକ୍ରେନ ବିବାଦର ଫଳାଫଳ ଦେଖୁଛୁ । ଏହାର ମାନେ ହେଉଛି ଭାରତ ଯୁଦ୍ଧ ଚାହୁଁନାହିଁ ଏହା ହିଁ ପରୋକ୍ଷରେ କହିବାକୁ ଚାହିଁଛନ୍ତି ଏସ ଜୟଶଙ୍କର । ‘ଏ ଯୁଗ ଯୁଦ୍ଧର ନୁହଁ’ ବୋଲି ଜୟଶଙ୍କର କହିଛନ୍ତି ।
ନିଜର ସ୍ପଷ୍ଟ ମତ ପାଇଁ ସାରା ବିଶ୍ବରେ ସ୍ବତନ୍ତ୍ର ପରିଚୟ ସୃଷ୍ଟି କରିଥିବା ଜୟଶଙ୍କର ମସ୍କୋରେ ଋଷ ବୈଦେଶିକ ମନ୍ତ୍ରୀ ସର୍ଗେଇ ଲାଭ୍ରୋଭଙ୍କ ସହ ଦ୍ୱିପାକ୍ଷିକ ଆଲୋଚନା ବେଳେ କହିଛନ୍ତି ଯେ, ଆମେ ୟୁକ୍ରେନ ବିବାଦର ଫଳାଫଳ ଦେଖୁଛୁ । ଯୁଦ୍ଧର ପରିଣାମ କଣ ତାହା ସମସ୍ତେ ଜାଣନ୍ତି । ଫଳାଫଳ ମଧ୍ୟ ଆମେ ଦେଖିପାରୁଛୁ । ଏସ ଜୟଶଙ୍କର ଆଉ ମଧ୍ୟ କହିଛନ୍ତି ଯେ ଆମର ଏହି ପାରସ୍ପରିକ ବୈଠକ ହେଉଛି ଆମର ସମ୍ପର୍କକୁ ଆକଳନ କରିବାର ବଡ଼ ମାଧ୍ୟମ । ସମସାମୟିକ ପରିସ୍ଥିତିକୁ ଦୃଷ୍ଟିରେ ରଖି ପରସ୍ପରର ଭାବନାକୁ ବୁଝିବା ଆବଶ୍ୟକ । ସେ କହିଛନ୍ତି ଯେ ଭାରତ ଋଷ ବିଭିନ୍ନ କ୍ଷେତ୍ରରେ ମିଳିମିଶି ଉତ୍ତମ ଭାଗିଦାରୀ ଗଠନ କରିବାକୁ ଚେଷ୍ଟା କରୁଛନ୍ତି । ଦୁଇ ଦେଶର ସରକାର ସବୁବେଳେ ଅସାଧାରଣ ସ୍ଥିର ସମ୍ପର୍କ ରଖିଛନ୍ତି । ଆମର ଆଲୋଚନାରେ, ଆମେ ବିଶ୍ୱ ପରିସ୍ଥିତି ଏବଂ ଆମର ସମସ୍ୟାକୁ ଗୁରୁତ୍ବ ଦେଇ ଆସୁଛୁ । ଜୟଶଙ୍କର ଆହୁରି କହିଛନ୍ତି ଆମେ ଅନେକ ବିଷୟରେ ମଧ୍ୟ ଆଲୋଚନା କରିଛୁ । ବିଶେଷ କରି ଆତଙ୍କବାଦ ଏବଂ ଜଳବାୟୁ ପରିବର୍ତ୍ତନ ନେଇ ଆମର ଯାହା ପ୍ରସଙ୍ଗ ରହିଛି ତାହା ଉପରେ ଅଧିକ କାମ କରୁଛୁ ଯାହାର ପ୍ରଭାବ ମଧ୍ୟ ରହିଆସିଛି । ଋଷ ବୈଦେଶିକ ମନ୍ତ୍ରୀ ଲାଭ୍ରୋଭ କହିଛନ୍ତି ଯେ ଭାରତ ସହ ଆମର ସଂପର୍କର ଗୁରୁତ୍ବ ଆମେ ଜାଣିଛୁ । ଭାରତର ମନୋଭାବକୁ ଆମେ ମଧ୍ୟ ସମ୍ମାନ କରୁଛୁ । ଆଲୋଚନା ନେଇ ଆମେ ନିଶ୍ଚୟ ପଦକ୍ଷେପ ଗ୍ରହଣ କରିବୁ ।
