ଓଡ଼ିଆ ବାର୍ତ୍ତା/ ନୂଆଦିଲ୍ଲୀ: ମଣିପୁରରେ ହିଂସାକୁ ତିନିମାସ ବିତିଗଲାଣି। ରାଜ୍ୟରେ ସ୍ଥିତି ସୁଧାରିବା ପାଇଁ କେନ୍ଦ୍ର ଓ ରାଜ୍ୟ ସରକାର ନିରନ୍ତର ଉଦ୍ୟମ କରୁଛନ୍ତି। ଏଥି ସହିତ ବିରୋଧୀ ଦଳମାନେ ମଧ୍ୟ ଏହି ପ୍ରସଙ୍ଗରେ ନିରନ୍ତର ସ୍ୱର ଉତ୍ତୋଳନ କରୁଛନ୍ତି। ଏହି ଭିତରେ ମଣିପୁରରେ ଜାତିଗତ ହିଂସା ସହ ଜଡିତ ମୈତେଇ ସମ୍ପ୍ରଦାୟର କିଛି ଲୋକେ ସୁପ୍ରିମକୋର୍ଟରେ ଏକ ଆବେଦନ ଦାଖଲ କରିଥିଲେ। ଏହି ଆବେଦନ ପତ୍ରରେ ମଣିପୁରରେ ହିଂସା ହେବାର ଜାତିଗତ କାରଣ ପରିବର୍ତ୍ତେ ମିଆଁମାରରୁ କୁକି ସମ୍ପ୍ରଦାୟର ଲୋକେ ଅନୁପ୍ରବେଶ କରିବା କଥା ଦର୍ଶାଇଛନ୍ତି। ଏହା ସହିତ ସେ କୁକି ସମ୍ପ୍ରଦାୟକୁ ଆତଙ୍କବାଦୀ ବୋଲି କହିଛନ୍ତି। ତେବେ ସୁପ୍ରିମକୋର୍ଟ ଏହି ଆବେଦନକୁ ପ୍ରତ୍ୟାଖ୍ୟାନ କରିଛନ୍ତି।
ମୈତେଇ ସମ୍ପ୍ରଦାୟର ଏକ ସଂଗଠନ ସୁପ୍ରିମକୋର୍ଟରେ ଏକ ପିଟିସନ ଦାଖଲ କରି କହିଛନ୍ତି ଯେ ମଣିପୁରରେ ଘଟୁଥିବା ହିଂସା ଜାତି ହିଂସା ନୁହେଁ। ଆବେଦନକାରୀ କହିଛନ୍ତି ଯେ ମିଆଁମାରରୁ ଆସୁଥିବା ସଶସ୍ତ୍ର କୁକି ଆତଙ୍କବାଦୀଙ୍କ ଦ୍ୱାରା ନିଶା କାରବାର ଯୋଗୁଁ ଏହି ହିଂସା ଘଟୁଛି। ମଣିପୁରରେ ବେଆଇନ ଭାବେ ଅଫିମ ଚାଷ ଯୋଗୁଁ ଜାତି ହିଂସା ଘଟୁଛି ବୋଲି ଆବେଦନରେ କୁହାଯାଇଛି।
ଏହି ଆବେଦନରେ ମୈତେଇ ସମାଜର ସଂଗଠନ କହିଛି ଯେ ମିଆଁମାରରୁ କ୍ରମାଗତ ଭାବରେ ସୀମା ଅତିକ୍ରମ କରି କୁକି ଆତଙ୍କବାଦୀମାନେ ଜବରଦସ୍ତ ଅଫମ ଚାଷ କରିବାକୁ ଚାହୁଁଛନ୍ତି। ଏହି ଅଭିଯୋଗ ସହିତ ଆବେଦନକାରୀ ଏହି ଘଟଣାର ତଦନ୍ତ ପାଇଁ ଏସଆଇଟି ଗଠନ କରିବାକୁ ଦାବି କରିଛନ୍ତି। ଏହି ଆବେଦନ ଶୁଣାଣି ବେଳେ ସୁପ୍ରିମକୋର୍ଟ କହିଛନ୍ତି ଯେ ଧାରା ୩୨ ଅନୁଯାୟୀ ଦାଖଲ ହୋଇଥିବା ଏହି ଆବେଦନକୁ ଗ୍ରହଣ କରାଯାଇପାରିବ ନାହିଁ। ଏହା ସହ ସୁପ୍ରିମକୋର୍ଟ କହିଛନ୍ତି ଯେ ଆବେଦନକାରୀ ଉପଯୁକ୍ତ ଫୋରମ୍ ପୂର୍ବରୁ ଏହି ପ୍ରସଙ୍ଗ ଉଠାଇବା ଉଚିତ୍।
ସୁପ୍ରିମକୋର୍ଟ ଏହି ଆବେଦନ ଶୁଣିବାକୁ ମନା କରିବା ପରେ ଆବେଦନକାରୀ ଏହି ଆବେଦନ ପ୍ରତ୍ୟାହାର କରିନେଇଛନ୍ତି। ଶୁଣାଣି ସମୟରେ ସୁପ୍ରିମକୋର୍ଟର ପ୍ରଧାନ ବିଚାରପତି ଡି.ଇ ଚନ୍ଦ୍ରଚୁଦ୍ ଆବେଦନକାରୀଙ୍କୁ ତାଙ୍କ ଆବେଦନରେ ଉନ୍ନତି ଆଣିବାକୁ କହିଥିଲେ ଏବଂ ଦୃଢ ତଥ୍ୟ ଯୋଡିବା ପରେ ସେ ପୁନର୍ବାର ଆବେଦନ କରିପାରିବେ। ପ୍ରଧାନ ବିଚାରପତି କହିଛନ୍ତି ଯେ ଏକ ଜନଜାତିଙ୍କୁ ଆତଙ୍କବାଦୀ ବୋଲି କୁହାଯାଉଛି। ଯାହା ଠିକ୍ ନୁହେଁ। ତେଣୁ ଏହି ନିବେଦନ ଶୁଣିବାକୁ ମନା କରିଦେଇଥିଲେ ସୁପ୍ରିମକୋର୍ଟ।
