ଓଡ଼ିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ନର୍ଲା ବ୍ଲକ ଅଧିନସ୍ଥ ସର୍ଗିଗୁଡା ପ୍ରହରୀ ମଣ୍ଡପ ଠାରେ ଜୟଦୁର୍ଗା ସ୍ପୋର୍ଟିଂ କ୍ଲବ ଆନୁକୂଲ୍ୟରେ ପାରମ୍ପାରିକ ବାଟି ଖେଳ ଟୁର୍ଣ୍ଣାମେଣ୍ଟ ଅନୁଷ୍ଠିତ ହୋଇଯାଇଛି । ଏନେଇ ଆୟୋଜିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବିଶିଷ୍ଟ ମୃଦଙ୍ଗ ବାଦକ ଶଶିଦେବ ନାଗ ଯୋଗଦାନ କରି ଟୁର୍ଣ୍ଣାମେଣ୍ଟ କୁ ଆନୁଷ୍ଠାନିକ ଭାବରେ ଉଦ୍ଗାଟନ କରିଥିଲେ । ଏଥିରେ ସର୍ଗିଗୁଡା ୫ ଗୋଟି ସାହିର ୮ ଗୋଟି ଟିମ ଅଂଶ ଗ୍ରହଣ କରିଥିଲେ । ପ୍ରତି ରାଉଣ୍ଡର ମ୍ୟାଚ ପାଇଁ ୧୫ ମିନିଟ ସମୟ ନିର୍ଘଣ୍ଟ ଧାର୍ଯ୍ୟ କରା ଯାଇଥିଲା । ଏଥିରେ “ନେପାଳ ଟାଇଗର” ଟିମ ବିଚକ୍ଷଣ ବାଟି ଖେଳ ପ୍ରଦର୍ଶନ କରି ଏକ ତରଫା ବିଜୟ ହାସଲ କରି ନେଇଥିଲେ । ମାଝୀପଡାର “ରୋଶନ ବୁଲେଟ” ଟିମ ରନର୍ସ ଅଫ୍ ରହିଥିଲେ । ଗାଁର ବରିଷ୍ଠ ନାଗରିକ, ପୂର୍ବତନ ବାଟି ଖେଳାଳୀ ଓ ଯୁବକ ମାନେ ଏହି ଅଭିନବ ଟୁର୍ଣ୍ଣାମେଣ୍ଟକୁ ମନଭରି ଉପଭୋଗ କରିବା ସହ ଖେଳାଳୀ ମାନଙ୍କୁ ଚିୟରଅଫ କରି ଉତ୍ସାହିତ କରିଥିଲେ । କ୍ଲବର ବରିଷ୍ଠ ସଦସ୍ୟ ମାନସ କୁମାର ସା ରେଫରୀ ଭାବରେ ମ୍ୟାଚ ସବୁ ପରିଚାଳନା କରିଥିଲେ । ଉତ୍ତମ ଖେଳାଳୀ ଭାବରେ ଚମ୍ପିଅନ “ଟାଇଗର ଟିମ”ର ନେପାଳ ନାଏକଙ୍କୁ ବେଷ୍ଟ ପ୍ଲେୟାର ଟ୍ରଫି ପ୍ରଦାନ କରାଯାଇଥିଲା । ଚମ୍ପିଅନ ଦଳକୁ ଉପଢୌକନ ସହ ଚମ୍ପିଅନ ଟ୍ରଫି ଓ ଉପବିଜେତା ମାଝୀପଡା “ରକେଟ ଟିମ”କୁ ରନର୍ସ ଅଫ ଟ୍ରଫି ପ୍ରଦାନ କରିଥିଲେ ମୁଖ୍ୟଅତିଥି । ବାଟିଖେଳ ଭଳି ପାରମ୍ପାରିକ ଖେଳକୁ ବଞ୍ଚାଇ ରଖି ଆଜି ବାଟି ଖେଳକୁ ନେଇ ଏକ ଟୁର୍ଣ୍ଣାମେଣ୍ଟର ଆୟୋଜନ କରିଥିବାରୁ ଜୟଦୁର୍ଗା ସ୍ପୋର୍ଟିଂ କ୍ଲବର ସମସ୍ତ ସଦସ୍ୟ ବିଶେଷ କରି ଟୁର୍ଣ୍ଣାମେଣ୍ଟ ପାଇଁ ଚମ୍ପିଅନ ଓ ରନର୍ସ ଅଫ ଟ୍ରଫିର ବ୍ୟବସ୍ଥା କରିଥିବା କ୍ଲବର ବରିଷ୍ଠ ସଦସ୍ୟ କ୍ରୀଡା ପ୍ରେମୀ ଯୁବକ ଉଗ୍ରସେନ ଗଉଡଙ୍କୁ ଓ ଆୟୋଜକ ମଣ୍ଡଳୀଙ୍କୁ ମୁଖ୍ୟ ଅତିଥି ଶ୍ରୀ ନାଗ ଧନ୍ୟବାଦ ଅର୍ପଣ କରିଥିଲେ ।
