ଓଡ଼ିଆ ବାର୍ତ୍ତା/ ବାଲେଶ୍ଵର (କୃଷ୍ଣ କୁମାର ମହାନ୍ତି): ଓଡ଼ିଆ ଉପନ୍ୟାସ ଓ କ୍ଷୁଦ୍ରଗଳ୍ପ ରଚନାରେ ମଗ୍ନ ତଥା ସମସାମୟିକ ଲେଖକ ଓ ପାଠକଙ୍କ ମଧ୍ୟରେ ଆଦୃତ କଥାଶିଳ୍ପୀ ଔପନ୍ୟାସିକ ପଦ୍ମଜ ପାଳ ଚଳିତ ବର୍ଷର ‘ଅକ୍ଷର କଥାକାର ସମ୍ମାନ- ୨୦୨୫’ ପାଇବାକୁ ଯୋଗ୍ୟ ବିବେଚିତ ହୋଇଛନ୍ତି । ଏହି ସମ୍ମାନ ବାଲେଶ୍ବରର ଶିକ୍ଷା ଓ ଜ୍ଞାନର ଦିବ୍ୟଦୃଷ୍ଟି ଅନୁଷ୍ଠାନ ‘ପ୍ରଜାପତି’ର ସାହିତ୍ୟ ଶାଖା ‘ଅକ୍ଷର’ର ଏକ ରାଜ୍ୟସ୍ତରୀୟ ମର୍ଯ୍ୟାଦା ଜନକ ସମ୍ମାନ ।
ଏହା ରାଜ୍ୟର ଜଣେ ବିଶିଷ୍ଟ ତଥା ଯଶସ୍ୱୀ ଗାଳ୍ପିକ, ଔପନ୍ୟାସିକଙ୍କୁ ପ୍ରଦାନ କରାଯାଇ ଓଡ଼ିଆ କଥା ସାହିତ୍ୟ ରଚନାରେ ବ୍ରତୀ ଲେଖକଙ୍କୁ ପ୍ରୋତ୍ସାହନ ଦେବା ଅଭିପ୍ରାୟରେ ଆରମ୍ଭ କରାଯାଇଛି ବୋଲି ପ୍ରଜାପତି ମୁଖ୍ୟ କବି ପ୍ରଶାନ୍ତ ଦାସ ଏକ ପ୍ରେସ ବିବୃତିରେ ଜଣାଇଛନ୍ତି।
ଆସନ୍ତା ଅଗଷ୍ଟ ୨୪ ତାରିଖ ରବିବାର ସନ୍ଧ୍ୟାରେ ସ୍ଥାନୀୟ ଆତିଥ୍ୟ ସମ୍ମିଳନୀ କକ୍ଷରେ ଆୟୋଜିତ ହେଉଥିବା ଏକ ମନୋଜ୍ଞ ସାରସ୍ୱତ ସମାବେଶରେ ଔପନ୍ୟାସିକ ପଦ୍ମଜ ପାଳଙ୍କୁ ଏହି ସମ୍ମାନ ପ୍ରଦାନ କରାଯିବ । ସମ୍ମାନ ସ୍ଵରୂପ ନଗଦ ଅର୍ଥରାଶି, ମାନପତ୍ର, ଉପଢୌକନ ସାଙ୍ଗକୁ ନାଗରିକ ସମ୍ବର୍ଦ୍ଧନା ପ୍ରଦାନ କରାଯିବାର କାର୍ଯ୍ୟକ୍ରମ ରହିଛି।
ଉଲ୍ଲେଖଯୋଗ୍ୟ ଦୀର୍ଘବର୍ଷର ସାହିତ୍ୟ ସାଧନାରେ ଥାଇ ଔପନ୍ୟାସିକ ପଦ୍ମଜ ପାଳ ଏଯାବତ୍ ୨୧ଟି ଉପନ୍ୟାସ ଓ ୧୩ଟି ଗଳ୍ପ ସଂକଳନ ସାଙ୍ଗକୁ ସାହିତ୍ୟର ଅନ୍ୟାନ୍ୟ କ୍ଷେତ୍ରରେ ନିଜର ଲେଖନୀ ଜାରି ରଖି ଓଡ଼ିଆ ଉପନ୍ୟାସ ଓ ଗଳ୍ପ ପିପାସୁ ପାଠକ ମହଲରେ ନିଜର ଏକ ସ୍ଵତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ତାଙ୍କର ରଚିତ ଉପନ୍ୟାସ ‘ଦୁର୍ଗ ପତନର ବେଳ’, ‘ଆମ ସମୟର ଦୁଃଖ’, ‘ପାପ ପରି ନିଜର’, ‘ଜରା ନିବାସ’, ‘ଛାଇଲେଉଟାଣି’ ‘ଅପଦେବତା’ ପ୍ରଭୃତି ସହ ଗଳ୍ପରେ ମଧ୍ୟ ତାଙ୍କର ପୁସ୍ତକ ‘ନିଷିଦ୍ଧ ଅରଣ୍ୟ’, ‘ଈଗଲର ନଖଦନ୍ତ’, ‘ଉତ୍ତର ପୁରୁଷ’, ‘ ମୁହଁସଞ୍ଜ’ ଓ ‘ଧୂଳି ଧୂସରିତ’ ପ୍ରମୁଖ ପାଠକପ୍ରିୟ। ଓଡ଼ିଆ ଗଳ୍ପ ଓ ଉପନ୍ୟାସ ସାହିତ୍ୟକୁ ତାଙ୍କର ଅବଦାନ ଉଲ୍ଲେଖନୀୟ ହସ୍ତାକ୍ଷରରେ ସେ ଜଣେ ପ୍ରିୟ ଓ ଆଦରଣୀୟ ଲେଖକ ଭାବେ ଆଦୃତ ହୋଇଛନ୍ତି ।
ଏହା ପୂର୍ବରୁ ଏହି ସମ୍ମାନ କଥାଶିଳ୍ପୀ ଆର୍ଯ୍ୟଯଜ୍ଞ ଦତ୍ତ ଓ କଥାଶିଳ୍ପୀ ପ୍ରଦୋଷ ମିଶ୍ର ଗ୍ରହଣ କରିଛନ୍ତି ବୋଲି ପ୍ରଜାପତିର ପ୍ରତିଷ୍ଠାତା କବି ପ୍ରଶାନ୍ତ ଦାସ, ଆବାହକ ବିପ୍ଳବ ଦାସମହାପାତ୍ର ଓ ସଂପାଦକ ରାଜେଶ ଗିରି ଜଣାଇଛନ୍ତି ।
