ଓଡ଼ିଆ ବାର୍ତ୍ତା/ ଫରିଦାବାଦ: ବିହାରର ବିଟେକ୍ ଛାତ୍ରୀ ଭର୍ତ୍ତିକା ସିଂ ନିଜ ସ୍ୱପ୍ନକୁ ସାକାର କରିବା ପାଇଁ ହରିୟାଣାର ଫରିଦାବାଦରେ ଏକ ଚା ଦୋକାନ ଖୋଲିଛନ୍ତି । ଭର୍ତ୍ତିକା ସର୍ବଦା ନିଜର ବ୍ୟବସାୟ ଆରମ୍ଭ କରିବାକୁ ଚାହୁଁଥିଲେ । କିନ୍ତୁ ସେ ଷ୍ଟାର୍ଟଅପ୍ ଆରମ୍ଭ କରିବା ପୂର୍ବରୁ ଡିଗ୍ରୀ ସମାପ୍ତ କରିବାକୁ ଚାରି ବର୍ଷ ଅପେକ୍ଷା କରିବାକୁ ଚାହୁଁନଥିଲେ । ସେ ଧୀରେ ଧୀରେ ଆଗକୁ ବଢିବାକୁ ସ୍ଥିର କଲେ ଏବଂ ବିଟେକ ଚାୟବାଲି ( B. Tech Chaiwali) ନାମରେ ନିଜର ଚା ’ଦୋକାନ ଆରମ୍ଭ କଲେ । ବର୍ତ୍ତମାନ ଇନଷ୍ଟାଗ୍ରାମରେ ସ୍ୱାଗ ସେ ଡାକ୍ତର ନାମକ ଏକ ପେଜରେ ପୋଷ୍ଟ କରାଯାଇଥିବା ଏକ ଭିଡିଓରେ ଭର୍ତ୍ତିକା ତାଙ୍କ ଚା ଷ୍ଟଲ ବିଷୟରେ ଆଲୋଚନା କରିଛନ୍ତି ଏବଂ ଏହା ସମ୍ପର୍କରେ ସବିଶେଷ ତଥ୍ୟ ଦେଇଛନ୍ତି । ଭିଡିଓରେ ଭର୍ତ୍ତିକା କହିଛନ୍ତି ଯେ ସେ ଫରିଦାବାଦର ଗ୍ରୀନ୍ ଫିଲ୍ଡ ନିକଟରେ ଏକ ଚା ଦୋକାନ ଖୋଲିଛନ୍ତି ଏବଂ ସନ୍ଧ୍ୟା ୫.୩୦ ରୁ ୯ ଟା ପର୍ଯ୍ୟନ୍ତ ତାଙ୍କ ଷ୍ଟଲ୍ ଖୋଲା ରହୁଛି । ସେ ବିଭିନ୍ନ ପ୍ରକାରର ମସାଲା ଚା ଏବଂ ଲେମ୍ବୁ ଚା କପ ପ୍ରତି ୨୦ ଟଙ୍କା ଏହଂ ସାଧାରଣ ନିୟମିତ ଚା ପ୍ରତି ୧୦ ଟଙ୍କାରେ ବିକ୍ରି କରନ୍ତି । ତାଙ୍କ ଦୋକାନରେ ଏକ ଛୋଟ ଚୁଲା ରହିଛି ଯେଉଁଥିରେ ଏକ ଆଲୁମିନିୟମ୍ କେଟଲି ରଖାଯାଇଛି । ଏଥିରେ ସେ ଚା ପ୍ରସ୍ତୁତ କରି ଲୋକଙ୍କୁ ଗରମ ଚା ଦେଉଛନ୍ତି । ଆଉ ଗ୍ରାହକ ମଧ୍ୟ ଗରମ ଗରମ ଚାର ମଜା ନେଉଥିବା ଏହି ଭିଡିଓରେ ନଜର ଆସୁଛନ୍ତି । ଏହି ଭିଡିଓକୁ ବର୍ତ୍ତମାନ ପର୍ଯ୍ୟନ୍ତ ୫୬ ହଜାରରୁ ଅଧିକ ଥର ଦେଖିଛନ୍ତି ଲୋକେ । ସୋସିଆଲ ମିଡିଆ ବ୍ୟବହାରକାରୀମାନେ ତାଙ୍କର ନିଷ୍ଠା ଏବଂ ପ୍ରୟାସକୁ ପ୍ରଶଂସା କରିଛନ୍ତି । ଜଣେ ଗ୍ରାହକ ଲେଖିଛନ୍ତି, “ଆପଣ ଆସନ୍ତା ଏକ ବର୍ଷ ମଧ୍ୟରେ ଏକ ବ୍ରାଣ୍ଡ ହୋଇଯିବେ।”