ଓଡ଼ିଆ ବାର୍ତ୍ତା/ ଚଣ୍ଡିଗଡ: ସାଙ୍ଘାତିକ ସ୍ଥିତିରେ ଦିଲ୍ଲୀ-ଏନସିଆର ଅଞ୍ଚଳର ବାୟୂ ପ୍ରଦୂଷଣ ମାତ୍ରା । ଏହି କାରଣରୁ ନିଃଶ୍ବାସ ନେବାରେ ବହୁ ଅସୁବିଧା ଭୋଗୁଛନ୍ତି ଦିଲ୍ଲୀବାସୀ । ଏଥିପାଇଁ ଘରୁ ବାହାରିବା ଏବେ ମୁସ୍କିଲ ହୋଇପଡିଛି ଦିଲ୍ଲୀ ଓ ଏହାର ଆଖପାଖ ଅଞ୍ଚଳବାସୀଙ୍କ ପାଇଁ । ଆଉ ଏନେଇ ସରକାରଙ୍କ ପକ୍ଷରୁ ଅନେକ ପଦକ୍ଷେପ ନିଆଯାଉଛି । ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ମଧ୍ୟ ପୁଣି ପଞ୍ଜାବରେ ଜାରି ରହିଛି ନଡା ଜାଳିବା । ଯାହାକୁ ନେଇ ଗତକାଲି (ଶନିବାର) ପଞ୍ଜାବରେ ୬ ଶହ ରୁ ଅଧିକ ନଡା ଜାଳିବା ମାମଲା ରୁଜୁ ହୋଇଛି । ଯାହାଦ୍ବାରା ପୁଣି ଦିଲ୍ଲୀର ବାୟୂ ପ୍ରଦୂଷଣର ସ୍ତର ବୃଦ୍ଧି ନେଇ ଆଶଙ୍କା ରହିଛି ।
ଅନେକ ଜିଲ୍ଲାର କୃଷକମାନେ ଫସଲର ଅବଶିଷ୍ଟାଂଶ ଜାଳିବାରେ ଲାଗିଛନ୍ତି, ଯାହାଫଳରେ କ୍ଷେତରେ ନଡ଼ା ଜାଳିବା ଘଟଣାକୁ ବନ୍ଦ କରିବାକୁ ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ଅବମାନନା କରିଛନ୍ତି । ଯାହାଫଳରେ ବାୟୁ ଗୁଣବତ୍ତା ସୂଚକାଙ୍କ (AQI) ହରିୟାଣା ଏବଂ ପଞ୍ଜାବର ଅନେକ ଅଞ୍ଚଳରେ ‘ଅତ୍ୟନ୍ତ ନିମ୍ନ’ ଏବଂ ‘ନିମ୍ନ’ ଶ୍ରେଣୀରେ ରହିଛି । ଅନେକ ଜିଲ୍ଲାରେ, ଜିଲ୍ଲା ପୋଲିସ ମୁଖ୍ୟ ଏବଂ ଡେପୁଟି କମିଶନରମାନେ ଚାଷ ଜମି ପରିଦର୍ଶନ କରି ନଡ଼ା ପୋଡିଯିବା ଘଟଣା ଉପରେ ନଜର ରଖିଥିଲେ । ଏହା ସତ୍ତ୍ୱେ ମଧ୍ୟ ପଞ୍ଜାବର ଅନେକ କୃଷକମାନେ ନଡ଼ା ଜାଳିବା ଜାରି ରଖିଛନ୍ତି ।
ଦିଲ୍ଲୀ ଏବଂ ଏହାର ଆଖପାଖ ଅଞ୍ଚଳରେ ପ୍ରଦୂଷଣ ସ୍ତର ବୃଦ୍ଧି ମଧ୍ୟରେ ସୁପ୍ରିମକୋର୍ଟ ନଭେମ୍ବର ୭ ତାରିଖରେ ପଞ୍ଜାବ, ହରିୟାଣା, ଉତ୍ତରପ୍ରଦେଶ ଏବଂ ରାଜସ୍ଥାନକୁ ଫସଲ ଅବଶିଷ୍ଟାଂଶ ଜାଳିବା ଉପରେ ତୁରନ୍ତ ପ୍ରତିବନ୍ଧକ ଲଗାଇବାକୁ ନିର୍ଦ୍ଦେଶ ଦେଇଛନ୍ତି । କିନ୍ତୁ ଏହାର ଅବମାନନା କରି ଶନିବାର ପଞ୍ଜାବରେ ଫସଲ ଜମିରେ ନଡ଼ା ଜାଳିବା କାରଣରୁ ୬୩୭ ଟି ମାମଲା ରୁଜୁ ହୋଇଛି ।
ଏଥିମଧ୍ୟରୁ ସର୍ବାଧିକ ୧୨୦ ଟି ମାମାଲା ମୋଗା ଅଞ୍ଚଳରେ ରିପୋର୍ଟ କରାଯାଇଛି । ୨୦୨୧ ଏବଂ ୨୦୨୨ ମସିହାରେ ସମାନ ଦିନରେ ରାଜ୍ୟରେ ପ୍ରାୟ ୭୦୧ ଟି ନଡା ଜାଳିବା ମାମଲା ରୁଜୁ ହୋଇଥିଲା । ସେହିପରି ହରିୟାଣାର ସୋନିପତରେ, ବାୟୁ ଗୁଣାବତ୍ତା ସୂଚକାଙ୍କ (AQI) ୩୯୦ ରେକର୍ଡ କରାଯାଇଛି । ରାଜଧାନୀ ଚଣ୍ଡିଗଡରେ ବାୟୁ ଗୁଣାବତ୍ତା ସୂଚକାଙ୍କ ୧୪୧ ରହିଛି ।
