ଓଡ଼ିଆ ବାର୍ତ୍ତା/ ଟିକ୍ରାପଡ଼ା (ରମାକାନ୍ତ ରାଜପଲିଆ): ସଇଁତଲା ବ୍ଲକ ଟିକ୍ରାପଡ଼ା ଗାଁରେ ଥିବା ଏସବିଆଇ ଏଟିଏମ ମାସେରୁ ଉର୍ଦ୍ଧ୍ୱ କାଳ ହେବ ଅଚଳ ରହିଛି | ଫଳରେ ଉକ୍ତ ଏଟିଏମ ଉପରେ ନିର୍ଭର କରୁଥିବା ଲୋକେ ଟଙ୍କା ଉଠାଣ କରି ନ ପାରି ନାନା ହଇରାଣର ସମ୍ମୁଖୀନ ହେଉଛନ୍ତି | ବିଶେଷତଃ ପେନସନଭୋଗୀ ଓ ମଣ୍ଡିରେ ଖରିଫ ଧାନ, କପା ଆଦି ବିକ୍ରି କରିଥିବା ଚାଷୀ ଧାରକରଜ ସୁଝିବା ପାଇଁ ଟଙ୍କା ଉଠାଣ କରିପାରୁନଥିବା ପ୍ରକାଶ କରିଛନ୍ତି | ଏହି ଏଟିଏମ ଉପରେ ଟିକ୍ରାପଡ଼ାର ୧୫ କିଲୋମିଟର ପରିଧି ମଧ୍ୟରେ ରହିଥିବା ସଇଁତଲା, ମୁରିବାହାଲ, ବେଲପଡ଼ା ବ୍ଲକର ୫୦ରୁ ଉର୍ଦ୍ଧ୍ୱ ଗାଁ ଲୋକଙ୍କ ସମେତ ପଥଚାରୀ ନିର୍ଭର କରିଥାନ୍ତି | ବିଭାଗୀୟ କର୍ତ୍ତୃପକ୍ଷ ଅବିଳମ୍ବେ ପଦକ୍ଷେପ ନେଇ ଅଚଳ ଏଟିଏମକୁ କାର୍ଯ୍ୟକ୍ଷମ କରିବାକୁ ସାଧାରଣରେ ଦାବି ହେଉଛି |