ଜିଲ୍ଲା ପାଇଁ ଖେଳିବାର ଖେଳୁଆଡ଼ ମନୋଭାବ ନା ଟଙ୍କାର ଲାଳସା?
ଓଡ଼ିଆ ବାର୍ତ୍ତା/ କୋରାପୁଟ (ସୁନ୍ଦର କୁମାର ପାଣି): ନିଜ ଜିଲ୍ଲା ପାଇଁ ଖେଳିବା ଜଣେ ଖେଳାଳିଙ୍କ ପାଇଁ ଗର୍ବ ଓ ସମ୍ମାନର ବିଷୟ। ନିଜ ପ୍ରତିଭାକୁ ଜିଲ୍ଲାର ନାମରେ ମଇଦାନରେ ପ୍ରଦର୍ଶନ କରିବା ସହ ନିଜ ଜିଲ୍ଲାର ପ୍ରତିନିଧିତ୍ୱ କରିବା ଖେଳାଳିଙ୍କ ପାଇଁ ଏକ ବଡ଼ ସୁଯୋଗ। କିନ୍ତୁ ଚୟନ ପରେ ଏକାଥରେ ୧୧ ଜଣ ଖେଳାଳି ଜିଲ୍ଲା ପାଇଁ ଖେଳିବାକୁ ମନା କରିବା ଘଟଣା ଏବେ କ୍ରୀଡ଼ା ମହଲରେ ପ୍ରଶ୍ନ ଉଠାଇଛି। ଜିଲ୍ଲା ପ୍ରଶାସନର କ୍ରୀଡ଼ା ବିଭାଗ ପକ୍ଷରୁ ଆୟୋଜିତ ସାହାଣୀ କପ୍ରେ ୧୫୩ ଜଣ ଖେଳାଳି ଯୋଗଦେଇଥିଲେ। ସେମାନଙ୍କ ମଧ୍ୟରୁ ୩୨ ଜଣଙ୍କୁ ଚୟନ କରାଯାଇଥିଲା। ପରେ ଦୁଇଦିନିଆ ଶିବିର ଆୟୋଜନ କରାଯାଇ ଏଥିରୁ ୨୦ ଜଣ ଖେଳାଳିଙ୍କୁ ଜିଲ୍ଲା ପାଇଁ ଖେଳିବାକୁ ଚୟନ କରାଯାଇଥିଲା। ହେଲେ ଏହି ୨୦ ଜଣଙ୍କ ମଧ୍ୟରୁ ୧୧ ଜଣ ଆସନ୍ତା ୨୩ ତାରିଖରୁ ଆରମ୍ଭ ହେଉଥିବା ସାହାଣୀ କପ୍ରେ ଜିଲ୍ଲା ପକ୍ଷରୁ ଖେଳିବାକୁ ମନା କରିଦେଇଥିବା ଜଣାପଡ଼ିଛି। ଜିଲ୍ଲା ପକ୍ଷରୁ ଖେଳିବାକୁ ମନା କରିଥିବା ଖେଳାଳିମାନେ ହେଲେ – ମଧୁ ଯାନୀ, ଜିତୁ ମୁଦୁଲି, ରବି ଢେଲାପଡ଼ିଆ, ମୋନଜ ନାୟକ, ଶଙ୍କର ପୂଜାରୀ, ଆଲବର୍ଟ ହିଆଲ, କମୁଲୁ ଯାନୀ, ଶ୍ରୀକାନ୍ତ ଗଦବା, ସଂଜିତ ଖରା, ଅଭିନାଶ ମୁଦୁଲି ଓ ଆମସ ଭତ୍ରା।
ଏତେ ବଡ଼ ଚୟନ ପ୍ରକ୍ରିୟା ପରେ ଜିଲ୍ଲା ଦଳରେ ସ୍ଥାନ ପାଇଥିବା ଏହି ଖେଳାଳିମାନେ ଶେଷ ପର୍ଯ୍ୟାୟରେ କାହିଁକି ପଛଘୁଞ୍ଚିଲେ? ଏହା ପଛରେ ପ୍ରକୃତ କାରଣ କ’ଣ? ଜିଲ୍ଲା ପ୍ରତି ଖେଳୁଆଡ଼ ମନୋଭାବର ଅଭାବ ନା ଅନ୍ୟ କୌଣସି ସୁଯୋଗ ଓ ଆର୍ଥିକ କାରଣ? ଏଭଳି ଅନେକ ପ୍ରଶ୍ନ ଏବେ କ୍ରୀଡ଼ା ମହଲରେ ଉଠିଛି। ଏନେଇ ଫୁଟବଲ ଗୁରୁ ବାପୁଜୀ ପାତ୍ରଙ୍କୁ ପଚାରିବାରୁ, ସମ୍ପୃକ୍ତ ୧୧ ଜଣ ଖେଳାଳି ଅନ୍ୟ ଜିଲ୍ଲା ପକ୍ଷରୁ ଖେଳିବା ନେଇ ଚର୍ଚ୍ଚା ହେଉଥିବା ସେ କହିଛନ୍ତି। ତେବେ ଏହି ଦାବିର ସ୍ୱାଧୀନ ସତ୍ୟତା ଯାଞ୍ଚ ହୋଇନାହିଁ। ଅନ୍ୟପକ୍ଷରେ, ସମ୍ପୃକ୍ତ ଖେଳାଳିମାନଙ୍କ ସହ ଯୋଗାଯୋଗ କରାଯିବାରୁ ସେମାନେ ପରିବାରର ଆର୍ଥିକ ସମସ୍ୟା ଥିବାରୁ ଜିଲ୍ଲା ପକ୍ଷରୁ ଖେଳିବାକୁ ରାଜି ହେଉନଥିବା କହିଛନ୍ତି। ତେବେ ଖେଳାଳିଙ୍କ ଏହି କାରଣକୁ ନେଇ ମଧ୍ୟ କେତେକ କ୍ରୀଡ଼ାବିତ୍ ପ୍ରଶ୍ନ ଉଠାଇଛନ୍ତି।
କେତେକ କ୍ରୀଡ଼ାବିତ୍ଙ୍କ ମତରେ, ଯଦି ଆର୍ଥିକ ସମସ୍ୟା ହିଁ କାରଣ, ତେବେ ଏହାର ସମାଧାନ ପାଇଁ ଜିଲ୍ଲା ପ୍ରଶାସନ କ’ଣ ପଦକ୍ଷେପ ନେଉଛି, ତାହା ସ୍ପଷ୍ଟ ହେବା ଦରକାର। ଅନ୍ୟପକ୍ଷରେ, ଅନ୍ୟ ଜିଲ୍ଲା ପାଇଁ ଖେଳିବା ନେଇ ଯଦି କୌଣସି ସୁଯୋଗ କିମ୍ବା ଆର୍ଥିକ ପ୍ରଲୋଭନ ରହିଛି, ତେବେ ତାହାର ମଧ୍ୟ ତଦନ୍ତ ହେବା ଆବଶ୍ୟକ। ଜଣେ ଖେଳାଳିଙ୍କ ପାଇଁ ନିଜ ଜିଲ୍ଲାର ପ୍ରତିନିଧିତ୍ୱ କେବଳ ଏକ ଖେଳ ନୁହେଁ, ଏହା ନିଜ ମାଟି ପ୍ରତି ଦାୟିତ୍ୱ ଓ ଗର୍ବର ପ୍ରତୀକ। ତେଣୁ ଚୟନ ପରେ ୧୧ ଜଣ ଖେଳାଳି ଜିଲ୍ଲା ପକ୍ଷରୁ ଖେଳିବାକୁ ମନା କରିବା ପଛରେ ଥିବା ପ୍ରକୃତ କାରଣ କ’ଣ, ତାହା ସାମ୍ନାକୁ ଆସିବା ଆବଶ୍ୟକ। ଜିଲ୍ଲା ପାଇଁ ଖେଳିବାର ଖେଳୁଆଡ଼ ମନୋଭାବ ନାହିଁ, ନା ଟଙ୍କାର ଲାଳସା?—୨୩ ତାରିଖରୁ ଆରମ୍ଭ ହେଉଥିବା ସାହାଣୀ କପ୍ ପୂର୍ବରୁ ଏହି ପ୍ରଶ୍ନ ଏବେ କ୍ରୀଡ଼ା ମହଲରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି।
