କଳାହାଣ୍ଡି, (ହେମନ୍ତ ସାହୁ): ଆଜି ଭୋର ସକାଳୁ କଳାହାଣ୍ଡି ଜିଲ୍ଲା ମ. ରାମପୁର ଥାନା ଅନ୍ତର୍ଗତ ଚାରିଛକ ନିକଟରେ ଥିବା ମାଛି ବନ୍ଧ ପୋଖରୀରୁ ଏକ ବ୍ୟକ୍ତିଙ୍କ ଶବ ଉଦ୍ଧାର କରାଯାଇଛି । ସୂଚନା ଅନୁସାରେ, ନିକଟସ୍ଥ ଚାରିଛକରେ ଏକ ହୋଟେଲ କରି ରହୁଥିବା ହରିହର ନାଥ(୫୩) ଗତକାଲି ରାତି ପ୍ରାୟ ନଟାରୁ ଘରୁ କୁଆଡ଼େ ଯାଇଥିଲେ । ଭାଇମାନେ ରାତିରେ ତାଙ୍କୁ ଖୋଜାଖୋଜି କରିଥିଲେ ହେଁ ତାଙ୍କୁ ପାଇନଥିଲେ । ଆଜି ସକାଳୁ ନିକଟସ୍ଥ ମାଛିବନ୍ଧଠାରେ ଏକ ଶବ ଭାସୁଥିବାର ଦେଖିବାକୁ ପାଇ ଲୋକେ ପରିବାର ଲୋକଙ୍କୁ ଖବର ଦେବା ସହିତ ଅଗ୍ନିଶମ ବିଭାଗକୁ ଖବର ଦିଆଯାଇଥିଲା । ଅଗ୍ନିଶମ ବିଭାଗ ପୋଲିସର ଉପସ୍ଥିତିରେ ଶବକୁ ଉଦ୍ଧାର କରିଥିବାବେଳେ ଶବଟି ହରିହରଙ୍କର ବୋଲି ଜଣାପଡ଼ିଥିଲା । ପରେ ମ. ରାମପୁର ଡ଼ାକ୍ତରଖାନାରେ ଶବବ୍ୟବଚ୍ଛେଦ୍ଦ କରି ପରିିବାର ବର୍ଗଙ୍କୁ ଶବ ହସ୍ତାନ୍ତର କରାଯାଇଥିଲା । ତେବେ ମୃତକଙ୍କ ଘର ଯାଜପୁର ଜିଲ୍ଳାରେ ହେଇଥିବାବେଳେ ତାଙ୍କରି ଅନ୍ୟଦୁଇ ଭାଇଙ୍କ ସହିତ ସେ ଗତ ପ୍ରାୟ ଦଶବର୍ଷ ହେଲା ମ. ରାମପୁରଠାରେ ଏକ ହୋଟେଲ କରି ରହୁଥିଲେ । ମ. ରାମପୁର ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଥିବା ଜଣାଯାଇଛି ।
