● ଟାୱାର ନିର୍ମାଣକୁ ନେଇ ରିଲାଏନ୍ସ ଜିଓ ଟିମ ପକ୍ଷରୁ ଜାଗା ଚିହ୍ନଟ
ରାୟଗଡା, (ଶିବ ନାରାୟଣ ଗୈାଡ): ଦୀର୍ଘ ଦିନର ଦାବି ଏବେ ସଫଳ ହେବାକୁ ବସିଛି । ଯାହାକୁ ନେଇ ରାୟଗଡା ଜିଲ୍ଳା ମୀରାବାଲି ଓ ଦୁର୍ଗାପାଡୁ ପଂଚାୟତ ସମେତ ଆହୁରି ୬ଗୋଟି ପଂଚାୟତବାସୀଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି । ଦୁର୍ଗମ ପାହାଡିଆ ଅଂଚଳରେ ରହୁଥିବା ଆଦିବାସୀଙ୍କ ମୁହଁରେ ଖୁସିର ଲହରୀ ଦେଖିବାକୁ ମିଳିଛି । ନେଟୱାର୍କିଂ ସୁବିଧା ନିମନ୍ତେ ରିଲାଏନ୍ସ ଜିଓ ପକ୍ଷରୁ ଏକ ସ୍ୱତନ୍ତ୍ରୀ ଟିମ୍ ଓଡିଶା-ଆନ୍ଧ୍ର ସୀମାନ୍ତ ରାୟଗଡା ଜିଲ୍ଳାର ମୀରାବାଲି ଓ ଦୁର୍ଗାପାଡୁ ପଂଚାୟତର ବିଭିନ୍ନ ଗାଁକୁ ଯାଇ ଟାୱାର ନିର୍ମାଣ ପାଇଁ ଜାଗା ଚିହ୍ନଟ କରିଛନ୍ତି । ଦୁର୍ଗାପାଡୁ ପଂଚାୟତର ସଦର ଦୁର୍ଗାପାଡୁ ଓ ପାଲମତୁଳସୀ ଏବଂ ମୀରାବାଲି ପଂଚାୟତର ମୀରାବାଲି ଓ ଜିମ୍ବାକୁଟିକାଣା ଠାରେ ଜାଗା ଚିହ୍ନଟ କରାଯାଇଛି । ସ୍ୱତନ୍ତ୍ର ଟିମର ଜାଗା ଚିହ୍ନଟକୁ ପଂଚାୟତବାସୀ ସ୍ୱାଗତ କରିବା ସହ ସମସ୍ତଙ୍କ ମୁହଁରେ ହସ ଖେଳି ଯାଇଛି ।
ପ୍ରକାଶ ଥାଉ କି, ରାୟଗଡା ଜିଲ୍ଳା ସଦର ବ୍ଳକର ମୀରାବାଲି, ଦୁର୍ଗାପାଡୁ, ପିପଲଗୁଡା, ଡାଙ୍ଗଲୋଡି, କାରୁବାଇ, ବାଇସିଂ, ବଡଆଲୁବାଡି, କୁଲି ଆଦି ୮ଗୋଟି ଦୁର୍ଗମ ପଂଚାୟତରେ ଦୀର୍ଘ ବର୍ଷ ହେଲା ନେଟୱାର୍କିଂ ବ୍ୟବସ୍ଥା ନ ଥିବାରୁ ପଂଚାୟତବାସୀ ଜରୁରୀକାଳନୀ ସମୟରେ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି । ବିଶେଷ କରି ଜରୁରୀକାଳୀନ ସ୍ୱାସ୍ଥ୍ୟ ସେବା ଠାରୁ ଆରମ୍ଭ କରି ଅନ୍ୟ ସମସ୍ତ ସେବା ପାଇବା କ୍ଷେତ୍ରରେ ପ୍ରଶାସନିକ, ପୋଲିସ, ଅଗ୍ନିଶମ ଅଧିକାରୀମାନଙ୍କୁ ଯୋଗାଯୋଗ କରିପାରୁ ନ ଥିବାରୁ ନାହିଁ ନ ଥିବା କଷ୍ଟ ଭୋଗୁଛନ୍ତି । ଯାହାକୁ ନେଇ ଉକ୍ତ ପଂଚାୟତଗୁଡିକରେ ନେଟୱାର୍କର ବ୍ୟବସ୍ଥା କରିବା ପାଇଁ ଆଦିବାସୀ ଯୁବ ସମାଜ ପକ୍ଷରୁ ଦୀର୍ଘ ଦିନ ଧରି ପ୍ରଶାସନ ଠାରେ ଦାବି ହୋଇ ଆସୁଛି । ବର୍ତମାନ ଜିଓ ଟିମ୍ ପକ୍ଷରୁ ଜାଗା ଚିହ୍ନଟ ହୋଇଥିବା ନେଇ ଆଦିବାସୀ ଯୁବ ସମାଜ ସଭାପତି ତଥା ଯୁବନେତା ପ୍ରତାପ ପୁଆଲା ସୂଚନା ପ୍ରଦାନ କରିଛନ୍ତି ।
