ଓଡ଼ିଆ ବାର୍ତ୍ତା/ ମସ୍କୋ|କ୍ୱିଭ|ନୂଆଦିଲ୍ଲୀ: ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ୟୁକ୍ରେନ ବିରୋଧରେ ଯୁଦ୍ଧ ଘୋଷଣା କରିଛନ୍ତି । ଇତି ମଧ୍ୟରେ ରୁଷ ଏବଂ ୟୁକ୍ରେନ ମଧ୍ୟରେ ପରିସ୍ଥିତି ଅତ୍ୟନ୍ତ ତିକ୍ତ ହୋଇପଡିଛି । ନ୍ୟୁଜ୍ ଏଜେନ୍ସି ରଏଟର୍ସ ରିପୋର୍ଟ କରିଛି ଯେ, ରୁଷୀୟ ସୈନ୍ୟମାନେ ମାରାତ୍ମକ ଅସ୍ତ୍ରଶସ୍ତ୍ର, ଟ୍ୟାଙ୍କ ଏବଂ ଆର୍ଟିଲିରି ସହିତ ପୂର୍ବ ୟୁକ୍ରେନରେ ପ୍ରବେଶ କରିଛନ୍ତି । ଏଥି ସହିତ, ଖବର ଅଛି ଯେ ରୁଷର ସୈନ୍ୟମାନେ ବର୍ତ୍ତମାନ ପୂର୍ବ ୟୁକ୍ରେନରେ ସେମାନଙ୍କର ନୂତନ ବେସ ନିର୍ମାଣ କରିବାକୁ ନିଷ୍ପତ୍ତି ନେଇଛନ୍ତି । ରୁଷ ପୂର୍ବ ୟୁକ୍ରେନର ଡୋନେଟସ୍କ ଏବଂ ଲୁଙ୍ଗସ୍କକୁ ସ୍ୱାଧୀନ ରାଜ୍ୟ ଭାବରେ ଘୋଷଣା କରି ମିଙ୍ଗସ୍କ ଚୁକ୍ତି ଭଙ୍ଗ କରିଛି ଏବଂ ରୁଷର ଏହି ପଦକ୍ଷେପ ବିରୋଧରେ ଆମେରିକା ନୂତନ ପ୍ରତିବନ୍ଧକ ଘୋଷଣା କରିଛି । ରୁଷ ରାଷ୍ଟ୍ରପତିଙ୍କ ଯୁଦ୍ଧ ଘୋଷଣା ପରେ ୟୁକ୍ରେନ ଦାବି କରିଛି ଯେ ଏହାର ରାଜଧାନୀରେ ବାଲିଷ୍ଟିକ୍ କ୍ଷେପଣାସ୍ତ୍ର ଦ୍ୱାରା ଆକ୍ରମଣ ହୋଇଛି । ରୁଷ ଯୁଦ୍ଧ ଘୋଷଣା କରିବା ପରେ ଏହା ବିଶ୍ୱଯୁଦ୍ଧ ଆଡ଼କୁ ମୁହାଁଇ ପାରେ ବୋଲି ଆଶଙ୍କା ରହିଛି ।
