ଗୃହକର୍ତ୍ତା ଉଠି ପଡିବାରୁ ଚମ୍ପଟ ମାରିଲେ ଚୋର
ଓଡ଼ିଆ ବାର୍ତ୍ତା/ କଳାହାଣ୍ଡି (ସୁଶାନ୍ତ କୁମାର ଦଳେଇ): ଗୋଲାମୁଣ୍ଡା ଥାନା ଅନ୍ତର୍ଗତ ଧାମନପୁର ଗାଁରେ ରହୁଥିବା ଗୋଲାମୁଣ୍ଡା ବ୍ଲକ ଶିକ୍ଷାଧିକାରୀ ନବ କିଶୋର ସାହୁଙ୍କ ଘରୁ ଗତ କାଲି ବିଳମ୍ବିତ ରାତିରେ ତାଲାଭାଙ୍ଗି ଚୋରି ଉଦ୍ୟମ ହୋଇ ଥିବା ଅଭିଯୋଗ ହୋଇଛି । ମିଳିଥିବା ଅଭିଯୋଗ ଅନୁଯାୟୀ ବିଇଓ ଶ୍ରୀ ସାହୁ ଓ ତାଙ୍କ ପତ୍ନୀ ଘରେ ଶୋଇଥିବା ସମୟରେ କିଛି ଶବ୍ଦ ଶୁଣିଥିଲେ । ତେବେ ସେ ଶୋଇଥିବା କୋଠରୀରୁ ପଦାକୁ ବାହାରିବାକୁ ଉଠିବା ବେଳେ କୋଠରି କବାଟ ବାହାର ପଟୁ ବନ୍ଦ ଥିବାରୁ ଘରେ ଚୋର ପଶିଥିବା ସନ୍ଦେହ କରିଥିଲେ । ସେ ସଙ୍ଗେ ସଙ୍ଗେ ନିକଟ ସମ୍ପର୍କୀୟଙ୍କୁ ଫୋନ କରି ଡାକିବାରୁ ଚୋର ମାନେ ଚମ୍ପଟ ମାରିଥିଲେ । ସମ୍ପର୍କୀୟମାନେ ଘର କବାଟ ଖୋଲି ତାଙ୍କୁ ଉଦ୍ଧାର କରିଥିଲେ । ଚୋରମାନେ ପ୍ରଥମେ ବାଡ ଭାଙ୍ଗି ହତାମଧ୍ୟକୁ ପଶିଥିଲେ । ପରେ ଗ୍ରିଲ ତାଲା କାଟି ଘରେ ପଶି ତାଙ୍କ ପୁଅ ବୋହୁ ଶୋଇବା କୋଠରୀ ତାଲା ଭାଙ୍ଗି ଭିତରେ ଥିବା ଆଲମିରାକୁ ମଧ୍ଯ ଭାଙ୍ଗି ଥିଲେ କିନ୍ତୁ ଗୃହକର୍ତ୍ତା ଉଠି ପଡିବା ଯୋଗୁଁ ଚୋରମାନେ କିଛି ନେଇ ନପାରି ଚମ୍ପଟ ମାରିଥିଲେ । ଏ ସମ୍ପର୍କରେ ଗୋଲାମୁଣ୍ଡା ଥାନାରେ ଏକ ଅଭିଯୋଗ କରିଥିବା ଶ୍ରୀ ସାହୁ ସୂଚନା ଦେଇଛନ୍ତି । ଏନେଇ ଅଞ୍ଚଳବାସୀଙ୍କ ମହଲରେ ଛନକା ପଶିଛି । ଗୋଲାମୁଣ୍ଡା ଥାନା ଅଞ୍ଚଳରେ ରାତିରେ ପୋଲିସ ପହରା ବ୍ୟବସ୍ଥାକୁ କଡାକଡି କରିବାକୁ ଦାବି ହେଉଛି ।
