ଓଡ଼ିଆ ବାର୍ତ୍ତା/ ବାଲେଶ୍ୱର (କୃଷ୍ଣ କୁମାର ମହାନ୍ତି): ମିଶନ ଶକ୍ତି ବିଭାଗ ଓ ବାଲେଶ୍ୱର ଜିଲ୍ଲା ପ୍ରଶାସନଙ୍କ ଯୁଗ୍ମ ପ୍ରୟାସରେ ସୁଭଦ୍ରା ଶକ୍ତି ମେଳା–୨୦୨୬ ଆୟୋଜିତ ହେଉଥିବା ବିଷୟ ଜିଲ୍ଲା ପ୍ରଶାସନ ପକ୍ଷରୁ ଆଜି ଆହୂତ ଏକ ସାମ୍ବାଦିକ ସମ୍ମିଳନୀରେ କୁହାଯାଇଛି। ଏହି ମେଳା ଗ୍ରାମୀଣ ଉତ୍ପାଦକ, କାରିଗର, ସ୍ୱୟଂସହାୟକ ଗୋଷ୍ଠୀ ଓ ପ୍ରଯୋଜକ ଗୋଷ୍ଠୀମାନଙ୍କୁ ତାଙ୍କ ଉତ୍ପାଦ ପ୍ରଦର୍ଶନ ଓ ବିକ୍ରୟ ପାଇଁ ବୃହତ୍ ବଜାର ସୁଯୋଗ ଯୋଗାଇବ। ଏହା ମାଧ୍ୟମରେ ଗ୍ରାମୀଣ ଉତ୍ପାଦକମାନେ ସହରୀ ଗ୍ରାହକଙ୍କ ରୁଚି ଓ ପସନ୍ଦ ବିଷୟରେ ଅବଗତ ହୋଇ ଉତ୍ପାଦର ଗୁଣତ୍ୱ, ଡିଜାଇନ୍ ଓ ପ୍ୟାକେଜିଙ୍ଗରେ ଉନ୍ନତି କରିପାରିବେ।
ରାଜ୍ୟ ସରକାରଙ୍କ ନିର୍ଦ୍ଦେଶାନୁସାରେ ଏହି ମେଳା ୨୨ ଫେବୃଆରୀରୁ ୨୮ ଫେବୃଆରୀ ୨୦୨୬ ପର୍ଯ୍ୟନ୍ତ ଆୟୋଜିତ ହେବ। ଏହାର ମୁଖ୍ୟ ଉଦ୍ଦେଶ୍ୟ ହେଉଛି ଭାରତ ସରକାରଙ୍କ ବିଭିନ୍ନ ଦାରିଦ୍ର୍ୟ ନିବାରଣ କାର୍ଯ୍ୟକ୍ରମ ଅଧୀନରେ ସହାୟତାପ୍ରାପ୍ତ ଗ୍ରାମୀଣ ଉତ୍ପାଦକ ଓ କାରିଗରମାନଙ୍କୁ ବଜାର ସୁଯୋଗ ପ୍ରଦାନ କରିବା ସହ ‘ଭୋକାଲ୍ ଫର୍ ଲୋକାଲ୍’ ଧାରଣାକୁ ଉତ୍ସାହିତ କରିବା।
ଏହି ମେଳାରେ ଓଡ଼ିଶାର ସମସ୍ତ ଜିଲ୍ଲାରୁ ୨୦୦ଟି ଷ୍ଟଲ୍ ରହିବ। ହସ୍ତଶିଳ୍ପ ଓ ହସ୍ତତନ୍ତର ଲାଇଭ୍ ପ୍ରଦର୍ଶନ, ବିଭିନ୍ନ ସରକାରୀ ବିଭାଗର ଆଇଇସି ଷ୍ଟଲ୍, ୩୦ଟି ଷ୍ଟଲ୍ ସହିତ ଖାଦ୍ୟ ପ୍ରାଙ୍ଗଣ, ସେଲ୍ଫି ପଏଣ୍ଟ, ପାରମ୍ପରିକ ହସ୍ତତନ୍ତ ଓ ହସ୍ତଶିଳ୍ପ ଆଧାରିତ ଫ୍ୟାଶନ୍ ଶୋ, କାର୍ଯ୍ୟଶାଳା ଓ ପ୍ରଶିକ୍ଷଣ କାର୍ଯ୍ୟକ୍ରମ ସାଙ୍ଗକୁ ଓଲିଉଡ୍ ତାରକାମାନଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ମେଳାକୁ ଆକର୍ଷଣୀୟ କରିବ। ଟେରାକୋଟା, ଟ୍ରାଇବାଲ୍ ଜୁଏଲେରୀ, ଡୋକ୍ରା କାଷ୍ଟିଂ, କପାସ ହସ୍ତତନ୍ତ ଉତ୍ପାଦ, କେନ୍ଦୁଝରୀ ଫୁଲ ବଡ଼ି, ଶୁଖିଲା ମାଛ, ମସଲା ଓ ଓଡ଼ିଶାର ବନଜାତ ଉତ୍ପାଦ ମେଳାରେ ଉପଲବ୍ଧ ହେବ।
ଜିଲ୍ଲା ସ୍ତରରେ ୬ଟି ବଜେଟ୍ ଓ ୨ଟି ଅଣବଜେଟ୍ ଶ୍ରେଣୀରେ ପ୍ରତ୍ୟେକରେ ୩ଟି କରି ପୁରସ୍କାର ଦିଆଯିବ। ବଜେଟ୍ ଶ୍ରେଣୀରେ ସର୍ବଶ୍ରେଷ୍ଠ କୃଷି ଓ ଅଣକୃଷି ଉତ୍ପାଦ, ସର୍ବଶ୍ରେଷ୍ଠ ପ୍ୟାକେଜିଙ୍ଗ୍ ଓ ପ୍ରଦର୍ଶନ, ସର୍ବଶ୍ରେଷ୍ଠ ଗ୍ରାହକ ବ୍ୟବହାର, ଏସଏଚଜି ଉତ୍ପାଦରେ ନବୀନତା ଓ ସର୍ବଶ୍ରେଷ୍ଠ ଷ୍ଟଲ୍ ପୁରସ୍କୃତ ହେବ। ଅଣବଜେଟ୍ ଶ୍ରେଣୀରେ ଏସଏଚଜି କ୍ରେଡିଟ୍ ଲିଙ୍କେଜରେ ସର୍ବଶ୍ରେଷ୍ଠ ବ୍ୟାଙ୍କ ଓ ବ୍ଲକ୍, ଏବଂ ଲକ୍ଷପତି ଦିଦି, ସ୍ୱଦେଶୀ ସଂକଳ୍ପ ଅଭିଯାନ ଓ ବ୍ୟକ୍ତିଗତ ଉଦ୍ୟମୀ ସୃଷ୍ଟିରେ ସର୍ବଶ୍ରେଷ୍ଠ ବ୍ଲକ୍ ଚୟନ କରାଯାଇ ପୁରସ୍କୃତ କରାଯିବ। ଆଜିର ଏହି ସାମ୍ବାଦିକ ସମ୍ମିଳନୀରେ ଅତିରିକ୍ତ ଜିଲ୍ଲାପାଳ ସୁଧାକର ନାୟକ, ସୂଚନା ଓ ଲୋକ ସମ୍ପର୍କ ଅଧିକାରୀ ପ୍ରିୟଦର୍ଶୀ ରାଜେଶ, ଡିଏସଡବ୍ଲ୍ୟୁଓ ଜ୍ୟୋତ୍ସ୍ନାରାଣୀ ମହାନ୍ତି, ଡେପୁଟି ସିଇଓ, ଅରମାସ ଶାନ୍ତନୁ ବାନାର୍ଜୀ ଓ ଡିପିସି, ମିଶନ ଶକ୍ତି କାର୍ତ୍ତିକ ଚନ୍ଦ୍ର ନାୟକ ଉପସ୍ଥିତ ଥିଲେ।
ଜିଲ୍ଲା ପ୍ରଶାସନ ଆଶାପୋଷଣ କରିଛନ୍ତି ଯେ ସୁଭଦ୍ରା ଶକ୍ତି ମେଳା–୨୦୨୬ ଗ୍ରାମୀଣ ଅର୍ଥନୀତିକୁ ସୁଦୃଢ଼ କରିବା ସହ ମହିଳା ସଶକ୍ତିକରଣ ଓ ସ୍ୱଦେଶୀ ଉତ୍ପାଦ ପ୍ରଚାରରେ ଗୁରୁତ୍ୱପୂର୍ଣ୍ଣ ପଦକ୍ଷେପ ପ୍ରମାଣିତ ହେବ।
