ଗୁଣୁପୁର: ମାରାତ୍ମକ କର୍କଟ ରୋଗରେ ପୀଡିତ ହୋଇ ଶେଷରେ ଚିକିତ୍ସାଧୀନ ଅବସ୍ଥାରେ କଟକ ଆଚାର୍ଯ୍ୟ ହରିହର ଆଞ୍ଚଳିକ ଗବେଷଣା କେନ୍ଦ୍ରରେ ଜୀବନ ଯୁଦ୍ଧରେ ହାରିଗଲେ ପ୍ରଣତି ପାତ୍ର । ପ୍ରଣତି ହେଉଛନ୍ତି ଗୁଣୁପୁର କରାବାଙ୍କ ନିବାସୀ ତଥା ଓଏନଏ ଗଣମାଧ୍ୟମ ପ୍ରତିନିଧିଙ୍କ ବଡ଼ଭଉଣୀ । ସେ ଜଣେ ମିଷ୍ଟଭାଷୀ, ମେଳାପୀ ଓ ଧର୍ମ ପରାୟଣ ମହିଳା ଭାବେ ଅଞ୍ଚଳରେ ବେଶ ପରିଚିତ । ଦୀର୍ଘ ଏକ ବର୍ଷଧରି ସେ କର୍କଟ ରୋଗରେ ପୀଡିତ ହୋଇ ଭୁବନେଶ୍ୱର ଏମ୍ସରେ ଚିକିତ୍ସିତ ହୋଇ ଘରକୁ ଫେରି ଥିଲେ । ଘରେ କାମ କରୁଥିବା ବେଳେ ତଳେ ପଡିଯାଇ ତାଙ୍କ ଡାହାଣ ହାତ ଭାଙ୍ଗି ଯାଇଥିଲା । ଏହି ମାରାତ୍ମକ ରୋଗ ଧୀରେ ଧୀରେ ତାଙ୍କ ହାତକୁ ପ୍ରଭାବିତ କରିଥିଲା । ଗୁରୁବାର ପ୍ରଥମେ ତାଙ୍କୁ ଗୁଣୁପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ପରେ ଉଚ୍ଚ ଚିକିତ୍ସା ପାଇଁ ବ୍ରହ୍ମପୁର ଓ କଟକ ଗୋଟିଏ ଦିନରେ ହିଁ ସ୍ଥାନାନ୍ତରିତ କରାଯାଇଥିଲା । ଏଥିରେ ଗୁଣୁପୁର ଓ ରାୟଗଡା ମିଡ଼ିଆ କେୟାରର ସଦସ୍ୟ ମାନେ ଅକ୍ଲାନ୍ତ ପରିଶ୍ରମ ଓ ଯୋଗ ସୂତ୍ର ରକ୍ଷାକରି କଟକରେ ଭର୍ତ୍ତି ଠାରୁ ଆରମ୍ଭ କରି ଚିକିତ୍ସା ସେବା ଯୋଗାଇ ଦେବା ଯାଏଁ ରାୟଗଡା, ବ୍ରହ୍ମପୁର ଓ କଟକ ମିଡ଼ିଆ କେୟାର ସମସ୍ତ ଦାୟିତ୍ୱ ସୁଚାରୁ ରୂପେ ତୁଲାଇ ଥିଲେ । ଶୁକ୍ରବାର ଅପରାହ୍ନରେ ଚିକିତ୍ସିତ ଅବସ୍ଥାରେ ତାଙ୍କ ମୃତ୍ୟୁ ହୋଇଥିବା ବେଳେ, ତାଙ୍କ ମର ଶରୀରକୁ ଗୁଣୁପୁର ସ୍ଥିତ ନିଜ ବାସଭବନ ଶୁକ୍ରବାର ମଧ୍ୟ ରାତ୍ରିରେ ପହଁଚିବା ପରେ କରାବାଙ୍କ ସ୍ଥିତ ଶ୍ୱଶାନ ଘାଟରେ ଶେଷକୃତ୍ୟ ସଂମ୍ପନ୍ନ କରାଯାଇଛି । ଏହି ଶେଷକୃତ୍ୟ ସମୟରେ ତାଙ୍କ ବଡ଼ ଭାଇ ପ୍ରବୀର ପାତ୍ର ଓ ଭାଉଜ, ଛୋଟ ଭାଇ ପ୍ରଣବ ପାତ୍ର, ମାଆ ପ୍ରମିଳା ପାତ୍ର, ଅଶୋକ ପାତ୍ର, ଅନନ୍ତ ପାତ୍ରଙ୍କ ସମେତ ଗୁଣୁପୁର ର ସମସ୍ତ ଗଣମାଧ୍ୟମ ପ୍ରତିନିଧିମାନେ ଉପସ୍ଥିତ ଥିଲେ। ତାଙ୍କ ପରିବାରକୁ କିଭଳି ଅଧିକ ସାହାଯ୍ୟ ସହଯୋଗ କରାଯାଇ ପାରିବ ମିଡିଆ କେୟାର ତାର ସମସ୍ତ ଉଦ୍ୟମ ଜାରି ରଖିଛନ୍ତି।