ଓଡ଼ିଆ ବାର୍ତ୍ତା/ କଳାହାଣ୍ଡି (ନିଲେଶ କୁମାର ନାଗ): ପଶ୍ଚିମ ଓଡ଼ିଶାର ଅନ୍ୟତମ ମହାନ ଗଣପର୍ବ ପୁଷପୁନି ଆଜି କଳାହାଣ୍ଡିର ୧୩ଟି ଯାକ ବ୍ଲକରେ ହର୍ଷ ଉଲ୍ଲାସର ସହ ପାଳିତ ହୋଇଯାଇଛି । ଏହାକୁ ନେଇ ଗାଁ ଗାଁରେ ପାର୍ବଣର ମାହୋଲ ଦେଖିବାକୁ ମିଳିଛି । ପୂର୍ବରୁ ଚାଲି ଆସିଥିବା ଏହି ପର୍ବକୁ ଗ୍ରାମାଞ୍ଚଳର ଛୋଟ ଛୋଟ ପିଲାମାନେ ଛେରଛେରା ମାଗିବାସହ ପାଳନ କରିଛନ୍ତି । ଯୁବକ ଓ ବୟସ୍କମାନେ ମଧ୍ୟ ଗ୍ରାମର ଗୈାନ୍ତିଆ ଓ ପ୍ରତିଷ୍ଠିତ ବ୍ୟକ୍ତି ବିଶେଷଙ୍କ ଘରକୁ ଯାଇ ଛେରଛେରା ମାଗି ଆନନ୍ଦିତ ହୋଇଛନ୍ତି । ବଣଭୋଜି ଓ ଖୁସିର ମାହୋଲ ମଧ୍ୟରେ ପାଳିତ ହୋଇଛି ପୁଷପୁନି । ଘରେ ଘରେ ମଣ୍ଡାପିଠା ପ୍ରସ୍ତୁତ ହୋଇ ସାଇପଡିଶାଙ୍କୁ ବଣ୍ଟନ ହୋଇଥିବା ଦେଖିବାକୁ ମିଳିଛି । ସାନବଡ, ଧନି ଗରୀବ, ଉଚ୍ଚ ନିଚ୍ଚ ନିର୍ବିଶେଷରେ ସମସ୍ତେ ପୁଷପୁନିକୁ ମର୍ଯ୍ୟଦାର ସହ ପାଳନ କରିଛନ୍ତି । ପୁଷପୁନି ସହ କୃଷିଜୀବୀ ଓ ଶ୍ରମଜୀବୀ ସମାଜର ସଂପୃକ୍ତି ରହିଛି । ତେଣୁ ଏହି ଦିନ ଅନ୍ୟାନ୍ୟ କୃଷି ଭିତ୍ତିକ ପର୍ବପରି ନିଜର ସ୍ବାତନ୍ତ୍ରତା ପ୍ରତିପାଦନ କରିଥାଏ । ପୂର୍ବକାଳରେ ମହାଜନ ଓ ଗଉନ୍ତିଆମାନଙ୍କ ଘରେ ହଳିଆମାନେ ଚୁକ୍ତି ଭିତ୍ତିକ ଭାବରେ ବର୍ଷକ ପାଇଁ କାମ କରୁଥିଲେ । ପୁଷପୁନି ଦିନ ସେମାନେ କାମରୁ ମୁକ୍ତି ପାଉଥିଲେ । ଏହାପରେ କିଛି ଦିନ ମଉଜ ମଜଲିସରେ ବିତାଇବା ପରେ ଶ୍ରମଜୀବୀମାନେ ପୂର୍ବର ମହଜନ କିମ୍ବା ନୂତନ ମହାଜନଙ୍କ ପାଖରେ ପୁଣି ବର୍ଷକ ପାଇଁ ଚୁକ୍ତିକରି ଚାଷକାର୍ଯ୍ୟ କରୁଥିଲେ । ପୁଷପୁନି ଶ୍ରମଜୀବୀଙ୍କ ପାଇଁ ମୁକ୍ତିର ଦିନ ହୋଇଥିବାରୁ ସେମାନେ ଏହାକୁ ଅତି ଆନନ୍ଦର ସହ ପାଳନ କରୁଥିଲେ । ପୁଷପୁନିର ତିନି ଦିନ ଧରି ମାଛମାଂସ ଓ ମଦ ଖାଇ ପରିବାର ସହ ହସଖୁସିରେ କଟାଇବାପରେ ପୁଣିଥରେ ନିଜ କାମରେ ଲାଗି ଯାଉଥିଲେ ଶ୍ରମଜୀବୀ । ବର୍ତ୍ତମାନ ଏହି ପ୍ରଥା ଆଉ ନଥିଲେ ମଧ୍ୟ ପୂର୍ବ ପରମ୍ପରାକୁ ବଜାୟ ରଖିବାପାଇଁ ଘରେ ଘରେ ପିଠାପଣା ଓ ବଣଭୋଜିର ଆସର ଦେଖାଯାଉଛି । ଏହାସହ ଛେରଛେରା ମାଗିବା ପ୍ରଥା ମଧ୍ୟ ଅନୁସୃତ ହୋଇ ଆସୁଛି । ଅନ୍ୟପକ୍ଷରେ ପୁଷପୁନି ପଶ୍ଚିମାଞ୍ଚଳର ଏକ ପ୍ରମୁଖ ପର୍ବ ହୋଇଥିଲେ ମଧ୍ୟ ରାଜ୍ୟ ସରକାର ଏହି ଦିନକୁ ଛୁଟି ଘୋଷଣା କରୁନାହାନ୍ତି ତେଣୁ ପଶ୍ଚିମ ଓଡ଼ିଶା ସାରା ଅସନ୍ତୋଷର ବାତାବରଣ ଦେଖାଯାଇଛି । ତେଣୁ ଆଗାମୀ ବର୍ଷଠାରୁ ପୁଷପୁନି ଦିନକୁ ସରକାରୀ ଛୁଟି ଘୋଷଣା କରିବାକୁ ବିଭିନ୍ନ ମହଲରୁ ଦାବୀ ହୋଇଛି।
