ଓଡ଼ିଆ ବାର୍ତ୍ତା/ ରାଇଘର: ନବରଙ୍ଗପୁର ଜିଲ୍ଲା ରାଇଘର ବ୍ଲକ ସୀମାନ୍ତରେ ପୁଣିଥରେ ଲାଗିଲା ମାଓ ପୋଷ୍ଟର ଓ ବ୍ୟାନର । ମାଓ ପ୍ରବଣ ଅଞ୍ଚଳ ରାଇଘର ବ୍ଲକ କୁରାବେଡ଼ାରେ ଲିଫ୍ ଲେଟ୍, ଯୋଡିଙ୍ଗା ଏବଂ ହାତୀ ଗାଁ ରାସ୍ତା କଡରେ ପୋଷ୍ଟର ମାରି ନିଜର ଉପସ୍ଥିତି ଜାହିର କରିବା ସହ ସରକାରୀ ନୀତି ନିୟମକୁ ବିରୋଧ ପାଇଁ ଚେତାବନୀ । ଓଡିଶା ଓ ଛତିଶଗଡ଼ ସୀମାନ୍ତରେ ଗଛ କାଟି ରାସ୍ତା ଅବରୋଧ କରିଛନ୍ତି ଲାଲ ବାହିନୀ । ଜଙ୍ଗଲ କାଟିବାକୁ ନେଇ ବିରୋଧ କରିବାକୁ ପୋଷ୍ଟରରେ ଲେଖା ଯାଇଛି । ଏହାସହ ନବ ନିର୍ବାଚିତ ସରପଞ୍ଚ, ୱାର୍ଡ ମେମ୍ବର ଓ ଗ୍ରାମବାସୀ ମାନଙ୍କୁ ଜଙ୍ଗଲ ସୁରକ୍ଷା ପାଇଁ ଅନୁରୋଧ କରିଛନ୍ତି ।
ଏଠାରେ ଉଲ୍ଲେଖ କରାଯାଇଛି କେନ୍ଦ୍ରର ମୋଦୀ ସରକାର, ଛତିଶଗଡ଼ର ବଘେଲ ସରକାର ଓ ଓଡିଶାର ନବୀନ ସରକାରଙ୍କ ନିତି ନିୟମକୁ ବିରୋଧ କରାଯାଉ । ନୂଆ ନୂଆ ପୋଲିସ କ୍ଯାମ୍ପ, ନୂଆ ନୂଆ ରାସ୍ତା, ବ୍ରିଜ ବନ୍ଦ କରାଯାଉ । ଲୋକଙ୍କ ସୁବିଧା ପାଇଁ ସ୍କୁଲ, କଲେଜ, ହସପିଟାଲ, ପାଣିର ବ୍ଯବସ୍ଥା କରାଯାଉ । ଖଣିଜ ସମ୍ପଦକୁ ଖନନ କରି ପୁଞ୍ଜିପତି ହେଇଛନ୍ତି ତାଙ୍କୁ ବହିଷ୍କାର କରାଯାଉ । ଆହୁରି ମଧ୍ୟ ଏହି ପୋଷ୍ଟରରେ ମେ ମାସ ୨୦ ତାରିଖରେ ଓଡିଶା ଏବଂ ପୂର୍ବ ଛତିଶଗଡ଼ ଗୋଟିଏ ଦିନ ପାଇଁ ବନ୍ଦ ସଫଳ କରନ୍ତୁ ବୋଲି ହିନ୍ଦୀ ଭାଷାରେ ଲେଖା ହୋଇ ଥିବାର ଦେଖିବାକୁ ମିଳିଛି ।
ଅନ୍ୟ ଏକ ପୋଷ୍ଟରରେ ଫାସିବାଦୀ ସମାଧାନ ପ୍ରହାର ଦମନ ଅଭିଯାନର ବିରୁଦ୍ଧରେ ଓଡିଶା ଏବଂ ପୂର୍ବ ଛତିଶଗଡ ମେ ମାସ ୨୦ ତାରିଖରେ ଗୋଟିଏ ଦିନ ବନ୍ଦ ସଫଳ କରନ୍ତୁ ବୋଲି ଲେଖା ହୋଇଛି । ଏହା ଭାକପା (ମାଓବାଦୀ) ଓଡିଶା ରାଜ୍ୟ କମିଟି ବୋଲି ଉଲ୍ଲେଖ କରାଯାଇଛି । ଉକ୍ତ ପୋଷ୍ଟରକୁ ଦେଖି ଅଞ୍ଚଳବାସୀ ଭୟଭୀତ ହୋଇ ରହିଛନ୍ତି ।
