ଧର୍ମ, ନୈତିକତା ଓ ମୂଲ୍ୟବୋଧ ଶୀର୍ଷକ ଆଲୋଚନାଚକ୍ର
ବକ୍ତବ୍ୟ ଦେଲେ ଶ୍ରୀଳଙ୍କାର ବିଦ୍ବାନ୍ ପ୍ରଫେସର ଅସଙ୍ଗ ତିଲକରତ୍ନେ
ଓଡ଼ିଆ ବାର୍ତ୍ତା/ ବାଲେଶ୍ଵର (କୃଷ୍ଣ କୁମାର ମହାନ୍ତି): କୋଲକାତା ସ୍ଥିତ କେନ୍ଦ୍ର ସାହିତ୍ୟ ଏକାଡେମୀର ପୂର୍ବାଞ୍ଚଳ କାର୍ଯ୍ୟାଳୟ ସଭାକକ୍ଷରେ ଧର୍ମ, ନୈତିକତା ଓ ମୂଲ୍ୟବୋଧ ଶୀର୍ଷକ ଏକ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି। ଏଥିରେ ଅତିଥି ଭାବେ ଯୋଗଦେଇ ସାହିତ୍ୟ ଏକାଡେମୀର ଆନନ୍ଦ କୁମାରସ୍ୱାମୀ ଫେଲୋ ତଥା ଶ୍ରୀଲଙ୍କାର ବିଶିଷ୍ଟ ବିଦ୍ବାନ ଓ ବୌଦ୍ଧ ଗବେଷକ ପ୍ରଫେସର ଅସଙ୍ଗ ତିଲକରତ୍ନେ ବକ୍ତବ୍ୟ ପ୍ରଦାନ କରିଥିଲେ। ପ୍ରାରମ୍ଭରେ ସ୍ୱାଗତ ଭାଷଣ ପ୍ରଦାନ ସହିତ ପ୍ରଫେସର ତିଲକରତ୍ନେଙ୍କୁ ସମ୍ବର୍ଦ୍ଧିତ କରିଥିଲେ ସାହିତ୍ୟ ଏକାଡେମୀର ପୂର୍ବାଞ୍ଚଳ କାର୍ଯ୍ୟାଳୟର ଆଞ୍ଚଳିକ ସଚିବ ଡକ୍ଟର ଦେବେନ୍ଦ୍ର କୁମାର ଦେବେଶ। ନିଜ ବକ୍ତବ୍ୟରେ ପ୍ରଫେସର ତିଲକରତ୍ନେ ଦର୍ଶାଇଥିଲେ ଯେ ଜଣେ ନାସ୍ତିକଙ୍କୁ ଜଣେ ଅନୈତିକ ବ୍ୟକ୍ତି ଭାବରେ ଗ୍ରହଣ କରିନେବା ଠିକ୍ ନୁହେଁ। ଯଦି ଆମେ ରୀତିନୀତି ଏବଂ ନିର୍ଦ୍ଦିଷ୍ଟ ଧାର୍ମିକ ପ୍ରଥା ଅନୁଯାୟୀ ଧର୍ମକୁ ବିଚାର କରୁ, ତେବେ ଜଣେ ବ୍ୟକ୍ତି ନିର୍ଦ୍ଦିଷ୍ଟ ଧାର୍ମିକ ରୀତିନୀତି ନକରି ଏକ ଭଲ ନୀତିନିଷ୍ଠ ବ୍ୟକ୍ତି ହୋଇପାରନ୍ତି। ଧର୍ମୀୟ ଧାରାର ଅଭିବୃଦ୍ଧି ଏବଂ ବିକାଶ ବିଷୟରେ ସେ ତାଙ୍କର ବିଶ୍ଳେଷଣ ଉପସ୍ଥାପନ କରିଥିଲେ। ଧାର୍ମିକ ଆଚରଣ, ନୈତିକତା ଏବଂ ମାନବିକ ମୂଲ୍ୟବୋଧ ମଧ୍ୟରେ ଥିବା ସମ୍ପର୍କ ଉପରେ ସେ ଗୁରୁତ୍ୱାରୋପ କରିଥିଲେ। ନିଜ ଭାଷଣରେ ସେ ବିଭିନ୍ନ ଦାର୍ଶନିକ ଧାରଣା ବିଷୟରେ ଉଲ୍ଲେଖ କରି ନିଜ ବକ୍ତବ୍ୟ ସମାପନ ବେଳେ କହିଥିଲେ ଯେ ଭଲ କାମ କରିବା, ଖରାପ କରିବା ନାହିଁ ଏବଂ ମନକୁ ଶୁଦ୍ଧ କରିବା ହେଉଛି ସବୁଠୁ ବଡ କଥା। ଭାଷଣ ପରେ ସେ ଉପସ୍ଥିତ ଶ୍ରୋତାଙ୍କ ପ୍ରଶ୍ନର ଉତ୍ତର ଦେଇଥିଲେ। ଶେଷରେ ସାହିତ୍ୟ ଏକାଡେମୀର ସହକାରୀ ସମ୍ପାଦକ କ୍ଷେତ୍ରବାସୀ ନାଏକ ଧନ୍ୟବାଦ ଅର୍ପଣ କରିଥିଲେ। ଏହି ସଭାରେ ସହରର ବହୁ ସାହିତ୍ୟିକ ଓ ବୁଦ୍ଧିଜୀବୀ ଉପସ୍ଥିତ ଥିଲେ।
