ଓଡ଼ିଆ ବାର୍ତ୍ତା/ ରାୟପୁର: ଛତିଶଗଡର ଦାନ୍ତେଓ୍ଵାଡା ଜିଲ୍ଲାର ଏକ ଜଙ୍ଗଲରେ ମାଓବାଦୀଙ୍କ ସହ ଗୁଳି ବିନିମୟ ବେଳେ ବସ୍ତର ଯୋଦ୍ଧା ଏବଂ ଜିଲ୍ଲା ରିଜର୍ଭ ଗାର୍ଡ (ଡିଆରଜି)ର ଯବାନଙ୍କ ଏକ ମିଳିତ ଟିମ୍ ନିୟୋଜିତ ହୋଇଥିଲେ। ମିଳିତ ଟିମ୍ ଉକ୍ତ ଅଞ୍ଚଳରେ ସର୍ଚ୍ଚ ଅପରେସନ୍ ଚଳାଇଥିବା ବେଳେ ଏକ ଏନକାଉଣ୍ଟର ହୋଇଥିଲା। ଅପରାହ୍ନ ପ୍ରାୟ ସାଢ଼େ ୫ଟା ବେଳେ ଦାନ୍ତେଓ୍ଵାଡ଼ା ଓ ସୁକମା ଜିଲ୍ଲାର ସୀମାରେ ଥିବା ତୁମକପାଲ ଓ ଡବାକୁନା ଗାଁ ମଧ୍ୟରେ ଥିବା ଜଙ୍ଗଲ ପାହାଡ଼ରେ ପୁଲିସ ଟିମ୍ ସଶସ୍ତ୍ର ମାଓବାଦୀଙ୍କ ଏକ ଗୋଷ୍ଠୀ ସହ ସାମ୍ମାସାମ୍ନି କରିଥିଲା।ଗୁଳି ବିନିମୟ ବେଳେ ଦରଭା ଡିଭିଜନର ୩ ଜଣ ମାଓବାଦୀ ନିହତ ହୋଇଥିଲେ। ଏନକାଉଣ୍ଟର ସ୍ଥଳରୁ ମୃତକଙ୍କ ମୃତଦେହ ସହ ବିପୁଳ ପରିମାଣର ବିସ୍ଫୋରକ ଓ ନକ୍ସଲ ସମ୍ବନ୍ଧୀୟ ସାମଗ୍ରୀ ଜବତ କରାଯାଇଛି। କେନ୍ଦ୍ରୀୟ ସଶସ୍ତ୍ର ପୁଲିସ ବଳ (ସିଏପିଏଫ୍) ଏବଂ କେନ୍ଦ୍ରୀୟ ରିଜର୍ଭ ପୁଲିସ ବଳ (ସିଆରପିଏଫ୍) ଯବାନଙ୍କ ସହ ଦାନ୍ତେଓ୍ଵାଡ଼ା ଓ ସୁକୁମାର ଡିଆରଜି/ବସ୍ତର ଲଢ଼ୁଆ ଦଳ ଆଖପାଖ ଅଞ୍ଚଳରେ ସର୍ଚ୍ଚ ଅପରେସନ୍ ଜାରି ରଖିଛନ୍ତି।ଦାନ୍ତେଓ୍ଵାଡ଼ା ଆରକ୍ଷୀ ଅଧୀକ୍ଷକ ଗୌରବ ରାୟ ଏହି ଘଟଣାକୁ ସୁନିଶ୍ଚିତ କରିଥିଲେ ମଧ୍ୟ ଅଞ୍ଚଳରେ ନେଟୱାର୍କ ସଂଯୋଗ ଖରାପ ଥିବାରୁ ତୁରନ୍ତ ମୃତଦେହ ଚିହ୍ନଟ ହୋଇପାରିନାହିଁ ବୋଲି କହିଛନ୍ତି। ଘଟଣାସ୍ଥଳରେ ଫୋର୍ସ ମୁତୟନ ରହିଥିବା ବେଳେ ଯୋଗାଯୋଗ ସ୍ବାଭାବିକ ହେବା ପରେ ଅଧିକ ତଥ୍ୟ ମିଳିପାରେ ବୋଲି ଆଶା କରାଯାଉଛି ବୋଲି ସେ କହିଛନ୍ତି।
