ଏଏସ୍ଆଇଙ୍କ ତତ୍ପରତାକୁ ପ୍ରଶଂସା
ଓଡ଼ିଆ ବାର୍ତ୍ତା/ ଜୁନାଗଡ଼ (ସ୍ବାସ୍ତିଦୀପ ଆଦିତ୍ୟ): ଜୁନାଗଡ଼ ଥାନା ଅନ୍ତର୍ଗତ ଘଣ୍ଟବାହାଳୀ ଠାରେ ଶୁକ୍ରବାର ସନ୍ଧ୍ୟାରେ ଏକ ଅଜଣା ଗାଡ଼ି ଧକ୍କାରେ ଜଣେ ଯୁବକଙ୍କ ମୃତ୍ୟୁ ଘଟିଛି। ମୃତ ଯୁବକ ଜଣକ କଲମପୁର ବ୍ଲକ ଚୁରା ଗାଁର ଭବାନୀଶଙ୍କର ପଣ୍ଡା ବୋଲି ଜଣାପଡିଛି। ସେ ବାଇକ୍ ଯୋଗେ ଭବାନୀପାଟଣାରୁ ନିଜ ଗାଁକୁ ଫେରୁଥିବା ବେଳେ ଘଣ୍ଟବାହାଳୀ ଠାରେ ଅଜଣା ଗାଡ଼ିଟି ତାଙ୍କୁ ଧକ୍କା ଦେଇ ଫେରାର ହୋଇଯାଇଥିଲା। ଖବର ପାଇ ଜୁନାଗଡ଼ ଥାନାର ଏଏସ୍ଆଇ ସ୍ମିତା ମାଝୀ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ଆହତ ଅବସ୍ଥାରେ ଥିବା ଯୁବକଙ୍କୁ ନିଜେ ପୋଲିସ ପିସିଆର ଗାଡ଼ିରେ ଜୁନାଗଡ଼ ଡାକ୍ତରଖାନାକୁ ଆଣିଥିଲେ। ସେଠାରେ ଡାକ୍ତର ତାଙ୍କୁ ମୃତ ବୋଲି ଘୋଷଣା କରିଥିଲେ। ଏଏସ୍ଆଇ ସ୍ମିତା ମାଝୀଙ୍କ ଏଭଳି ତତ୍ପରତା ଏବଂ ମାନବିକତାକୁ ସ୍ଥାନୀୟ ଜନସାଧାରଣ ପ୍ରଶଂସା କରିଛନ୍ତି। ପୋଲିସ ଏକ ମାମଲା ରୁଜୁ କରି ଅଜଣା ଗାଡ଼ିକୁ ଚିହ୍ନଟ କରିବା ପାଇଁ ତଦନ୍ତ ଆରମ୍ଭ କରିଛି।
