ଓଡ଼ିଆ ବାର୍ତ୍ତା/ ନୂଆଦିଲ୍ଲୀ: ଗୁଜୁରାଟର ସୁରଟ ପୂର୍ବ ବିଧାନସଭା ଆସନରୁ ଆମ୍ ଆଦମୀ ପାର୍ଟିର ପ୍ରାର୍ଥୀ କଞ୍ଚନ ଜରିୱାଲା ବୁଧବାର ତାଙ୍କ ନାମାଙ୍କନପତ୍ର ପ୍ରତ୍ୟାହାର କରିଛନ୍ତି। ଏହାକୁ ନେଇ ଆମ୍ ଆଦମୀ ପାର୍ଟି ବିଜେପିକୁ ଟାର୍ଗେଟ୍ କରିଛି। ଏପରି କରି ବିଜେପି ଆପ୍ ଲୋକତନ୍ତ୍ରର ଅପହରଣ କରିଛି ବୋଲି ଦଳର ଶୀର୍ଷ ନେତା ମନୀଷ ସିସୋଦିଆ କହିଛନ୍ତି। ବିଜେପି ଏହି ଆସନରୁ ବିଧାୟକ ଅରବିନ୍ଦ ରାଣାଙ୍କୁ ପ୍ରାର୍ଥୀ କରିଛି। ଜରିୱାଲାଙ୍କୁ ବିଜେପି ନିର୍ଦ୍ଦେଶରେ ଅପହରଣ କରାଯାଇଛି ଏବଂ ତାଙ୍କ ନାମାଙ୍କନ ପ୍ରତ୍ୟାହାର କରିବାକୁ ଚାପ ପ୍ରୟୋଗ କରାଯାଇଛି। ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ କାଞ୍ଚନ ଜରିୱାଲାଙ୍କୁ ଅପହରଣ କରିବା ଭଳି ବିଜେପି ବିରୋଧରେ ଅନେକ ଗୁରୁତର ଅଭିଯୋଗ ଆଣିଛନ୍ତି। ତେବେ ବିଜେପି ଏପରି ଅଭିଯୋଗକୁ ଖଣ୍ଡନ କରିଛି। ଅନ୍ୟପକ୍ଷରେ, କାଞ୍ଚନ ଜରିୱାଲା ସ୍ପଷ୍ଟ କରି କହିଛନ୍ତି ଯେ ନିଜର ବିବେକ ଅନୁଯାୟୀ ସେ ଏପରି ନିଷ୍ପତ୍ତି ନେଇଛନ୍ତି।
ଏ ନେଇ ଆପ୍ ନିର୍ବାଚନ କମିଶନଙ୍କ ନିକଟରେ ଅଭିଯୋଗ କରିଛନ୍ତି। ମନୀଷ ସିସୋଦିଆ କହିଛନ୍ତି ଯେ ସୁରଟ ପୂର୍ବରେ ନିର୍ବାଚନ ଉପରେ ପ୍ରତିବନ୍ଧକ ଲଗାଇବାକୁ ଆମେ ନିର୍ବାଚନ କମିଶନଙ୍କ ନିକଟରେ ଦାବି କରିଛୁ। ଆମ ପ୍ରାର୍ଥୀ ପୂର୍ବରୁ ଅପହରଣ ହୋଇଥିଲେ। ତା’ପରେ ବନ୍ଧୁକ ମୁନରେ ନାମାଙ୍କନ ପ୍ରତ୍ୟାହାର କରାଯାଇଥିଲା। ନିର୍ବାଚନ ଆୟୋଗ ଏଥିପ୍ରତି ଦୃଷ୍ଟି ଦେବା ଉଚିତ୍। ନିର୍ବାଚନ କମିଶନ ଖୁବ ଶୀଘ୍ର ଏହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ଆଶା।
ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ସାମ୍ବାଦିକ ସମ୍ମିଳନୀ କରି କହିଛନ୍ତି ଯେ ମଙ୍ଗଳବାର ଠାରୁ ଜରିୱାଲା ଏବଂ ତାଙ୍କ ପରିବାର ସଦସ୍ୟ ନିଖୋଜ ଅଛନ୍ତି। ସିସୋଦିଆ କହିଛନ୍ତି ଯେ ଗୁଜୁରାଟ ନିର୍ବାଚନରେ ବିଜେପି ହାରିବାକୁ ଯାଉଛି ଏବଂ ଅସନ୍ତୋଷ ପ୍ରକାଶ କରି ଏତେ ତଳ ସ୍ତରକୁ ଖସିଯାଇଛି ଯେ ଆମ ପ୍ରାର୍ଥୀଙ୍କୁ ସୁରଟ ପୂର୍ବରୁ ଅପହରଣ କରି ନିଆଯାଇଛି।ମନୀଷ ସିସୋଦିଆ ଅଭିଯୋଗ କରିଛନ୍ତି ଯେ ଗତ ୨୪ ଘଣ୍ଟା ଧରି ପ୍ରାର୍ଥୀ ନିଖୋଜ ଥିଲେ ମଧ୍ୟ ନିର୍ବାଚନ ଅଧିକାରୀ କହିଛନ୍ତି ଯେ ଜିଲ୍ଲା ମାଜିଷ୍ଟ୍ରେଟ ଏବଂ ଏସପି ଏହି ଘଟଣାର ତଦନ୍ତ କରୁଛନ୍ତି। ସେ କହିଛନ୍ତି, ଏହି ଘଟଣା ସିଇଓଙ୍କ କାର୍ଯ୍ୟଧାରା ଉପରେ ମଧ୍ୟ ପ୍ରଶ୍ନ ଉଠିଛି।
