ଓଡ଼ିଆ ବାର୍ତ୍ତା/ ନୂଆଦିଲ୍ଲୀ: ପୁଣି ଭୂକମ୍ପରେ ଥରିଛି ତୁର୍କୀ। ୟୁରୋପୀୟ ଭୂମଧ୍ୟସାଗରୀୟ ଭୂକମ୍ପ କେନ୍ଦ୍ର କହିଛି ଯେ ତୁର୍କୀ-ସିରିଆ ସୀମା ଅଞ୍ଚଳରେ ଦୁଇ କିଲୋମିଟର ଗଭୀରତାରେ ୬.୪ ତୀବ୍ରତାରେ ଏହି ଭୂକମ୍ପ ଅନୁଭୂତ ହୋଇଛି। ନୂଆ ଭୂକମ୍ପ ଯୋଗୁଁ ଦକ୍ଷିଣ ତୁର୍କୀରେ ଆହୁରି ବିନାଶ ହେବାର ସମ୍ଭାବନା ରହିଛି। ତେବେ ସୋମବାର ଭୂକମ୍ପ ହେବାର କିଛି ଘଣ୍ଟା ପରେ ଖବର ଆସିଛି ଯେ ତିନି ଜଣଙ୍କର ମୃତ୍ୟୁ ହୋଇଥିବାବେଳେ ୨୧୩ ଜଣ ଆହତ ହୋଇଛନ୍ତି। ପ୍ରାୟ ୧୦ ସେକେଣ୍ଡ ପାଇଁ ଲାଟାକିଆରେ ଦୁଇଟି ଭୂକମ୍ପ ଅନୁଭୂତ ହୋଇଛି। ଏହି ସମୟ ମଧ୍ୟରେ ଲୋକମାନେ ହୋଟେଲରୁ ବାହାରକୁ ଆସିଥିଲେ। ଅନ୍ୟପକ୍ଷରେ, ସିରିଆରେ ଭୂକମ୍ପ ଯୋଗୁଁ ବହୁ ଅଟ୍ଟାଳିକା ଭୁଶୁଡି ପଡିଛି। ସିରିଆରେ ୬ ଜଣ ଆହତ ହୋଇଥିବା ବିଦେଶୀ ଖବରସରବରାହ ସଂସ୍ଥା ପକ୍ଷରୁ କୁହାଯାଇଛି। ତୁର୍କୀର ଦକ୍ଷିଣରେ ଥିବା ସେଣ୍ଟ୍ରାଲ ଅନ୍ତକାୟରେ ଭୂକମ୍ପ ପରେ ଅନେକ କୋଠା ଭୁଶୁଡି ପଡିଛି। ରିପୋର୍ଟ ଅନୁଯାୟୀ, ଭୂକମ୍ପ ହେତୁ ଭୁଶୁଡି ପଡ଼ିଥିବା କୋଠା ତଳେ ଅନେକ ପୋତି ହୋଇ ରହିଛନ୍ତି। ଦୁଇ ସପ୍ତାହ ପୂର୍ବେ ଆଣ୍ଟାକିଆରେ ଭୂକମ୍ପ ଅନୁଭୂତ ହୋଇଥିଲା, ଯେଉଁଥିରେ ହଜାର ହଜାର ଲୋକ ପ୍ରାଣ ହରାଇଥିଲେ ଏବଂ ଅନେକ କୋଠାଘର ନଷ୍ଟ ହୋଇଯାଇଥିଲା। ଭୂକମ୍ପ ପରେ ତୁର୍କୀର ଉଦ୍ଧାରକାରୀ ଦଳ ଏହି ଅଞ୍ଚଳକୁ ଯାଉଥିବା ସୂଚନା ରହିଛି। ଜଣେ ବାସିନ୍ଦା ମୁନା ଅଲ ଓମାର କହିଛନ୍ତି ଯେ ଭୂକମ୍ପ ହେବା ପରେ ସେ ଆଣ୍ଟାକିଆ ସହରର ଏକ ପାର୍କରେ ଥିବା ଏକ ତମ୍ବୁ ତଳେ ଥିଲେ। ଫେବୃଆରୀ ୬ ରେ ତୁର୍କୀର ଦକ୍ଷିଣ ପୂର୍ବ ଏବଂ ପଡୋଶୀ ସିରିଆରେ ୭.୮ ତୀବ୍ରତାରେ ଏକ ଭୂକମ୍ପ ହୋଇଥିଲା। ଯେଉଁଥିରେ ୪୫ ହଜାରରୁ ଅଧିକ ଲୋକ ପ୍ରାଣ ହରାଇଥିଲେ ଏବଂ ଏକ ଲକ୍ଷରୁ ଅଧିକ ଲୋକ ବାସହୀନ ହୋଇଥିଲେ।
